Markə 7 - Kawvun mə Mbrew kə Nyeme

Kwata' wa vun fur sôwâ mə kəmbara

¹ Kul sôwâ Zuwif mə ɗe kə Farisiyen kə sôwâ məsin mə du sum pay zu dan dlay car kuni wə so Jeruzalem ɓa mbə hay' Zezu.

² Handay we sôwâ məsin mə du sum ta zə Zezu wə ti kwati kə ɓa day, dan kol ce' ndə məni vun fur nday ta' ne ndaya.

³ Kul sôwâ Farisiyen kə sôwâ Zuwif daŋ' cu ti kuni kwati dan kol ɓa ce' ndə məni vun fur nday wə ta' nə mi, zə handay daŋ' wə ta zə vun fur ba mbri randay,

⁴ ɓay kəri məni handay la' gewa lumo si, handay cu ti kwati məto', say handay mbi tu copo. Handay kaw dan vun fur məsin cem cem juk, ce' ndə dan kol timbi, kə dənay, ɓay tasawa.

⁵ Zə rum, kul Farisiyen kə sum pay zu dan dlay ci kuni vun Zezu: «Zə mi sum ta zə ru cu ta zə vun fur bambi ramba mi, ama handay wə ti kwati kə ɓa day su?»

⁶ Zezu ɗam vun ndaya: «Hi sum vur vuru! Bə ka' dan mə ɗe kə Esaya ka' dan mə njeŋ wa ri kəri məni mum wây' wə du ɗerwa umu: Sôwâ məni kuni wə man mbâ kə ɗike vun, ama vunduk nday seŋ kə rini.

⁷ Handay man bur kə vun uray, zə handay wə ta' dan ɗik sumra'a.

⁸ Hi wə ar dan dlay Ifray njay kə hay', ɓay hi wə faŋ ta zə vun fur mə sumra'a.»

⁹ Zezu faŋ la' ne ndaya: «Hi we yel vaɗ dan dlay Ifray si njeŋ kədan hi faŋ ta zə vun fur mi!

¹⁰ Zə Moyizə ini: "A mbâ ba wû kə ya wû", ɓay kəreme: "Swə məni ge nê' ba um ko ya um, bə rum də fe mara."»

¹¹ Ama mə hi, hi wə ini: "Swə la' la' ne kə ba um ko kə ya umu: «Kwa man məni na gak kawɓa ri kə ndi, kwa rum nəKorbaŋ, (məni wa' dan ini: "na ne zə Ifray si"),

¹² hi cu ar vari ne kə bə rum kədan nə kaw ɓa ba um ko ya um za' mi.

¹³ Kə vari məni nə hi wə ɗənok dan Ifray kə vun fur mi məni hi wə ta' ne kə sôwâ məsini. Ɓay hi wə gi kwa məsin juk ra' nji kə mə ndani na'a.»

Kwa məni wə ɗənok swa

¹⁴ Kəki rum, Zezu ɗe raw sôwâ kərem ɓay la' ne ndaya: «Hi daŋ', i mun dan man, ɓay i mun zu dan mə ni na:

¹⁵ Kwa daŋ' məni car mbə rəka mbə ze vun swə cu gak ɗənok bə rum mi. Ama kwa məni wə pâ mbə vunduk swə, kwa rum gak ɗənok bə rumu. [

¹⁶ Swə la' kə hum mun dan kəta' si, say bə rum nə munu!]»

¹⁷ Kəri məni Zezu ɓul nji kə raw sôwâ, mum ze ta rawti so, sum ta zə rum ci vun rum wa dan mə gəgan rumu.

¹⁸ Zezu ɗam vun ndaya: «Hi ta', hi dan wa su? Hi cu mun i kwa daŋ' məni car mbə rəka mbə ze vun swə cu gak ɗənok bə rum mi nə mi su?

¹⁹ Zə kwa rum cu ze də vunduk rum mi, ama wə ze də rawti bə rum, ɓay kəki rum kwa rum pâ də rəka.» (Kə dan mə ni nə, Zezu ta' i kwati daŋ' ɓay kədan ti).

²⁰ Mum faŋ la' ne ndaya: «Kwa məni wə pâ mbə vunduk, kwa rum gak ɗənok bə rumu.

²¹ Zə kwa məni car mbə wə rawti swə, pâ mbə vunduk rum, mum nə ɗik dan mə bro', gi kwa mə kə zur, kəy hura, ci mar,

²² gi nja, səna' kwa, gi ɓê', gi vur vur, gi kwa mə dan vari, gi sây', ge dan mə bro' wa sôwâ, mbra' tu, kə gi kwa mə laya.

²³ Kwa mə bro' mə ndani kuni daŋ' wə wur mbə rawti swə ɓay wə ɗənok bə rumu.»

Ma nya Fenisi ve Zezu

²⁴ Kəki rum, Zezu 'ya mbə han ta nya məni so Tir. Mum ze ta rawti so ɓay mum cu wa' i swə ɗaw we i mum wə so rum mi, ama kə ndi nə daŋ' mum cu gak pe' tu rum mi.

²⁵ Kəri rum, ma məsin mun dan Zezu, ɓay kəkor sar, ta mbə kuduk nya kor rum, zə vay sə mə ma kə gam wa sa.

²⁶ Ma rə zə saŋ sôwâ Grek, ta vra' wə Fenisi, nya Siri. Ta o Zezu kədan nə mbə 'way gam wa vay sa.

²⁷ Ama Zezu ɗam vun sa: «Əŋ ar daw sumra' ti ndak nday cop ri', zə cu ɓay kədan tle kwati daw sumra' ne kə daw də mi.»

²⁸ Ta ɗam vun rumu: «Kəzin' Bârî, ama daw də gak ti bubuɗ kwati məni daw sumra' ar njay zə tablə.»

²⁹ Zə rum, Zezu ɗam vun sa: «Zə dan ɗam maŋ, əŋ də ye, gam pâ mbə wa vay maŋ rə si.»

³⁰ Ta faŋ ta so sə, ɓay za' vay sə bar wa la'a. Gam nə pâ mbə wa sə si.

Zezu ar hum ndumu

³¹ Kəki rum kərem, Zezu 'ya mbə nya məni so Tir wə han, ta pâ so Sidoŋ, kə nya məni so mə mbri guɓ wə han, ɓay mum gaŋ ta day vun ya mbi Galile.

³² Sôwâ məsin mbə hay' Zezu kə ndum məni cu gak ge dan njeŋ mi, ɓay handay o num kədan nə cin ɓa wa rumu.

³³ Zezu faŋ kay' num ta rəka kə rum kə ɗaw rum, seŋ kə raw sôwâ. Mum cok daw ɓa ta zra hum ndum na. Mum tup mê' ɓay ɗak se'le ndum kə vay ɓa rumu.

³⁴ Zezu faŋ tle i ta fray, tlaw, ɓay la' ne kə ndumu: «Efata», məni wa' dan ini: «A mun hum ye!»

³⁵ Kəkor sar, hum ndum nə ar, se'le rum gbol', ɓay mum dle kə ge dan kə vari rumu.

³⁶ Zezu dlay nday kə gbəgboŋ kədan kuni in dan rum ne kə swə ɗaw mi. Ama kə ndi nə daŋ', handay pla' dan rum kporo.

³⁷ Kwa rum jin' wa ne nday juk, ɓay handay ini: «Kwa məni mum gi daŋ', ɓaya! Mum ar hum ndum, ɓay mum gbol' se'le sôwâ məni cu dan məta'a!»