Lûqa 5 - Пәймана Ну (Инщил)

Иса гази шагьртед Хԝәйә пешьн дькә

¹ Щарәке Иса ль бәр гола Щенисарте сәкьнибу у әʼлаләте дора Ԝи гьрт, кӧ хәбәра Хԝәде бьбьһе.

² У Әԝи дӧ ԛәйьк дәве голе дитьн, мәʼсигьр жь ԝан дәркʼәтьбун у тʼорʼед хԝә дьшуштьн.

³ Иса кʼәтә ԛәйькәкә жь ԝан, кӧ йа Шьмһʼун бу, һиви жь ԝи кьр, кӧ ԛәйьке һьнәки жь бәже дур хә. У Әԝ рʼуньшт, жь ԛәйьке әʼлаләт һин кьр.

⁴ Чахе Әԝи хәбәрдана Хԝә хьлаз кьр, Шьмһʼунрʼа гот: «Ԛәйьке бьбә щийе кʼур у тʼорʼед хԝә бавежьнә нечʼире».

⁵ Шьмһʼун ле вәгәрʼанд у гот: «Мамоста, мә тʼәмамийа шәве кьр-нәкьр тьштәк нәгьрт, ле бона хатьре Тә әзе тʼорʼа бавежьме».

⁶ У гава ӧса кьрьн, һаԛас мәʼси кʼәтьне, кӧ тʼорʼед ԝан дьԛәтийан.

⁷ У бь нишана гази һәвалед хԝәйә ԛәйька дьнда дькьрьн, кӧ бен али ԝан бькьн. У әԝана һатьн һәр дӧ ԛәйьк жи тʼьжи кьрьн, һьндьк мабу нӧԛ буна.

⁸ Гава Шьмһʼун-Пәтрус әв йәк дит, хԝә авитә чоке Иса у гот: «Хӧдан, дури мьн һәрʼә, әз йәки гӧнәкʼар ьм».

⁹ Чьмки бона ԝан мәʼсийед гьрти хофе ԝи у һʼәмуйед перʼа гьртьбу,

¹⁰ ӧса жи Аԛуб у Йуһʼәннайе кӧрʼед Зәбәди, кӧ һәвалед Шьмһʼун бун. У Иса Шьмһʼунрʼа гот: «Нәтьрсә! Жь вьр шунда те мәрьва мина мәʼсийа бьгьри».

¹¹ У ԛәйьк дәрхьстьнә бәже, һәр тьшт һьштьн пәй Ԝи чун.

Иса йәки жь кʼотибуне паԛьж дькә

¹² Гава Иса бажарәкида бу, ль ԝьр мәрьвәки сәрдапеда кʼоти һәбу. Чахе әԝи Иса дит, хԝә дәвәрʼуйа авит же лава кьр у гот: «Хӧдан! Һәгәр бьхԝази, Тӧ дькари мьн паԛьж ки».

¹³ У Иса дәсте Хԝә дьреж кьре, ле кʼәт у гот: «Әз дьхԝазьм. Паԛьж бә!» У дәстхԝәда кʼотибун же чу.

¹⁴ Иса тʼәми да ԝи, кӧ ве йәке кәсирʼа нәбежә, ле гот: «Һәрʼә хԝә нишани кʼаһин кә у чаԝа Муса тʼәми дайә, һʼәдийа паԛьжбуна хԝә бьдә, ԝәки һʼәмуйарʼа бьбә шәʼдәти, кӧ тӧ паԛьж буйи».

¹⁵ Нав у дәнге Иса һе бәла дьбу у пʼьрʼ әʼлаләт дьщьвийа кӧ гӧһдарийа Ԝи бькьн у жь нәхԝәшийед хԝә ԛәнщ бьн.

¹⁶ Ле Әԝи Хԝә ль щийе хәԝлә дьгьрт у дӧа дькьр.

Иса шьлушәʼтәки ԛәнщ дькә у гӧнед ԝи дьбахшинә

¹⁷ Рʼожәке чахе Әԝи һин дькьр, ферьси у дәрсдаред Ԛануне жи рʼуньштьбун, кӧ жь һʼәму гӧндед Щәлиле, Щьһустане у жь Оршәлиме һатьбун. Ԛәԝата Хӧдан һазьр бу, ԝәки Иса нәхԝәшед ԝан ԛәнщ бькә.

¹⁸ Ԝе дәме чәнд мәрийа йәки шьлушәʼт ньвинева анин у дьхԝәстьн әԝ бьбьрана һьндӧрʼ у ль бәр Иса данина.

¹⁹ У гава ԝана жь дәст әʼлаләта гьран тʼӧ рʼе нәдитьн кӧ ԝи биньнә һьндӧрʼ, рʼабунә сәр хени, кʼәрмид вәкьрьн, ньвинева дахьстьнә нава мале, ль бәр Иса.

²⁰ Гава Әԝи баԝәрийа ԝан дит, готә йе шьлушәʼт: «Әʼвдо, гӧнед тә һатьнә бахшандьне».

²¹ Ԛанунзан у ферьсийа дәстпекьр фькьрин у һәврʼа готьн: «Әв кʼи йә аһа Хԝәде беһӧрмәт дькә? Пештьри Хԝәде кʼи дькарә гӧна бьбахшинә?»

²² Фькьред ԝан Исава әʼйан бун у ль ԝан вәгәрʼанд гот: «Һун чь дьле хԝәда дьфькьрьн?

²³ Кʼижан рʼьһʼәт те готьне: ‹Гӧнед тә һатьнә бахшандьне›, йан: ‹Рʼабә у бьгәрʼә?›

²⁴ Ле ԝәки һун бьзаньбьн кӧ һʼӧкӧме Кӧрʼе Мерьв һәйә ль сәр дьне гӧна бьбахшинә», готә йе шьлушәʼт: «Әз тәрʼа дьбежьм, рʼабә ньвина хԝә һьлдә һәрʼә мала хԝә».

²⁵ Әԝ жи бәр чʼәʼве ԝан перʼа-перʼа рʼабу у ньвина кӧ ль сәр пʼалдайи бу һьлда чу мала хԝә у шькьри дьда Хԝәде.

²⁶ Һʼәму һʼәйр-һʼӧжмәкʼар ман у шькьри дьданә Хԝәде, бь хофа мәзьн дьготьн: «Иро мә тьштед нәбуйи дитьн».

Иса гази Леԝи дькә

²⁷ Пәй ԝе йәкерʼа Иса дәркʼәт, ль щийе хәрщһьлдане хәрщгьрәки рʼуньшти дит кӧ наве ԝи Леԝи бу у готе: «Пәй Мьн ԝәрә».

²⁸ Әԝи жи һәр тьшт һьшт, рʼабу пәй Ԝи чу.

²⁹ Леԝи мала хԝәда һӧрмәтәкә мәзьн жерʼа кьр. Тʼәви ԝан гәләк хәрщгьр у һьнәкед майин жи ль сәр сьфре рʼуньштьбун.

³⁰ Ферьсийа у ԛанунзанед ԝан бина хԝә тәнг кьрьн у шагьртед Ԝирʼа готьн: «Чьма һун тʼәви хәрщгьр у гӧнәкʼара дьхԝьн у вәдьхԝьн?»

³¹ Иса ль ԝан вәгәрʼанд у гот: «Сахләм нә һʼәԝще һʼәким ьн, ле нәхԝәш.

³² Әз нәһатьмә гази йед рʼаст кьм, ле гази гӧнәкʼара бона тʼобәйийе».

Пьрса рʼожигьртьне

³³ Ԝана жь Иса пьрси: «Чьма шагьртед Йуһʼәнна у ӧса жи йед ферьсийа тʼьме рʼожи дьгьрьн у дӧа дькьн, ле шагьртед Тә дьхԝьн у вәдьхԝьн?»

³⁴ Әԝи жи готә ԝан: «Һун дькарьн бежьнә хԝәндийед дәʼԝате: ‹Рʼожи бьгьрьн›, һʼәта кӧ зәʼва тʼәви ԝан ә?

³⁵ Ле рʼоже бен, гава зәʼва жь ԝан бе һьлдане, һьнге ԝан рʼожада ԝе рʼожи бьгьрьн».

³⁶ Әԝи мәсәләк жи ԝанрʼа гот: «Кәсәк жь пʼарчʼе ну набьрʼә у кʼьнща кәвьн пʼинә накә. Һәгәр ӧса бькә, һьн пʼарчʼе ну дьԛәлешә, һьн жи кәвьн у ну ль һәв накьн.

³⁷ У нә жи кәсәк шәрава ну дькә мәшкед кәвьн. Һәгәр ӧса бькә, шәрава ну ԝе мәшка бьтʼәԛинә у бьрʼьжә, мәшке жи хьраб бьн.

³⁸ Ле гәрәке шәрава ну бькьнә мәшкед ну.

³⁹ У кәсәк пәй шәрава кәвьнрʼа нахԝазә йа ну вәхԝә, чьмки йа кәвьн һе ле хԝәш те».