Lûqa 2 - Пәймана Ну (Инщил)

Буйина Иса

¹ Ԝан рʼожада жь Аԝгустойе Ԛәйсәр әʼмьр дәркʼәт, кӧ һʼәму мәрьвед Императорийа Рʼомайе бенә навньвисаре.

² Әв навньвисара пешьн һена Куренйойе ԝәлийе Сурйайеда һатә кьрьне.

³ Һʼәму дьчунә бажаре хԝә, кӧ һәр кәс наве хԝә бьдә ньвисаре.

⁴ Усьв жи жь бажаре Ньсрәта Щәлиле рʼабу һәвраз чу Щьһустане, бажаре буйина Даԝьд, кӧ жерʼа Бәйтләһʼм дьготьн, чьмки әԝ жь мал у ԛәбила Даԝьд бу.

⁵ Әԝ чу кӧ тʼәви Мәрйәма дәргистийа хԝә бькʼәвә навньвисаре. Мәрйәм жи һʼәмлә бу.

⁶ Чахе әԝана ль Бәйтләһʼме бун, рʼожа ԝәльдандьна ԝе перʼа гьһишт

⁷ у кӧрʼе хԝәйи Ньхӧри ани, Әԝ пʼечʼәкеда пʼечʼа у афьрʼда дани, чьмки меванханеда бона ԝан щи тʼӧнәбу.

Мьлйакʼәт у шьван

⁸ Ль ԝьр чоле шьван һәбун, кӧ ԝе шәве хԝәйитийа кәрийе пәзед хԝә дькьрьн.

⁹ Мьлйакʼәте Хӧдан ԝанва хӧйа бу у рʼумәта Хӧдан дора ԝан шәԝԛ да, әԝ гәләки тьрсийан.

¹⁰ Ле мьлйакʼәт ԝанарʼа гот: «Нәтьрсьн! Ва йә әз Мьзгинийа шабунәкә мәзьн дьдьмә ԝә, кӧ ԝе бона тʼәмамийа мьләт бә.

¹¹ Иро ԝәрʼа бажаре Даԝьдда Хьлазкьрәк бу, әԝ Мәсиһ Хӧдан ә.

¹² Әва ԝәрʼа бьбә нишан: Һуне зарʼокәке пʼечʼәкеда пʼечʼайи афьрʼда бьбиньн».

¹³ Ньшкева тʼәви ԝи ордикә мьлйакʼәтед әʼзманайә мәзьн кʼьфш бу, пәсьне Хԝәде дьдан у дьготьн:

¹⁴ «Шькьр Хԝәдейе Һәри Жорьнрʼа, әʼдьлайи сәр дьне ԝан мәрьварʼа, жь кʼижана Хԝәде рʼази йә».

¹⁵ Гава мьлйакʼәт жь ԝан дур кʼәтьн һьлатьнә әʼзмен, шьвана һәврʼа гот: «Дә ԝәрьн әм һәрʼьнә Бәйтләһʼме, әв тьште буйи, кӧ Хӧдан әм пе һʼәсандьн, бьбиньн».

¹⁶ У бь ләз һатьн, Мәрйәм, Усьв у Зарʼа афьрʼда рʼазайи дитьн.

¹⁷ Гава Әԝ дитьн, чь кӧ бона Кӧрʼьк ԝанрʼа һатьбу әʼламкьрьне, готьн.

¹⁸ Һәр кәсе кӧ жь шьвана әв тьшт дьбьһистьн, зәндәгьрти дьман.

¹⁹ Ле Мәрйәме әв һʼәму тьшт дьле хԝәда хԝәй дькьрьн у ль сәр ԝан дьфькьри.

²⁰ Шьван вәгәрʼийан, бона тьштед бьһисти у дити пәсьн у шькьри дьданә Хԝәде. Әв һʼәму ӧса бун чаԝа ԝанарʼа һатьбу готьне.

Навданина Иса

²¹ Рʼожа һʼәйшта гава кӧрʼьк сьнәт кьрьн, наве Ԝи Иса данин, чаԝа кӧ һе бәри һʼәмләбуна де, мьлйакʼәт бона ве йәке готьбу.

Иса дьбьнә пʼарьстгәһе, кӧ пʼешкʼеши Хԝәде кьн

²² Чахе анәгори Ԛануна Муса рʼожед паԛьжбуна ԝан тʼәмам бун, кӧрʼьк бьрьнә Оршәлиме, кӧ Ԝи пʼешкʼеши Хӧдан кьн,

²³ чаԝа кӧ Ԛануна Хӧданда ньвисар ә: «Һәр ньхӧрики нерин кӧ бәтʼьне вәдькә, нәдьре Хӧдан бә»

²⁴ у ль гора готьна Ԛануна Хӧдан: «Щотәк фатьмок йан жи дӧ щущукед кәвотка» һʼәди бе дайине.

²⁵ Һьнге мәрьвәк Оршәлимеда һәбу, наве ԝи Шьмһʼун бу. Әԝ мәрьвәки рʼаст, хԝәдехоф у ль һивийа бәрдьлийа Исраеле бу. Рʼӧһʼе Пироз жи ль сәр ԝи бу

²⁶ у ԝирʼа готьбу: «Һʼәта кӧ тӧ Мәсиһе Хӧдан нәбини, намьри».

²⁷ Һьнге әԝ бь рʼебәрийа Рʼӧһʼ һатә пʼарьстгәһе. Чахе де у бавева Исайе бьчʼук анин кӧ ль гора әʼдәте Ԛануне бона Ԝи бькьн,

²⁸ Шьмһʼун Кӧрʼьк һьлда да һʼәмеза хԝә, шькьри да Хԝәде у гот:

²⁹ «Йа Хԝәйи, ньһа ль гора созе Хԝә бь хер у сьламәт бәрдәстийе Хԝә бәрʼдә.

³⁰ Чьмки чʼәʼве мьн азакьрьна Тә дит,

³¹ йа кӧ Тә бәр чʼәʼве һʼәму мьләта һазьр кьрийә,

³² кӧ бьбә рʼонайийа бәр чʼәʼве нәщьһуйа у ԛәдьр-һӧрмәт щьмәʼта Тә Исраелрʼа».

³³ Де у баве Ԝи сәр тьштед кӧ Шьмһʼун бона Ԝи дьготьн, зәндәгьрти мабун.

³⁴ Шьмһʼун дӧа ԝан кьр у дийа Ԝи Мәрйәмерʼа гот: «Бьбьһен, Әва әԝи кʼьфшкьри йә, Йе кӧ ԝе Исраеледа бьбә сәбәбе кʼәтьн-рʼабуна гәләка, ӧса жи бьбә нишанәк, кӧ гәләке мьԛабьли Ԝи рʼабьн

³⁵ у бь ви аԝайи фькьред гәләк дьла ԝе әʼйан бьн. У дьле тәрʼа жи мина тирәке ԝе дәрбаз бә».

³⁶ Ль ԝьр жь рʼькʼьнйата Ашер, ԛизәкә Фаноԝелә пʼехәмбәр һәбу, наве ԝе Һана. Әԝе гәләк әʼмьр дәрбаз кьрьбу, пәй ԛизтийа хԝәрʼа һʼәфт сала щәм мере хԝә мабу.

³⁷ Әԝ жьнәбикә һʼәйште чар сали бу у жь пʼарьстгәһе дур нәдькʼәт, шәв у рʼож бь дӧа у рʼожийа Хԝәде дьһʼәбанд.

³⁸ Әва жи ԝе дәме һат, шькьри да Хԝәде у тʼәви һʼәмуйед кӧ чʼәʼвньһерʼийа азабуна Оршәлиме бун, дәрһәԛа кӧрʼькда хәбәр да.

Мәрйәм, Усьв у Исайе бьчʼук вәдьгәрʼьнә Ньсрәте

³⁹ Гава Усьв у Мәрйәме һәр тьшт ль гора Ԛануна Хӧдан кьрьн, вәгәрʼийанә Щәлиле, бажаре хԝә Ньсрәте

⁴⁰ Кӧрʼьк мәзьн у ԛәԝат дьбу, бь сәрԝахтийе тʼьжи дьбу, кʼәрәма Хԝәде жи бь Ԝирʼа бу.

Исайе донздәһ сали пʼарьстгәһеда

⁴¹ Де у баве Ԝи һәр сал Щәжьна Дәрбазбунеда дьчунә Оршәлиме.

⁴² Чахе Әԝ бу донздәһ сали, ль гора әʼдәт әԝана һәвраз чунә щәжьне.

⁴³ Гава рʼожед щәжьне хьлаз бун у пашда вәдьгәрʼийанә мала хԝә, Исайе хьшим ль Оршәлиме ма. Ле де у баве Ԝи һаш жь Ԝи тʼӧнәбун,

⁴⁴ ԝана тʼьре тʼәви рʼеԝийа йә. Рʼийа рʼожәке һатьн, нав һәвал-һогьред хԝәда ль Ԝи гәрʼийан.

⁴⁵ Гава Әԝ нәдитьн, пашда вәгәрʼийанә Оршәлиме, ль Ԝи гәрʼийан.

⁴⁶ Рʼожа сьсийа ԝана Әԝ пʼарьстгәһеда дит. Әԝ тʼәви дәрсдара рʼуньштьбу, гӧһдарийа ԝан дькьр у пьрс дьданә ԝан.

⁴⁷ Һʼәмуйед кӧ хәбәрдана Ԝи дьбьһистьн, сәр занәбун у щабед Ԝи зәндәгьрти дьман.

⁴⁸ Гава де у баве Ԝи әԝ дитьн, һʼәйирин у дийа Ԝи жерʼа гот: «Лаԝо! Тә чьма ӧса сәре мә кьр? Әз у баве тә кʼәл-бин ль Тә дьгәрʼийан».

⁴⁹ Әԝи ԝанрʼа гот: «Һун чьма ль Мьн дьгәрʼийан? Ԝә ньзаньбу гәрәке Әз мала Баве Хԝәда бьм?»

⁵⁰ Ле ԝана фәʼм нәкьр Әԝи чь гот.

⁵¹ Әԝ тʼәви ԝан вәгәрʼийа һатә Ньсрәте у гӧрʼа ԝанда бу. Ле дийа Ԝи әв һʼәму тьшт дьле хԝәда хԝәй дькьрьн.

⁵² У Иса бь сәрԝахтийе у бәжьнеда пешда дьчу у ль Хԝәде у мәрьва хԝәш дьһат.