Lûqa 22 - Пәймана Ну (Инщил)

Шеԝьра кӧштьна Иса

¹ Щәжьна Нане Шкәва незик бу, йа кӧ жерʼа Щәжьна Дәрбазбуне дьбежьн.

² Сәрәкед кʼаһина у ԛанунзана мәщаләке дьгәрʼийан кӧ Ԝи бькӧжьн, чьмки жь щьмәʼте дьтьрсийан.

³ Һьнге мирещьн кʼәтә ԛәлпе дьле Щьһудайе кӧ Исхәрйоти дьһатә готьне, әԝ йәк жь ԝан һәр донздәһа бу.

⁴ Әва рʼабу чу тʼәви сәрәкед кʼаһина у сәрԝеред нобәдаред пʼарьстгәһе, ԝанрʼа хәбәр да, ԝәки Иса бьдә дәсте ԝан.

⁵ Әвана ша бун у ԝирʼа ԛайл бун, кӧ пʼәра бьдьнә ԝи.

⁶ Щьһуда рʼази бу у һьлда сәр хԝә, кӧ мәщале бьбинә Әԝи бь дьзи щьмәʼтева бьдә дәсте ԝан.

Тʼьвдарәкдитьна шива Щәжьна Дәрбазбуне

⁷ Рʼожа Щәжьна Нане Шкәва һат, кӧ әʼдәт бу бәрхе ԛӧрбана Щәжьна Дәрбазбуне бьһата сәржекьрьне.

⁸ Иса Пәтрус у Йуһʼәнна шандьн у гот: «Һәрʼьн Шива Щәжьна Дәрбазбуне мәрʼа һазьр кьн, ԝәки әм бьхԝьн».

⁹ Ԝана же пьрси: «Тӧ ль кʼӧ дьхԝази кӧ әм һазьр кьн?»

¹⁰ Әԝи жи ԝанарʼа гот: «Гава кӧ һун бькʼәвьнә бажер, ва мәрьвәке рʼасти ԝә бе, щерʼе аве ль сәр мьла. Пәй ԝи һәрʼьнә ԝе мала кӧ әԝ дьче,

¹¹ у хԝәйе малерʼа бежьн: ‹Дәрсдар тәрʼа дьбежә: Кʼане әԝ ода мевана, йа кӧ Әзе теда тʼәви шагьртед Хԝә шива Щәжьна Дәрбазбуне бьхԝьм?›

¹² Һьнге әԝе ль ԛате жорьн одәкә мәзьнә һәвдайи нишани ԝә кә у ԝьр жи һун һазьр кьн».

¹³ Әԝана чун, чаԝа кӧ ԝанарʼа готьбу ӧса жи дитьн у шива Щәжьна Дәрбазбуне һазьр кьрьн.

Шива Хӧдан

¹⁴ У гава ԝәхт перʼа гьһишт, Әԝ бь тʼәви шандийа ль сәр сьфре рʼуньшт

¹⁵ у ԝанрʼа гот: «Әз гәләки һʼьзрәта ве Шива Щәжьна Дәрбазбуне бум, кӧ Мьн тʼәви ԝә бәри щәфе Хԝә бьхԝара.

¹⁶ Чьмки Әз ԝәрʼа дьбежьм, Әз иди жь ве тʼӧ щар нахԝьм, һʼәта кӧ Пʼадшатийа Хԝәдеда бьбә».

¹⁷ У кʼас һьлда, шькьрийа Хԝә жь Хԝәде ани у гот: «Һьлдьн әве у нав хԝәда бәла кьн.

¹⁸ Әз ԝәрʼа дьбежьм, ԝәки Әз иди тʼӧ щар жь мәйа тьрийе вәнахԝьм, һʼәта кӧ Пʼадшатийа Хԝәде бе».

¹⁹ У нан һьлда шькьри да, кәркьр да ԝан у гот: «Әва бәдәна Мьн ә, кӧ бона ԝә те дайине. Ве йәке бона биранина Мьн бькьн».

²⁰ Ӧса жи кʼас пәй шиверʼа һьлда у гот: «Әва кʼаса пәймана ну йә, пе хуна Мьн гьредайи, кӧ бона ԝә те рʼетьне.

²¹ Ле ва дәсте йе кӧ нәмамийа Мьн бькә, ль сәр ве сьфре тʼәви Мьн ә.

²² Рʼаст Кӧрʼе Мерьв ԝе ӧса һәрʼә, чаԝа кӧ бона Ԝи ньвисар ә, ле ԝәй ль ԝи мәрьви, кӧ ԝе нәмамийа Кӧрʼе Мерьв бькә».

²³ У ԝана дәстпекьр нав һәвда жь һәв пьрсин: «Гәло кʼи йә әԝи нав мәда, кӧ ве йәке ԝе бькә?»

Дәʼԝа бона мәзьнайийе

²⁴ У нав ԝанда дәʼԝ пешда һат, кӧ жь нав ԝанда кʼижан ԝе йе һәри мәзьн бе һʼәсабе.

²⁵ Иса ԝанрʼа гот: «Пʼадшайед мьләта щьмәʼта хԝә бьндәст дькьн у әԝед сәр ԝан һʼӧкӧм дькьн херхԝазед ԝан тенә готьне.

²⁶ Ле һун ӧса нәбьн, йе нав ԝәдайи һәри мәзьн, бьра бьбә мина йе һәри бьчʼук у бьра йе сәрԝертийе дькә жи бьбә мина йе хӧламтийе дькә.

²⁷ Ньһа кʼи йә мәзьн, йе ль сьфре рʼуньшти йан бәрдәсти? Нә йе ль сьфре рʼуньшти? У Әз нава ԝәда мина бәрдәстики мә.

²⁸ Һун ьн, йед кӧ нава щерʼьбандьнед Мьнда һʼәта ньһа тʼәви Мьн манә.

²⁹ У Әзе Пʼадшатийе бьдьмә ԝә, чаԝа Баве Мьн әԝ да Мьн,

³⁰ ԝәки һун Пʼадшатийа Мьнда жь сьфра Мьн бьхԝьн у вәхԝьн у сәр кʼӧрсийа рʼунен, диԝана донздәһ ԛәбилед Исраеле бькьн.

Иса дәрһәԛа инкʼарийа Шьмһʼун-Пәтрусда дьбежә

³¹ Шьмһʼун! Шьмһʼун! Ва йә мирещьн хԝәст ԝәки ԝә мина гәньм бежьнге хә.

³² Ле Мьн бона тә дӧа кьр, ԝәки баԝәрийа тә кем нәбә у гава тӧ вәгәрʼи, дьл бьди бәр бьрайед хԝә».

³³ У Пәтрус Ԝирʼа гот: «Хӧдан, әз һазьр ьм тʼәви Тә бемә гьртьне у кӧштьне жи».

³⁴ Иса ԝирʼа гот: «Пәтрус! Әз тәрʼа дьбежьм, иро һе бәри бангдана дик, те се щара бежи, ԝәки тӧ Мьн нас наки».

Дәрһәԛа тәнгасийа мәзьнда

³⁵ У Иса ԝанрʼа гот: «Гава Мьн һун бе кʼиськ, турьк у чарьх шандьн, һун һʼәԝще тьштәки бун?» Ԝана гот: «На».

³⁶ Һьнге гот: «Ле ньһа кʼиське кʼе һәйә бьра һьлдә у ӧса жи турьк. У йе кӧ бе шур ә, бьра кʼьнще хԝә бьфьрошә у хԝәрʼа шурәки бькʼьрʼә.

³⁷ Ле Әз ԝәрʼа дьбежьм, кӧ гәрәке әва ньвисара сәр Мьн бе сери, кӧ: ‹Әԝ тʼәви нәрʼаста һатә һʼәсабе›. У чь кӧ бона Мьн ньвисар ә, сәр ԛәԝьмандьне йә».

³⁸ Шагьрта Ԝирʼа гот: «Хӧдан, ва нә вьра дӧ шур һәнә». Әԝи ԝанрʼа гот: «Бәс ә».

Иса сәре чʼийайе Зәйтʼуне дӧа дькә

³⁹ У Иса ль гора әʼдәте Хԝә рʼабу чу чʼийайе Зәйтʼуне, шагьртед Ԝи жи ль пәй чун.

⁴⁰ У гава гьһиштә щи, ԝанрʼа гот: «Дӧа бькьн, кӧ һун нәкʼәвьнә нава щерʼьбандьне».

⁴¹ У Хԝәха ԛаси кәвьравитьнәке жь ԝан дур кʼәт, чок да дӧа кьр

⁴² у гот: «Баво, һәгәр әʼмьре Тә йә, әве кʼасе жь Мьн дур хә. Ле бьра хԝәстьна Тә бә, нә кӧ йа Мьн».

⁴³ У жь әʼзмен мьлйакʼәтәк Ԝива хӧйа бу у Әԝ ԛәԝат кьр.

⁴⁴ Әԝи нава щәфе гьранда, һе бь дьле кʼәл дӧа дькьр. Худана Ԝи мина дьлопед хунейә гьр дьрʼьжийанә әʼрде.

⁴⁵ У жь дӧа рʼабу, һатә щәм шагьртед Хԝә, әԝана кʼәрба кʼәдәре рʼазайи дитьн.

⁴⁶ У ԝанрʼа гот: «Һун чьма рʼадьзен? Рʼабьн дӧа бькьн, кӧ нәкʼәвьнә нава щерʼьбандьне».

Гьртьна Иса

⁴⁷ Әԝи һе хәбәр дьда, ньшкева әʼлаләтәке сәр Ԝида гьрт у йәки жь һәр донздәһа, наве ԝи Щьһуда, пешийа ԝан кʼәтьбу у незики Ԝи бу кӧ Ԝи рʼамусә.

⁴⁸ Иса ԝирʼа гот: «Щьһуда! Тӧ бь рʼамусане Кӧрʼе Мерьв дьди дәсте ԝан?»

⁴⁹ Гава әԝед тʼәви Ԝи дитьн кӧ ԝе чь бьԛәԝьмә, Ԝирʼа готьн: «Хӧдан, әм бь шур ль ԝан хьн?»

⁵⁰ У жь ԝан йәки бь шур ль хӧламе сәрәккʼаһин хьст у гӧһе ԝийи рʼасте пәканд.

⁵¹ Һьнге Иса гот: «Бәс ә, бьһельн». У дәст да гӧһе ԝи, ԛәнщ кьр.

⁵² Паше Иса готә сәрәкед кʼаһина, сәрԝеред нобәдаред пʼарьстгәһе у рʼуспийед кӧ һатьбунә сәр Ԝи: «Те бежи һун бь шур у дара һатьнә пешийа ԛачахәки?

⁵³ Нә Әз һәр гав тʼәви ԝә пʼарьстгәһеда бум, ԝә дәсте хԝә нә дьда Мьн. Ле ньһа ԝәхте ԝә йә у һʼӧкӧме тәʼристанийе йә».

Пәтрус Иса инкʼар дькә

⁵⁴ У Әԝ гьртьн, бьрьн кьрьнә мала сәрәккʼаһин. Пәтрус жи дурва пʼе-пʼе ль пәй Ԝи дьчу.

⁵⁵ Гава ԝана говәка һʼәԝшеда агьр вехьст у доре рʼуньштьн, Пәтрус жи ль ԝьр тʼәви ԝан рʼуньшт.

⁵⁶ У щарике әԝ ль бәр агьр рʼуньшти дит, ль ԝи ньһерʼи у гот: «Әва жи тʼәви Ԝи бу».

⁵⁷ Ле Пәтрус инкʼар кьр у готе: «Әз Ԝи нас накьм, әʼвде!»

⁵⁸ Хеләке шунда йәки дьн әԝ дит у гот: «Тӧ жи жь ԝан и». Пәтрус ԝирʼа гот: «Пьсмам, әз нә жь ԝан ьм».

⁵⁹ У ԝәкә сьһʼәтәке жи дәрбаз бу, йәки дьн жи дьда зора хԝә у дьготе: «Һәбә-тʼӧнәбә әва мәрьва тʼәви Ԝи бу, чьмки жь Щәлиле йә».

⁶⁰ Ле Пәтрус гот: «Фьлан кәс! Әз ньзаньм тӧ чь дьбежи». У хәбәр һе девда бу, дәстхԝәда дик банг да.

⁶¹ Хӧдан сәр Пәтрусда вәгәрʼийа ль ԝи ньһерʼи, һьнге Пәтрус готьна Хӧдан ани бира хԝә, кӧ ԝирʼа готьбу: «Иро һе бәри бангдана дик, те се щара Мьн инкʼар ки».

⁶² У Пәтрус дәркʼәтә дәрва кʼәлә-кʼәл гьрийа.

Иса дьбә пекʼәни у те кʼӧтане

⁶³ У әԝед кӧ нобәдари ль Иса дькьрьн, ԛәрфе хԝә ль Ԝи дькьрьн, дькʼӧтан.

⁶⁴ Чʼәʼвед Ԝи гьредан у жь Ԝи дьпьрсин, дьготьн: «Дә пʼехәмбәртийе бькә, кʼа кʼи бу кӧ Тә хьст?»

⁶⁵ У бь гәләк готьнед майин жи Әԝ беһӧрмәт дькьрьн.

Иса ль бәр щьвина гьрәгьра

⁶⁶ У гава сьбәһ зәлал бу, кʼома рʼуспийед щьмәʼте, сәрәкед кʼаһина у ԛанунзана щьвийан. Иса кʼаши диԝанхана хԝә кьрьн

⁶⁷ у готьне: «Һәгәр Тӧ йи Мәсиһ, мәрʼа бежә?» Иса ԝанрʼа гот: «Һәгәр Әз ԝәрʼа бежьм жи, йәк ә һун диса баԝәр накьн.

⁶⁸ У һәгәр пьрсәке жи бьдьмә ԝә, һуне диса щаба Мьн надьн.

⁶⁹ Жь вьр шунда Кӧрʼе Мерьв ԝе ль кʼеләка Хԝәдейе Һәри Зор, ль мьле Ԝийи рʼасте рʼуне».

⁷⁰ У һʼәмуйа бь һәврʼа гот: «Ԝәки ӧса йә Тӧ Кӧрʼе Хԝәде йи?» Әԝи ԝанрʼа гот: «Һун хԝәха дьбежьн кӧ Әз Әԝ ьм».

⁷¹ У ԝана гот: «Иди шәʼдә чи мәрʼа нә? Мә хԝәха жь дәве Ԝи бьһист».