Lûqa 16 - Пәймана Ну (Инщил)

Ԝәкʼилхәрще беамьн, ле сәрԝахт

¹ Иса шагьртед Хԝәрʼа гот: «Мәрьвәки дәԝләти һәбу, ԝәкʼилхәрщәки ԝи һәбу. Рʼожәке гьли гьһиштә ԝи, йанчийә ԝәкʼилхәрще ԝи һәбука ԝи пʼучʼ дькә.

² Әԝи жи гази ԝи кьр у готе: ‹Әв чь йәк ә кӧ әз бона тә дьбьһем? Һәԛ-һʼәсабе ԝәкʼилхәрщтийа хԝә бьдә, чьмки иди тӧ нькари ԝәкʼилхәрщтийе бьки›.

³ Ԝәкʼилхәрщ дьле хԝәда гот: ‹Әз чь бькьм? Ахайе мьн жь ԝәкʼилхәрщтийе мьн дәрдьхә, әʼрдкʼолан ль мьн набә, жь пʼарскьрьне жи шәрм дькьм.

⁴ Әз заньм әзе ньһа чь бькьм, кӧ малед хԝәда мьн ԛәбул кьн, гава әз жь ԝәкʼилхәрщтийе дәркʼәвьм›.

⁵ Әԝи йәк-йәк гази дәйндаред ахайе хԝә кьр у йе пешьнрʼа гот: ‹Тӧ чьԛаси дәйндаре ахайе мьн и?›

⁶ Әԝи гот: ‹Сәд кʼуп бьзьре зәйтʼуне› у ԝирʼа гот: ‹Һан ньвисара хԝә һьлдә у зу рʼуне бьньвисә пенщи›.

⁷ Паше йе дьнрʼа гот: ‹Тӧ чьԛаси дәйндар и?› Әԝи жи гот: ‹Сәд чʼәʼл гәньм› у ԝирʼа гот: ‹Һан ньвисара хԝә һьлдә у бьньвисә һʼәйште›.

⁸ У аха пәсьне ԝәкʼилхәрще беамьн да, ԝәки әԝи бь аԛьли кьр. Аԝа мәрьвед ве дьне һьндава хԝәда жь мәрьвед рʼонайе сәрԝахттьр ьн.

⁹ Әз ԝәрʼа дьбежьм, һун бь һәбука ве дьне һәвала хԝәрʼа дәст хьн у гава һәбук кем бә, ԝә бьн конед һʼәта-һʼәтайеда ԛәбул кьн.

¹⁰ Әԝе кӧ нава тьштед һьндькида амьн ә, нава тьштед гәләкида жи амьн ә, ле әԝе кӧ нава тьштед һьндькида беамьн ә, нава тьштед гәләкида жи беамьн ә.

¹¹ Һәгәр һун нава һәбука ве дьнеда беамьн бун, кʼе ԝе һәбука рʼаст бьдә ԝә?

¹² Һәгәр һун нав тьште йе хәрибда амьн нибьн, йа ԝә кʼе ԝе бьдә ԝә?

¹³ Хӧламәк нькарә дӧ ахарʼа хӧламтийе бькә, чьмки йан ԝе һʼиле ԝи жь йәки һәрʼә у йе дьне һʼьз бькә, йан жи ԝе ԛәдьре йәки бьгьрә у йе дьне беһӧрмәт кә. Һун нькарьн һьн Хԝәдерʼа, һьн жи һәбукерʼа хӧламтийе бькьн».

Ԛанун у Пʼадшатийа Хԝәде

¹⁴ Гава ферьсийа әв һʼәму тьшт бьһистьн, ԛәрфе хԝә ль Иса дькьрьн, чьмки пʼәрәһʼьз бун.

¹⁵ Иса ԝанрʼа гот: «Һун әԝ ьн йед кӧ хԝә бәр мәрьва рʼаст дьдьнә кʼьфше, ле Хԝәде дьле ԝә занә. Бьзаньбьн кӧ әԝ тьште нав мәрьвада хԝәйиԛәдьр ә, әԝ ль бәр Хԝәде һʼәрам ә.

¹⁶ Зәмане Ԛанун у пʼехәмбәра һʼәта Йуһʼәнна кʼьшанд, жь ԝьр шунда Пʼадшатийа Хԝәде те даннасинкьрьне у һәр кәс дьщәʼдинә бь ԛәԝате бькʼәвә ԝьр.

¹⁷ Ле әʼрд у әʼзмане һе рʼьһʼәт дәрбаз бьн, нә кӧ жь Ԛануне ноктәк ӧнда бә.

¹⁸ Кʼи кӧ жьна хԝә бәрʼдә у йәкә дьн бьстинә, зьнекʼарийе дькә. У кʼи кӧ йа мербәрʼдайи дьстинә, зьнекʼарийе дькә.

Мәрьве дәԝләти у Лазаре фәԛир

¹⁹ Мәрьвәки дәԝләти һәбу, кӧ кʼьнще рʼәԝш у назьк ль хԝә дькьр у һәр рʼож бь әшԛ-ша кʼеф дькьр.

²⁰ Мәрьвәки фәԛир жи һәбу, наве ԝи Лазар. Әԝ нава пʼьзькед пʼисда бәр дәре йе дәԝләти кʼәти бу.

²¹ У чʼәʼве ԝи бәрмайийе сьфра дәԝләтида дьма, кӧ дьхԝәст кӧрме хԝә пе бьшкенанда. Сә жи дьһатьн, бьринед ԝи даластьн.

²² Рʼож һат фәԛир мьр, мьлйакʼәта әԝ бьрьнә щәм Бьраһим. Йе дәԝләти жи мьр, дәфьн кьрьн.

²³ Гава йе дәԝләти дийаре мьрийада щәфа дькʼьшанд, сәре хԝә бьльнд кьр, жь дурва Бьраһим дит у Лазар һʼәмезеда.

²⁴ Әԝи дәнг дайе у готе: ‹Баве Бьраһим, ль мьн ԝәрә рʼәʼме. Лазар бьшинә, кӧ сәре тʼьлийа хԝә аведа кә бинә заре мьн шьл кә, чьмки әз кʼура ви агьрида дьшәԝьтьм›.

²⁵ Ле Бьраһим готе: ‹Лаԝо! Бинә бира хԝә, кӧ тә ԛәнщийед пʼара хԝә нав зәмане әʼмьре хԝәда стандьнә, ле Лазар зәлули кʼьшандийә. Ньһа жи дьле ԝи ль вьр рʼьһʼәт ә, ле тӧ нава щәфада йи.

²⁶ У пештьри ве йәке жи, гәлики бебьни нава мә у ԝәда һәйә. Нә йе вьр дькарьн дәрбази щәм ԝә бьн, нә жи йе ԝьр дькарьн дәрбази щәм мә бьн›.

²⁷ Һьнге әԝи готе: ‹Баво, ԝәки ӧса йә, әз һиви жь тә дькьм, тӧ әԝи бьшинә мала баве мьн,

²⁸ чьмки пенщ бьрайед мьн жи һәнә, бьра һәрʼә тʼәмийе бьдә ԝан, ԝәки әԝ жи нәйенә ви щийе щәфа›.

²⁹ Ле Бьраһим готе: ‹Муса у пʼехәмбәред ԝан һәнә. Бьра гӧһдарийа ԝан бькьн›.

³⁰ Әԝи жи гот: ‹На, баве Бьраһим, һәгәр жь мьрийа йәк һәрʼә щәм ԝан, ԝе жь гӧнәкьрьне вәгәрʼьн›.

³¹ Һьнге Бьраһим ԝирʼа гот: ‹Һәгәр гӧһдарийа Муса у пʼехәмбәра накьн, йәк жь мьрийа рʼабә жи, диса әԝана баԝәр накьн›».