Lûqa 21 - Пәймана Ну (Инщил)

Дийарийа жьнәбийа бәләнгаз

¹ Иса дина Хԝә дайе у дит кӧ дәԝләтийа һʼәдийед хԝә давитьнә пʼәрәданга пʼарьстгәһе.

² Әԝи бәләнгазәкә жьнәби жи дит кӧ дӧ пол авитә ԝьр

³ у Иса гот: «Әз рʼаст ԝәрʼа дьбежьм, кӧ әве жьнәбийа бәләнгаз жь ван һʼәмуйа зәʼфтьр авите.

⁴ Чьмки ԝан һʼәмуйа жь бәрмайийед хԝә авитьнә нава һʼәдийа, ле әве ве бәләнгазийа хԝәда һʼәму тьште кӧ ԝе пе әʼбуре хԝә бькьра авите».

Иса пешда дәрһәԛа ԝеранбуна пʼарьстгәһеда дьбежә

⁵ У чахе һьнәка бона пʼарьстгәһе дьготьн, кӧ бь кәвьре бәдәԝ у пʼешкʼеша һатийә хәмьландьне, Әԝи гот:

⁶ «Ван һʼәму тьштед кӧ һун дьбиньн, рʼоже бен кәвьре ль сәр кәвьр нәминә, һʼәмуйе жи ԝеран бьн!»

Тәнгаси у зерандьн

⁷ У жь Ԝи пьрсин готьне: «Дәрсдар, әв тьшт ԝе кʼәнге бьԛәԝьмьн? У чь нишане бьбә, гава әв йәк бьԛәԝьмьн?»

⁸ Әԝи гот: «Һаш жь хԝә һәбьн, кӧ һун нәйенә хапандьне, чьмки гәләк ԝе пе наве Мьн бен у бежьн: ‹Әз ьм Мәсиһ› у: ‹Әԝ ԝәхт незик ә›, пәй ԝан нәчьн.

⁹ Гава һун бона шәрʼ у дәʼԝа бьбьһен, нәтьрсьн, чьмки гәрәке пешийе әв тьшт бьԛәԝьмьн, ле ахьрийа дьне нә һьнге йә».

¹⁰ Һьнге ԝанрʼа гот: «Мьләте рʼабә ль сәр мьләт, пʼадшати ль сәр пʼадшатийа,

¹¹ щи-щийа әʼрдһʼәжед мәзьн, хәлайи-щәлайе у мина нәхԝәшийа һʼал ԝе бьбьн, ль әʼзмен жи тьштед хоф у тьрс у нишанед мәзьн ԝе бьԛәԝьмьн.

¹² Ле бәри ван һʼәму тьшта, ԝе дәст бавежьнә ԝә, ԝә бьзериньн, бьбьнә бәр диԝана кʼьништа у бькьнә кәла. Бона наве Мьн ԝе ԝә бьбьнә бәр пʼадша у ԝәлийа.

¹³ Әве ԝәрʼа бьбә мәʼни, кӧ һун бона Мьн шәʼдәтийе бьдьн.

¹⁴ У аԝа ве йәке бькьнә бира хԝә, кӧ пешда хәм нәкьн һуне чь щаба хԝә бьдьн.

¹⁵ Чьмки Әзе зар-зьман у сәрԝахтийе бьдьмә ԝә, кӧ дьжмьнед ԝәйе нькарьбьн ль бәр ԝә хәбәр дьн йан бьсәкьньн.

¹⁶ Де у бавед ԝә, бьра-пьсмам у достед ԝә ԝе ԝә бьдьнә гьртьне у жь ԝә һьнәка жи ԝе бькӧжьн.

¹⁷ Бона наве Мьн һуне бәр чʼәʼве һʼәмуйа рʼәш бьн.

¹⁸ Ле тʼӧ муке жь сәре ԝә кем нәбә.

¹⁹ Бь сәбьра хԝә һуне рʼӧһʼе хԝә хьлаз кьн.

Иса дәрһәԛа ԝеранбуна Оршәлимеда хәбәр дьдә

²⁰ Ле гава һун бьбиньн кӧ ордийа дора Оршәлиме гьртийә, һьнге бьзаньбьн кӧ ԝеранбуна ԝе незик ә.

²¹ Һьнге әԝед кӧ Щьһустанеда нә, бьра бьрʼәвьнә чʼийа у әԝед кӧ Оршәлимеда нә, бьра дәрен, әԝед кʼәԝшенда нә, бьра нәкʼәвьнә бажер.

²² Чьмки әԝ рʼож, рʼожед һʼәйфһьлдане нә, ԝәки һәр чь кӧ һатийә ньвисаре бе сери.

²³ Ле ԝәй ль һʼәмла у дәстдәргуша ԝан рʼожада, чьмки тәнгасикә мәзьн ԝе бе сәре дьне у хәзәб әве щьмәʼтерʼа.

²⁴ Әԝе бь дәве шур бькʼәвьн у нав һʼәму мьләтада һесир бенә бьрьне. Оршәлиме жи бәр пʼийед мьләтед пʼутпʼарьст һәрʼә, һʼәта кӧ ԝәхте ԝан мьләта хьлаз бә.

Һатьна Кӧрʼе Мерьв

²⁵ У сәр рʼойе, һиве у стәйрка нишане бьбьн. Ль сәр дьне жи мьләте жь дәст дәнге хӧшинийа пелед бәʼре бьбьздьн у хԝә ӧнда кьн.

²⁶ Дьле мәрьва жи жь тьрса ԝе бьсәкьнә, бона әԝ тьштед кӧ ԝе бенә сәре тʼәмамийа дьне, чьмки тʼопед әʼзмана ԝе жь рʼийед хԝә дәрен.

²⁷ У һьнге ԝе бьбиньн кӧ ‹Кӧрʼе Мерьв әʼԝрава бь ԛәԝат у рʼумәта мәзьн те›.

²⁸ Гава әв тьшт дәстпебьбьн, һун рʼабьн сәре хԝә бьльнд кьн, чьмки азабуна ԝә иди незик ә».

Дәрса дара һежире

²⁹ У мәсәләк ԝанрʼа гот: «Һун дина хԝә бьдьнә дара һежире у һʼәму дара.

³⁰ Гава дьбьшкьвьн, һун бь ԝе йәке заньн кӧ һавин незик ә.

³¹ Ӧса жи гава һун бьбиньн кӧ әв йәк дьԛәԝьмьн, бьзаньбьн кӧ Пʼадшатийа Хԝәде незик ә.

³² Әз рʼаст ԝәрʼа дьбежьм, кӧ әва ньсьла дәрбаз набә, һʼәта кӧ әв һʼәму тьшт нәԛәԝьмьн.

³³ Әʼрд у әʼзмане дәрбаз бьн, ле готьнед Мьн тʼӧ щар дәрбаз набьн.

Рʼанәзен

³⁴ Мьԛати хԝә бьн, нәбә кӧ дьле ԝә пʼьрʼхӧрийе, сәрхԝәшийе у хәмед ве дьнйайева гьредайи бә, ньшкева әԝ Рʼож сәр ԝәда бе.

³⁵ Чьмки әԝ рʼоже мина тʼәле бе сәре һʼәму мәрьвед ль сәр дьне.

³⁶ Һʼьшйар бьминьн у һәр гав дӧа бькьн, ԝәки һун бькарьбьн жь ԝан һʼәму тьштед кӧ ԝе бьԛәԝьмьн бьрʼәвьн-хьлаз бьн у ль бәр Кӧрʼе Мерьв рʼуспи бьсәкьньн».

³⁷ Иса рʼоже пʼарьстгәһеда һин дькьр, ле шәве дьчу сәре ԝи чʼийайи дьма, кӧ жерʼа дьготьн чʼийайе Зәйтʼуне.

³⁸ У тʼәмамийа щьмәʼте сьбәһе зу дьчу пʼарьстгәһе щәм Ԝи, кӧ хәбәред Ԝи бьбьһен.