Lûqa 6 - Пәймана Ну (Инщил)

Пьрса рʼожа шәмийе

¹ Рʼожәкә шәмийе Иса нава зәвийарʼа дәрбаз дьбу, шагьртед Ԝи сьмбьлед гәньм дьчьнин, дәстед хԝәда дьфьрькандьн у дьхԝарьн.

² Ле жь ферьсийа һьнәка гот: «Чьма һун тьште нәщайизи рʼожа шәмийе дькьн?»

³ Иса ль ԝан вәгәрʼанд у гот: «Ԝә нәхԝәндийә кӧ Даԝьд чь кьр, гава әԝ у йед перʼа бьрʼчи бун?

⁴ Нә әԝ кʼәтә Хана Хԝәде у нане Хԝәдерʼа дайи һьлда, һьн хԝәха хԝар, һьн жи да йед тʼәви хԝә, ԝәки тʼӧ кәсирʼа нә щайиз бу бьхԝара, пештьри кʼаһина?»

⁵ У вәгәрʼийа ԝанрʼа гот: «Кӧрʼе Мерьв Хӧдане шәмийе йә жи».

Иса рʼожа шәмийе мәрьве кӧ дәсте ԝи кʼьшийабу ԛәнщ дькә

⁶ У рʼожа шәмикә дьн Иса чу кʼьниште, кӧ һин бькә. Мәрьвәк ль ԝьр һәбу, кӧ дәсте ԝийи рʼасте кʼьшийабу.

⁷ Чʼәʼве ԛанунзан у ферьсийа ль сәр Ԝи бун, гәло ԝе рʼожа шәмийе нәхԝәша ԛәнщ кә йан на, ԝәки мәʼникә ԝан һәбә, кӧ хәйба Ԝи бькьн.

⁸ Ле фькьред ԝан Исава әʼйан бун у ԝи мәрьве дәсткʼьшийайирʼа гот: «Рʼабә ве говәке бьсәкьнә». Әԝ жи рʼабу сәкьни.

⁹ Һьнге Иса ԝанрʼа гот: «Әзе пьрсәке жь ԝә бькьм. Рʼожа шәмийе чь щайиз ә бькьн: Ԛәнщи йан хьраби, рʼӧһʼәки хьлаз кьн йан ӧнда кьн?»

¹⁰ У Иса ль һʼәмуйед дора Хԝә ньһерʼи, ԝи мәрьвирʼа гот: «Дәсте хԝә дьреж кә». Әԝи жи ӧса кьр у дәсте ԝи диса ԛәнщ бу.

¹¹ Һьнге ԝана жь һерса хԝә дьхԝар, нав һәвда дьшеԝьрин, кӧ чь биньнә сәре Иса.

Бьжартьна һәр донздәһ шандийа

¹² Ԝан рʼожада Иса чу сәре чʼийе, кӧ дӧа бькә у тʼәмамийа шәве бәр Хԝәде бь дӧа дәрбаз кьр.

¹³ Чахе сьбәһ зәлал бу, Әԝи гази шагьртед Хԝә кьрьн у донздәһ мәрьв жь нав ԝан бьжартьн, кӧ навед ԝан жи «шанди» дани:

¹⁴ Шьмһʼуне кӧ наве ԝи дани Пәтрус у бьре ԝи Әндраԝьс, Аԛуб у Йуһʼәнна, Филипо у Бәртоломәйо,

¹⁵ Мәтта у Тʼума, Аԛубе Һалфаԝо у Шьмһʼуне кӧ ԝәлатпʼарьст дьһатә готьне.

¹⁶ Щьһудайе Аԛуб у Щьһудайе Исхәрйоти, кӧ нәмамийа Ԝи кьр.

Иса даннасин дькә, һин дькә у ԛәнщ дькә

¹⁷ Әԝ бь тʼәви ԝан бәржер бу һат, рʼастәке сәкьни. Ль ԝе дәре кʼомәкә шагьртайә мәзьн у щьмәʼтәкә гьран жь тʼәмамийа Щьһустане, Оршәлиме у жь дәве бәʼра Суре у Сайде щьвийайи бун.

¹⁸ Әԝана һатьбун, ԝәки гӧһдарийа Ԝи бькьн у жь нәхԝәшийед хԝә ԛәнщ бьн. У йед жь рʼӧһʼед һʼәрам щәфа дькʼьшандьн жи ԛәнщ дьбун.

¹⁹ У тʼәмамийа әʼлаләте жи дьщәʼданд, ԝәки дәсте хԝә бьдана Ԝи, чьмки ԛәԝат жь Ԝи дәрдькʼәт у һәр кәс жь ԝан ԛәнщ дьбу.

Йед хԝәзьли у нә хԝәзьли

²⁰ Иса бәре Хԝә да шагьртед Хԝә у гот: «Хԝәзи ль ԝә фәԛира, чьмки Пʼадшатийа Хԝәде йа ԝә йә.

²¹ Хԝәзи ль ԝә, кӧ һун ньһа бьрʼчи нә, чьмки һуне тʼер бьн. Хԝәзи ль ԝә, кӧ һун ньһа дьгьрин, чьмки һуне бькʼәньн.

²² Хԝәзи ль ԝә, гава һун бона Кӧрʼе Мерьв бәр чʼәʼве мәрийа рʼәш бьн, гава ԝә ԛәбул нәкьн, ԝә беһӧрмәт кьн у наве хьраб сәр ԝә дәрхьн.

²³ Ԝе рʼоже әшԛ бьн у жь шабуна бьра ньгед ԝә әʼрд нәгьрә, чьмки ва һәԛе ԝә ль әʼзмен гәләк ә, чьмки кал-бавед ԝан жи сәре пʼехәмбәра ӧса дькьрьн.

²⁴ Ле ԝәй ль ԝә дәԝләтийа, чьмки һун гьһиштьнә мәрәме хԝә.

²⁵ Ԝәй ль ԝә, кӧ һун ньһа тʼер ьн, чьмки һуне бьрʼчи бьн. Ԝәй ль ԝә, кӧ һун ньһа дькʼәньн, чьмки һуне бьгьрин у шине бькьн.

²⁶ Ԝәй ль ԝә, кӧ һʼәму мәрьв бона ԝә ԛәнщ хәбәр дьдьн, чьмки кал-бавед ԝан жи пʼехәмбәред дәрәԝрʼа ӧса дькьрьн.

Дьжмьнед хԝә һʼьз бькьн

²⁷ Ле Әз ԝәрʼа, йед кӧ дьбьһен дьбежьм, дьжмьнед хԝә һʼьз бькьн, хернәхԝазед хԝәрʼа ԛәнщийе бькьн.

²⁸ Ньфьрʼкьред хԝә бьмбарәк кьн у бона йед хьрабийе ԝә дькьн, дӧа бькьн.

²⁹ Һәгәр йәк рʼуйе тә хә, йе дьн жи бьдә бәр у йе кӧ пʼоте тә жь тә бьстинә, кьрасе хԝә жи жерʼа бьһелә.

³⁰ Бьдә ԝи, кʼи жь тә дьхԝазә у кʼи жь тә дьстинә пашда нәхԝазә.

³¹ У чаԝа һун дьхԝазьн мәрьв бона ԝә бькьн, һун жи ӧса ԝанрʼа бькьн.

³² Һәгәр һун ԝан һʼьз бькьн, кʼижан кӧ ԝә һʼьз дькьн, чь фәйдә? Нә гӧнәкʼар жи ԝан һʼьз дькьн, кʼижан кӧ ԝан һʼьз дькьн?

³³ У һәгәр һун ԛәнщикьред хԝәрʼа ԛәнщийе бькьн, чь фәйдә? Нә гӧнәкʼар жи ӧса дькьн?

³⁴ У һәгәр һун дәйн дьдьнә йед ӧса, жь кʼижана гӧмана ԝә һәйә пашда бьстиньн, чь фәйдә? Нә гӧнәкʼар жи дәйн дьдьнә гӧнәкʼара, кӧ диса һаԛаси пашда бьстиньн?

³⁵ Ле һун дьжмьнед хԝә һʼьз бькьн, ԛәнщийе бькьн, дәйн бьдьн у һивийа вәгәрʼандьне нәминьн. Һәԛе ԝәйе гәләк бә у һуне бьбьнә зарʼед Йе Һәри Жорьн. Чьмки Әԝ бона бешекьра жи, нәрʼаста жи ԛәнщ ә.

³⁶ Дьлрʼәʼм бьн, чаԝа Баве ԝә дьлрʼәʼм ә.

Һинкьрьна дәрһәԛа ломәкьрьнеда

³⁷ Лома нәкьн у ломәйе ль ԝә нәбьн, нәһәԛийе нәкьн, нәһәԛи ԝе ль ԝә нәбә, бьбахшиньн ԝәрʼа ԝе бе бахшандьне.

³⁸ Бьдьн, ԝәрʼа ԝе бе дайине, бь пиванәкә тʼьжи һʼәжанди, дәԝьсанди, сәри ԛучʼ ԝе бькьнә пʼеша ԝә. Чьмки бь чь чапе һун бьпивьн, бь ԝе жи ԝәрʼа ԝе бе пиване».

³⁹ Әԝи мәсәләк жи ԝанрʼа гот: «Гәло кор дькарә рʼебәрийе кора бькә? Нә һәр дӧйе жи бькʼәвьнә чʼәʼле?

⁴⁰ Шагьрт жь дәрсдаре хԝә нә мәстьр ә, ле әԝе кӧ хԝәндьна хԝә рʼьнд пек тинә, дькарә мина дәрсдаре хԝә бә.

⁴¹ Тӧ чьма ԛьршьке чʼәʼве бьре хԝәда дьбини, ле кʼеране чʼәʼве хԝәда набини?

⁴² Йан жи чаԝа тӧ дькари бежи бьре хԝә: ‹Бьра, бьһелә кӧ әз ԛьршьк жь чʼәʼве тә дәрхьм›, ле тӧ кʼеране чʼәʼве хԝәда набини? Дӧрʼу! Пешийе кʼеране чʼәʼве хԝә дәрхә. Паше те ԛәнщ бьбини кӧ чаԝа ԛьршьк жь чʼәʼве бьре хԝә дәрхи.

Дар у бәре ԝе

⁴³ Дара ԛәнщ бәре хьраб надә, нә жи дара хьраб бәре ԛәнщ.

⁴⁴ Һәр дар жь бәре хԝә те наскьрьне, кәсәк жь стьрийа һежира начьнә у нә жи жь дьрʼийе тьрийа.

⁴⁵ Мәрьве ԛәнщ, жь хьзна дьле хԝәйи ԛәнщ, ԛәнщийе дәртинә, ле мәрьве хьраб, жь хьзна дьле хԝәйи хьраб хьрабийе дәртинә. Чьмки дьле ԝи чьва тʼьжи йә зар жи әԝе дьбежә.

Һʼимед дӧ мала

⁴⁶ Һун чьма Мьнрʼа ‹Хӧдан! Хӧдан!› дьбежьн у ԝан тьштед кӧ Әз ԝәрʼа дьбежьм накьн?

⁴⁷ Һәр кәсе кӧ те щәм Мьн готьнед Мьн дьбьһе у дьԛәдинә, Әз ԝәрʼа бежьм мина кʼе йә.

⁴⁸ Әԝ мина мәрьвәки йә, йе кӧ мале чедькә, әʼрде дькʼолә кʼур дькә, һʼиме ԝе ль сәр кевьр датинә. У гава лейи рʼадьбә, чʼәм ль ԝе мале дьхә, әԝ наһʼәжә, чьмки рʼьнд һатьбу чекьрьне.

⁴⁹ Ле әԝе хәбәред Мьн дьбьһе у наԛәдинә, мина мәрьвәки йә, йе кӧ сәр хԝәлийе бе һʼим мале хԝәрʼа чедькә. Гава чʼәм ле дьхә, дәстхԝәда һьлдьше, ԝеран дьбә, ль бәр миратʼе дьчә».