Lûqa 15 - Пәймана Ну (Инщил)

Пәза ӧндабуйи

¹ Аԝа һʼәму хәрщгьр у гӧнәкʼар незики Ԝи дьбун, кӧ гӧһе хԝә бьдана сәр готьнед Ԝи.

² Ле ферьси у ԛанунзана бина хԝә тәнг дькьр у дьготьн: «Әва гӧнәкʼара ԛәбул дькә у тʼәви ԝан нан дьхԝә».

³ У Иса әва мәсәла ԝанрʼа гот:

⁴ «Жь ԝә кʼи йә әԝ мәри, кӧ сәд пәзед ԝи һәбьн у гава йәки жь ԝан ӧнда кә, нод нәһа чол у бәста нәһелә у пәй йа ӧндабуйи нәкʼәвә, һʼәта кӧ ԝе бьбинә?

⁵ У гава бьбинә, ԝе жь шабуна дайнә сәр мьле хԝә,

⁶ вәгәрʼә мале, гази дәр у щинара кә у ԝанрʼа бежә: ‹Тʼәви мьн ша бьн! Мьн пәза хԝәйә ӧндабуйи дит›.

⁷ Әз ԝәрʼа дьбежьм, ӧса жи ль әʼзмен бона гӧнәкʼарәки кӧ тʼобә дькә, һе ԝе бьбә шабунәкә мәзьн, нә кӧ бона нод нәһед рʼаст, кʼижанарʼа тʼобәкьрьн нә һʼәԝщә йә.

Зиве ӧндабуйи

⁸ Йан кʼижан ә әԝ кʼӧлфәта кӧ дәһә зивед ԝе һәбьн у гава йәки жь ԝан ӧнда кә, ԝе чʼьре венәхә, мале гези нәкә у ԛәнщ ле нагәрʼә, һʼәта кӧ зиве хԝә бьбинә?

⁹ У чахе әԝ бьбинә, ԝе гази дәр у щинара кә у ԝанрʼа бежә: ‹Тʼәви мьн ша бьн! Мьн зиве хԝәйи ӧндакьри дит›.

¹⁰ Әз ԝәрʼа дьбежьм, ӧса жи мьлйакʼәтед Хԝәде бона гӧнәкʼарәки кӧ тʼобә дькә, ша дьбьн».

Кӧрʼе ӧндабуйи у бьре ԝи

¹¹ У Иса гот: «Дӧ кӧрʼед мәрьвәки һәбун.

¹² Йе бьчʼук готә баве хԝә: ‹Баво, жь һәбука хԝә чь кӧ пʼара мьн дькʼәвә, бьдә мьн›. У әԝи ԝанарʼа һәбук пʼарәвәкьр.

¹³ Пәй чәнд рʼожарʼа кӧрʼе бьчʼук һәр тьште хԝә тʼоп кьр чу ԝәлатәки дур. Ль ԝьр әԝи әʼмьре толтийе дәрбаз кьр, һʼәму һәбука хԝә пʼучʼ кьр.

¹⁴ У гава тьштәк дестда нәма, ԝи ԝәлатида жи бу хәлайикә мәзьн у әԝ кʼәтә һʼаләки гьран.

¹⁵ Чу хԝә ль бажарванәки ԝи ԝәлати гьрт у әԝи әԝ шандә кʼәԝшен бәр бәраза.

¹⁶ Әԝ һʼәԝщә бу кӧ зьке хԝә бь ԝан хьрнуфед кӧ бәраза дьхԝар тʼер бькьра, ле кәсәки әԝ жи нәдьда ԝи.

¹⁷ Ле гава әԝ сәр һʼьше хԝәда һат, гот: ‹Чьԛас пʼалә мала баве мьнда һәнә, кӧ нан дьхԝьн у бәр ԝан дьминә, ле әз вьра бьрʼчина дьмьрьм.

¹⁸ Әз рʼабьм һәрʼьмә щәм баве хԝә у ԝирʼа бежьм: Баво, мьн бәр тә у әʼзмен гӧнә кьр.

¹⁹ Әз иди нә һежайи кӧрʼтийа тә мә. Тʼәне мина пʼаләки хԝә мьн ԛәбул кә›.

²⁰ У рʼабу һатә щәм баве хԝә. Ле гава һе дурва баве әԝ дит, дьле ԝи сәр шәԝьти, бәрбь ԝи бәзи, әԝ һʼәмез кьр у рʼамуса.

²¹ Кӧрʼ жерʼа гот: ‹Баво, мьн бәр тә у әʼзмен гӧнә кьр. Әз иди нә һежайи кӧрʼтийа тә мә›.

²² Ле баве хӧламед хԝәрʼа гот: ‹Зу бькьн, чӧхе лапи рʼьнд биньн ле кьн, гӧстиле текьнә тʼьлийе у сола жи бькьнә ньга.

²³ Щанәгайе дәрмаликьри биньн, сәржекьн, әм бьхԝьн у ша бьн.

²⁴ Чьмки әв кӧрʼе мьн мьри бу, сах бу, ӧндабуйи бу, һатә дитьне›. У дәст бь шайийе кьрьн.

²⁵ Ԝи чахи кӧрʼе ԝийи мәзьн ль кʼәԝшен бу. Гава һат незики мале бу, дәнге стьран у рʼәԛасе бьһист.

²⁶ Әԝи гази жь хӧлама йәки кьр у же пьрси: ‹Әв чь һʼәԝал ә?›

²⁷ Хӧлем ԝирʼа гот: ‹Бьре тә һатийә, баве тә щанәгайе дәрмаликьри сәржекьрийә, чьмки әԝ сах у сьламәт вәгәрʼийайә›.

²⁸ Бьра һерс кʼәт у нәхԝәст кӧ һәрʼә һьндӧрʼ. Бав дәркʼәтә дәрва, лава ԝи кьр.

²⁹ Әԝи ль баве хԝә вәгәрʼанд у гот: ‹Әва мӧхдаре чәнд сала нә кӧ әз тәрʼа хӧламтийе дькьм у жь гӧрʼа тә ԛәт дәрнәкʼәтьмә, тә ԛәт карәк жи нәдайә мьн кӧ мьн тʼәви һәвал-һогьред хԝә кʼеф бькьра.

³⁰ Ле гава әԝ кӧрʼе тәйи кӧ һәбука тә бьр, тʼәви ԛава пʼучʼ кьр һат, тә бона ԝи щанәгайе дәрмаликьри сәржекьр›.

³¹ Баве жерʼа гот: ‹Лаԝо, тӧ һәр гав тʼәви мьн и у һʼәму һәбука мьн йа тә йә.

³² Гәрәке әм әшԛ у ша буна, чьмки әв бьре тә мьри бу, сах бу у ӧндабуйи бу, һатә дитьне›».