Lûqa 10 - Пәймана Ну (Инщил)

Шандьна һʼәфте дӧ шагьрта

¹ Пәй ве йәкерʼа Хӧдан һʼәфте дӧ шагьртед дьн жи кʼьфш кьрьн у әԝана дӧдӧ-дӧдӧ пешийа Хԝәва шандьнә ԝан щи у бажара, кʼидәре Хԝәха ԝе бьчуйайе

² у ԝанарʼа гот: «Нандьрун гәләк ә, ле пʼалә һьндьк ьн. Аԝа һиви жь Хԝәйе нандьруне бькьн, ԝәки пʼала нандьруна Хԝәрʼа бьшинә.

³ Һәрʼьн, Әз ва ԝә мина бәрха дьшиньмә нава гӧра.

⁴ Хԝәрʼа нә кʼиськ һьлдьн, нә турьк, нә жи чарьха. У рʼева сьлаве нәдьнә тʼӧ кәси,

⁵ чь мала кӧ һун һәрʼьне, пешийе бежьн: ‹Әʼдьлайи ве малерʼа›.

⁶ У һәгәр ль ԝьр мәрьвәки һежайи әʼдьлайийе һәбә, әʼдьлайийа ԝәйе ль сәр ԝи бьминә. Ле һәгәр тʼӧнәбә, ԝе ль ԝә вәгәрʼә.

⁷ У ԝе маледа бьминьн, чь хԝарьне жи бьдьнә ԝә, әԝе жи бьхԝьн у вәхԝьн, чьмки пʼалә һежайи һәԛе хԝә йә. У мал бь мал нәгәрʼьн.

⁸ Кʼижан бажаре кӧ һун һәрʼьне у ԝә ԛәбул кьн, чь дайньнә бәр ԝә, бьхԝьн.

⁹ Нәхԝәшед навда ԛәнщ кьн у ԝанрʼа бежьн: ‹Пʼадшатийа Хԝәде незики ԝә буйә›.

¹⁰ Ле әԝ бажаре кӧ һун һәрʼьне у ԝә ԛәбул нәкьн, дәренә мәйдана у бежьн:

¹¹ ‹Әм ԝе тʼоза кӧ жь бажаре ԝә ньгед мәва гьртийә жи ль сәр ԝәда даԝдьшиньн. Ле ве йәке бьзаньбьн кӧ Пʼадшатийа Хԝәде незики ԝә буйә›.

¹² Әз жь ԝәрʼа дьбежьм, Рʼожа Ахрәте һʼале Содоме ԝе жь йа ԝи бажари четьр бә.

Бажаред нәбаԝәр

¹³ Ԝәй ль тә Хоразин! Ԝәй ль тә Бәйтсайда! Һәгәр әԝ кʼәрәмәтед кӧ нава ԝәда бун, Сур у Сайдайеда бьбуна, әԝанайе зува бь кʼӧрх нав кʼозийеда рʼуньшти тʼобә бькьрана.

¹⁴ Ле Рʼожа Ахрәте һʼале Сур у Сайдайе ԝе жь һʼале ԝә четьр бә.

¹⁵ У тӧ Кәфәрнаһум, тә тʼьре те һʼәта әʼзмен бьльнд би? Ле те һʼәта дийаре мьрийа һәрʼи хԝаре!

¹⁶ Әԝе гӧһдарийа ԝә дькә, гӧһдарийа Мьн дькә у әԝе ԝә тʼәхсир дькә, Мьн тʼәхсир дькә, ле әԝе Мьн тʼәхсир дькә, йе кӧ Әз шандьмә тʼәхсир дькә».

Вәгәрʼандьна һʼәфте дӧда

¹⁷ Әԝ һʼәфте дӧ шагьрт бь әшԛ у ша вәгәрʼийан у готьн: «Хӧдан, щьн жи сайа наве Тә ельми мә дьбун».

¹⁸ Әԝи ԝанарʼа гот: «Мьн мирещьн дит, чаԝа бьруска жь әʼзмен жорда кʼәти.

¹⁹ Аԝа Мьн һʼӧкӧм дайә ԝә, кӧ һун мәʼр у дупʼьшка у тʼәмамийа ԛәԝата дьжмьн пʼепәскьн у ԛәт тʼӧ тьште зьраре нәдә ԝә.

²⁰ Ле бь ԝе йәке ша нәбьн кӧ щьн ельми ԝә дьбьн, ле ша бьн, кӧ навед ԝә ль әʼзмана ньвисар ә».

Шабуна Иса

²¹ Ԝи чахи Әԝ бь Рʼӧһʼе Пироз ша бу у гот: «Шькьр наве Тә бә Баво, Хӧдане әʼрд у әʼзман, кӧ Тә әв тьшт жь зана у билана вәшартьн у ль бәр зарʼа вәкьр. Бәле Баво, чьмки аһа ль Тә хԝәш һат.

²² Һәр тьшт жь Баве Мьн Мьнрʼа һатийә дайине. Кәсәк ньзанә Кӧрʼ кʼи йә, пештьри Баве у кәсәк ньзанә Бав кʼи йә, пештьри Кӧрʼ у йед кӧ Кӧрʼ бьхԝазә ԝанва Баве бьдә наскьрьне».

²³ У ԝе гаве сәр шагьртед Хԝәда вәгәрʼийа у ԝанарʼа башԛә гот: «Хԝәзи ль ԝан чʼәʼва, чь кӧ һун дьбиньн әԝ жи дьбиньн.

²⁴ Чьмки Әз ԝәрʼа дьбежьм, кӧ гәләк пʼехәмбәр у пʼадша хԝәстьн әԝ тьштед кӧ һун дьбиньн бьдитана, ле нәдитьн у әԝ тьштед кӧ һун дьбьһен бьбьһистана, ле нәбьһистьн».

Мәсәла самәрийе ԛәнщ

²⁵ Һьнге ԛанунзанәк рʼабу Әԝ щерʼьбанд у гот: «Дәрсдар, әз чь бькьм, ԝәки жийина һʼәта-һʼәтайе бьстиньм?»

²⁶ Әԝи жи ԝирʼа гот: «Ԛанунеда чь ньвисар ә? Тӧ чаԝа дьхуни?»

²⁷ Әԝи ле вәгәрʼанд у гот: «‹Хӧдан Хԝәдейе хԝә һʼьз бькә, бь тʼәмамийа дьле хԝә, бь тʼәмамийа щанийа хԝә, бь тʼәмамийа ԛәԝата хԝә у бь тʼәмамийа һʼьше хԝә›, ‹һәвале хԝә жи ԝәкә хԝә һʼьз бькә›».

²⁸ У Иса ԝирʼа гот: «Тә рʼаст гот. Ӧса бькә у те бьжийи».

²⁹ Ле әԝи хԝәст хԝә рʼаст дәрхә, Исарʼа гот: «Һәвале мьн кʼи йә?»

³⁰ Иса ле вәгәрʼанд у гот: «Мәрьвәк һәбу, әԝ жь Оршәлиме бәржери Әриһайе дьбу. Әԝ кʼәтә дәсте ԛачаха у ԝана әԝ тәʼзи кьр, кʼӧтан у нивкӧшти һьштьн чун.

³¹ Ӧса ԛәԝьми кӧ кʼаһинәк ԝе рʼеда дьһат. Гава әԝ дит, бәррʼа дәрбаз бу чу.

³² Ӧса жи йәки леԝи һат, гьһиштә ԝи щийи, ль ԝи ньһерʼи, бәррʼа дәрбаз бу чу.

³³ Паше рʼеԝики самәри һат. Гава әԝ дит, гӧне ԝи ле һат.

³⁴ Әԝ незики ԝи бу, бьзьр у шәрав ль бьринед ԝи хьстьн, пʼечʼа у әԝ дани сәр кʼәркʼәдане хԝә бьрә меванхане у бона ԝи хәм кьр.

³⁵ Рʼожа дьне дӧ зив дәрхьстьн данә хԝәйе меванхане у гот: ‹Хԝәйитийе ль ви бькә, тӧ чь жи сәр ԝи зедә хәрщ ки, гава әз вәгәрʼийам, әзе ль тә вәгәрʼиньм›.

³⁶ Ньһа тʼәхмина тә, жь ԝан һәрсека кʼижан бу һәвале ԝи мәрьве кӧ кʼәтә дәсте ԛачаха?»

³⁷ Әԝи жи гот: «Әԝе кӧ гӧнә ле ани». Иса ԝирʼа гот: «Һәрʼә тӧ жи ӧса бькә».

Иса мала Мәртʼа у Мәрйәмеда

³⁸ Чахе рʼекʼәтьн чун, Иса кʼәтә гӧндәки. Кʼӧлфәтәк кӧ наве ԝе Мәртʼа бу Әԝ бьрә мала хԝә.

³⁹ Хушкәкә ԝе жи һәбу, наве ԝе Мәрйәм. Әԝа бәр ньгед Хӧдан рʼуньштьбу у гӧһдарийа хәбәред Ԝи дькьр.

⁴⁰ Мәртʼа жи кӧ гәләк тʼьвдарәкдитьнева гиро бу, һат сәкьни у Исарʼа гот: «Хӧдан, ԛәт хәма Тә нинә кӧ хушка мьн нава ве тʼьвдарәкдитьнеда әз тʼәне һьштьмә? Бежә ԝе кӧ али мьн бькә».

⁴¹ Хӧдан ле вәгәрʼанд у готе: «Мәртʼа, Мәртʼа, тӧ бона гәләк тьшта хәма дьки у тʼәвиһәв дьби.

⁴² Ле тʼәне тьштәк лазьм ә, әԝ пʼара ԛәнщ жи Мәрйәме хԝәрʼа бьжарт у жь ԝе найе стандьне».