Lûqa 13 - Пәймана Ну (Инщил)

Жь гӧнәкьрьне вәгәрʼьн, кӧ ӧнда нәбьн

¹ Ԝи чахи һьнәк һатьн бона ԝан щәлилийа Исарʼа готьн, хуна кʼижана Пилато тʼәви хуна ԛӧрбанед ԝан кьрьбу.

² Иса ль ԝан вәгәрʼанд у гот: «Ԝә тʼьре әԝ щәлилийед кӧ әв йәк һатә сәре ԝан, жь һʼәму щәлилийед майин гӧнәкʼартьр бун?

³ Әз ԝәрʼа дьбежьм, на! Ле бәле һәгәр һун жь гӧнәкьрьне вәнәгәрʼьн, һун һʼәмуйе жи рʼожа ԝанда һәрʼьн.

⁴ Йан жи әԝ һʼиждәһ мәрьвед кӧ кәла Силԝаме сәр ԝанда кʼәт мьрьн, ԝә тʼьре әԝана жь һʼәму бьнәлийед Оршәлиме гӧнәкʼартьр бун?

⁵ На! Әз ԝәрʼа дьбежьм, һәгәр һун жь гӧнәкьрьне вәнәгәрʼьн, һун һʼәмуйе жи рʼожа ԝанда һәрʼьн».

Мәсәла дара һежирейә бе бәр

⁶ Әԝи әва мәсәла жи гот: «Мәрьвәк һәбу, нава рʼәзе тьрийе ԝида дарәкә һежирейә ньканди һәбу. Рʼожәке әԝ һат, кӧ сәр ԝе бәр бьгәрʼә, ле нәдит.

⁷ Ԝи чахи рʼәзванрʼа гот: ‹Әва мӧхдаре се сала йә әз тем, бәре ве дара һежире дьгәрʼьм, ле набиньм. Әве бьбьрʼә! Бадиһәԝа чьма щи гьртийә?›

⁸ Рʼәзван ле вәгәрʼанд у гот: ‹Аха, исал жи ԝе сәбьр кә. Әзе дора ԝе вәдьм у пʼәйн бькьме.

⁹ Һәгәр саләкә дьн бәр бьдә, ԛәнщ ә, ле һәгәр нәдә, паше бьбьрʼә›».

Рʼожа шәмийе ԛәнщкьрьна кʼӧлфәта ԛонщьки

¹⁰ Рʼожәкә шәмийе Иса кʼьништәкеда һин дькьр.

¹¹ Ль ԝьр кʼӧлфәтәкә ԛонщьки һәбу, кӧ һʼиждәһ салед ԝе бу, рʼӧһʼе нәхԝәшийе перʼа бу. Әԝе ԛәт нькарьбу хԝә рʼаст кьра.

¹² Гава Иса әԝ дит, гази ԝе кьр у готе: «Әʼвде! Тӧ жь нәхԝәшийа хԝә аза йи!»

¹³ У Әԝи дәстед Хԝә данин сәр ԝе, әԝ перʼа-перʼа рʼаст бу у шькьри дьда Хԝәде.

¹⁴ Ле сәрԝере кʼьниште һерс кʼәт, кӧ Иса рʼожа шәмийе нәхԝәш ԛәнщ кьр у әʼлаләтерʼа гот: «Шәш рʼож бона шьхӧлкьрьне һәнә, һун нава ԝан рʼожада дькарьн бен ԛәнщ бьн, нә кӧ рʼожа шәмийе».

¹⁵ Хӧдан ле вәгәрʼанд у готе: «Дӧрʼуно! Жь ԝә кʼижан рʼожа шәмийе гайе хԝә йан кʼәра хԝә жь афьрʼ вәнакә у набә сәр аве?

¹⁶ Нә әва жи ԛиза Бьраһим ә, кӧ әва мӧхдаре һʼиждәһ салед ԝе бун, мирещьн әԝ гьредабу. Нә лазьм бу кӧ әԝ рʼожа шәмийе жь ԝе ԛәйде вәбуйа?»

¹⁷ У гава әв йәк гот, һʼәмуйед кӧ мьԛабьли Ԝи бун шәрми ман. У тʼәмамийа әʼлаләте бона ԝан кʼәрәмәтед Ԝийә рʼумәти кӧ Ԝи дькьрьн ша дьбу.

Дӧ мәсәлед ль сәр Пʼадшатийа Хԝәде

¹⁸ Пәйрʼа Иса гот: «Пʼадшатийа Хԝәде мина чь йә? У Әз ԝе һьмбәри чь кьм?

¹⁹ Әԝ мина һʼәбәкә тʼохьме хәрдале йә, кӧ мәрьвәки һьлда бахче хԝәда чанд. У гава әԝ мәзьн бу, бу дар, тәйрәдед әʼзмен һелинед хԝә сәр чʼьԛьлед ԝе чекьрьн».

²⁰ Әԝи диса гот: «Әз Пʼадшатийа Хԝәде һьмбәри чь кьм?

²¹ Әԝ мина һәвиртьрʼшк ә, кӧ кʼӧлфәтәке һьлда нава се код арда стьра, һʼәта кӧ һʼәму һьлат».

Дәре тәнг

²² Иса гӧнд у бажарарʼа дәрбаз дьбу, һин дькьр у бәрбь Оршәлиме дьчу.

²³ Йәки Ԝирʼа гот: «Хӧдан, гәло һьндьк ьн, әԝед кӧ ԝе хьлаз бьн?» Әԝи ԝанрʼа гот:

²⁴ «Бьщәʼдиньн, кӧ һун дәре тәнгрʼа бькʼәвьнә һьндӧрʼ, чьмки Әз ԝәрʼа дьбежьм, гәләке бьхԝазьн бькʼәвьне у ԝе нькарьбьн.

²⁵ У пәйрʼа, кӧ хԝәйе мале рʼабә дәри бьгьрә, һьнге һуне дәрва бьминьн у дәри хьн бежьн: ‹Әм хӧлам, дәри ль мә вәкә›. Әԝе ль ԝә вәгәрʼинә у бежә: ‹Әз ньзаньм һун жь кʼӧ нә›.

²⁶ Һьнге һуне бежьн: ‹Мә тʼәви Тә хԝар, вәхԝар у Тә кʼучед мәда һин дькьр›.

²⁷ Ле Әԝе бежә: ‹Әз ԝәрʼа дьбежьм, Әз ньзаньм кӧ һун жь кʼӧ нә. Жь Мьн дур кʼәвьн, һун һʼәмуйед кӧ нәһәԛийе дькьн!›

²⁸ Ль ԝьр ԝе бьбә гьри у чʼьркә-чʼьрка дьрана, гава һун Бьраһим, Исһаԛ, Аԛуб у һʼәму пʼехәмбәра Пʼадшатийа Хԝәдеда бьбиньн, хԝә жи дәрва авити.

²⁹ У ԝе жь рʼоһьлат-рʼоавайе у бакӧр-башуре бен, Пʼадшатийа Хԝәдеда сәр сьфре рʼунен.

³⁰ Аԝа бьзаньбьн кӧ һьнәкед паш ԝе бьбьнә пеш у һьнәкед пеш ԝе бьбьнә паш».

Иса ль сәр Оршәлиме дьловинә

³¹ Ԝе дәме чәнд ферьси һатьн у Ԝирʼа готьн: «Рʼабә жь вьр һәрʼә, чьмки Һеродәс дьхԝазә Тә бькӧжә».

³² У Әԝи ԝанрʼа гот: «Һәрʼьн ԝи рʼувийирʼа бежьн: ‹Ва Әз иро, сьбе щьна дәрдьхьм, нәхԝәша ԛәнщ дькьм у рʼожа сьсийа Әзе бьгьһижьмә мәрәме Хԝә›.

³³ Ле гәрәке Әз иро, сьбе, дӧсьбә рʼийа Хԝәда һәрʼьм, чьмки набә кӧ пʼехәмбәрәк жь Оршәлиме дәр ӧнда бә.

³⁴ Оршәлим! Оршәлим! Тӧ кӧ пʼехәмбәра дькӧжи у шандийед щәм хԝә дьди бәр кәвьра. Чәнд щара Мьн хԝәст кӧ зарʼед тә ӧса бьщьванда, чаԝа мьришк щущукед хԝә бьн баскед хԝәда дьщьвинә, ле тә нәхԝәст!

³⁵ Ва мала тә ԝе хьрабә бьминә. Әз ԝәрʼа дьбежьм, иди һун Мьн тʼӧ щар набиньн, һʼәта кӧ һун бежьн: ‹Бьмбарәк ә Әԝе кӧ бь наве Хӧдан те›».