Markə 8 - Kawvun mə Mbrew kə Nyeme

Zezu ne kwati ne kə sôwâ raw nday i mbu fəɗi'i

¹ Kəri rum, raw sôwâ ɓa mbə hay' Zezu kəreme. kəri məni kwati ndo' wə ɓa nday si, mum ɗe sum ta zə rum ɓay la' ne ndaya:

² «Na wə we ca wa raw sôwâ məni kuni, zə handay gi bəka hinji' kə rin ɓay kwati ndo' wə ɓa nday si.

³ Na la' ar nday 'ya vari so nday kə mê' si, handay də par tətâ wə vari, zə sôwâ məsin du nday car mbə seŋe.»

⁴ Sum ta zə rum ɗam vun rumu: «Wə igop məni nə namba gak za' kwati ka kədan namba ndak sôwâ məni kuni kə ndi su?»

⁵ Zezu ɗam vun ndaya: «Hi kə vun tləpe' fun ma dak su?» Handay ɗam vun rumu: «Namba kə ndi seɗa'a.»

⁶ Zezu faŋ ne vari ne kə raw sôwâ kədan kuni gay' də nya. Kəki rum, Zezu ra' vun tləpe' fun mə seɗa' kuni, gi soko ne kə Ifray ɓay kəki rum mum jak ɓay ne kə sum ta zə rum kədan handay ɓul ne kə raw sôwâ.

⁷ Handay kə daw keve han cep ta'a. Zezu gi soko ne kə Ifray wa daw keve kuni ɓay ne vari ne kə sum ta zə rum kədan kuni ɓul ne kə sôwâ ta'a.

⁸ Handay daŋ' ti ndaka. Sum ta zə Zezu ra' tan kwati məni gwa' nə nyen ɗəŋâl seɗa'a.

⁹ Sôwâ məni ti kwati rum raw nday i mbu fəɗi'i. Kəki rum, Zezu ar vari ne nday kədan kuni 'ya.

¹⁰ Kəri rum sar, Zezu ur ta rawti da kə sum ta zə rum, ɓay handay 'ya ta nya Dalmanuta.

Kul sôwâ Zuwif mə ɗe kə Farisiyen ci vun yewe

¹¹ Kul sôwâ Zuwif mə ɗe kə Farisiyen mbə day ɓay təŋ kə way dan kə Zezu. Handay wa' kədan handay um kaw kə dan ge vunu. Zə rum, handay ci vun rum kədan nə gi yew məni gak ta' i gbəgboŋ um car mbə hay' Ifray mə wafray ne ndaya.

¹² Zezu ndəma' ɓay ɗam vun ndaya: «Zə mi sôwâ mə tam wə ci vun yew su? Na in mi ne, kəzin', na cu də gi yew ne kə sôwâ mə tam məni kuni mi!»

¹³ Kəki rum, mum ɓul nji kə nday, ur ta rawti da, ɓay 'ya ta vun ya mbi ga' sini.

Kwa mə hulum fut sôwâ Farisiyen kə Herodə

¹⁴ Sum ta zə rum ɗumwa dan tle kwati, ɓay handay kə vun tləpe' fun ɗaw ɓa nday wə rawti da sara.

¹⁵ Zezu har ndaya: «I mun ri'i! I ji tu ri wə du dlum kul sôwâ Farisiyen kə Herodə kuna.»

¹⁶ Sum ta zə rum ɗik wə vunduk nday, ɓay handay in dan kə nji mbok nji: «Mum in ndəna' zə namba cu mbə kə kwati mi.»

¹⁷ Zezu we dan ɗik vunduk nday, ɓay mum ci vun ndaya: «Zə mi hi wə ɗik dan wə vunduk ri i namba cu mbə kə kwati mi nə su? Hi cu we mi ɓo su? Hi cu mun zu dan rum mi ɓo su? Hi dan wa su?

¹⁸ Hi kə i kəta', hi cu we kwa mi su? Hi kə hum kəta', hi cu mun zu dan mi su? Hi cu dla' wa,

¹⁹ dan ri məni na jak vun tləpe' fun mə vatl ndak raw sôwâ i mbu vatl kuni si su? Hi ra' kam kwati rum nyen ɗəŋâl ma dak su?» Handay ɗam vun rumu: «Ɗəŋâl guɓ wa hoɓo.»

²⁰ Zezu ci vun nday kəreme: «Ɓay kəri məni na jak vun tləpe' fun seɗa' ndak raw sôwâ i mbu fəɗi', hi ra' kam kwati rum nyen ɗəŋâl ma dak su?» Handay ɗam vun rumu: «Ɗəŋâl seɗa'a.»

²¹ Zezu faŋ ci vun ndaya: «Hi cu mun zu dan rum mi ɓo su?»

Zezu ar i dəŋâr wə so Betsayda

²² Zezu kə sum ta zə rum ta day kuni wə so Betsayda. Sôwâ məsin mbə hay' Zezu kə dəŋâr, ɓay handay o num kədan nə njay ɓa wa rumu.

²³ Zezu kaw ɓa dəŋâr ɓay kay' num pâ mbə so ta rəka kə rumu. Kəki rum, mum cin mê' ta i dəŋâr ɓay njay ɓa ta hana. Mum faŋ ci vun rumu: «Ha gak we kwa su?»

²⁴ Dəŋâr tle i kar ri ɓay ini: «Na wə we sôwâ, ama na wə nday we ce' ndə gu məni wə ta.»

²⁵ Zezu faŋ njay ɓa ta wə i rum kərem, kəki rum, dəŋâr pe i kar ri kpê', i rum ar ɓay mum we kwa daŋ' ɓaya.

²⁶ Kəki rum, Zezu ar vari ne num kədan nə də so um ɓay la' ne numu: «A faŋ də mbok so mi.»

Piyer in i Zezu nə Kris na

²⁷ Kəki rum, Zezu kə sum ta zə rum 'ya kuni ta pəɗak so Sezare mə Filip. Kəri məni handay wə vari ɓo, Zezu ci vun ndaya: «Sôwâ wə in i na nə sa su?»

²⁸ Handay ɗam vun rumu: «Sôwâ məsin wə in i ha Zaŋ-Baptistə, sôwâ məsin wə in i ha Eliya, ɓay sôwâ məsin kərem wə in i ha bə ka' dan wə du sum ka' dana.»

²⁹ Zezu ci vun ndaya: «Ama hi, hi wə in mi i na sa su?» Piyer ɗam vun rumu: «Ha nə Kris na.»

³⁰ Zezu faŋ dlay nday kə gbəgboŋ kədan kuni in dan rum ne kə swə ɗaw mi!

Zezu in dan wa mar um kə pâ mbə mar umu

³¹ Kəki rum, Zezu təŋ kə ta' kwa ne kə sum ta zə rum kə ini: «Say Vay sumra' nə ce boni juk, sum rôwâ mə du sôwâ Zuwif, kə sum rôwâ mə du sum po' fur, ɓay sum pay zu dan dlay kuni də um vaɗa. Handay də um ci, ɓay kəki rum bəka hinji', mum də car mbə mara.»

³² Mum in dan rum ne nday təlaka. Zə dan rum, Piyer kay' num ta rəka kə rum ɓay təŋ kə um dlaya.

³³ Ama Zezu faŋ i, kar sum ta zə rum, ɓay dlay Piyer kə gbəgboŋo: «A 'ya ki rin si, Satan! Zə dan ɗik wû cu wə du dan ɗik Ifray mi, ama wə du dan ɗik sumra'a.»

³⁴ Kəki rum, Zezu ɗe raw sôwâ kə sum ta zə rum kuni ɓay la' ne ndaya: «Swə la' wa' ta zə rin si, say bə rum ar ɗik dan tu rum, tle gu gay' tu rum, ɓay ta zə rini.

³⁵ Zə swə məni wə wa' kədan mum siɗ tu rum, bə rum də mar, ama swə məni də fe mar zə rin ko zə Dan mə Kəɗam, bə rum də siɗ tu rum ta'a.

³⁶ Swə la' za' kwa nya daŋ', ama bə rum cu kə nyî mə də hâ mi si, kwa rum gak gi mi zə rum su?

³⁷ Swə də po' ma dak kədan mum fe nyî um su?

³⁸ Swə la' wə gi zur wa rin ko wa dan man wə du sôwâ mə tam məni cu ve dan Ifray mi, ɓay wə gi kwa mə bro' si, Vay sumra' də gi zur wa bə rum kəri mum də mbə wə du mbra' Ba um kə sum sin um mə kəleŋe.»