Efezə 2 - Kawvun mə Mbrew kə Nyeme

Ifray car i mba kə Kris

¹ Ɓa' si, hi ke mar zə sin mə bro' kə kwa mə bro' mi,

² kəri rum, hi ke wə ta ce' ndə sôwâ nya məni na. Hi ke wə mun vun jwə gam, usiya məni suk jwə wa sôwâ mə dan mun vun Ifraya.

³ Namba daŋ', namba ke ce' ndə handay ta', namba ke wə ta kə kwa səna' kpak tu mba, ɓay namba ke wə gi kwa məni kpak tu mba kə dan ɗik mba wə wa'a: Zə rum, bak Ifray ke suk wa mba, ce' ndə məni bak rum suk wa sôwâ məsin ta'a.

⁴ Ama Ifray we ca wa mba ɓayrum, ɓay mum bə mba dle tu si.

⁵ Zə rum, kəri məni namba ke mar zə sin mə bro' mba, mum faŋ car i mba kə Kris, hi fe siɗ zə ɓay Ifray,

⁶ wə du ɓa mba kə Zezu Kris, Ifray ra' mba mbə mar kə rum, kədan namba də ti jwə kə rum wafraya.

⁷ Ifray gi ndəna' kədan mum ta' ɓay um mə mbri wə ri daŋ' kə sin mə ɓay um məni mum ta' ne mba kə Zezu Kris.

⁸ Zə hi siɗ zə ɓay Ifray, ɓay zə hi ve Kris. Siɗ rum cu car mbə hay' ri mi, mum nə kwane Ifray na.

⁹ Mum cu mbə zə sin mə ɓay mi mi. Ndəna', swə cu gak mbra' tu rum wa rum mi.

¹⁰ Zə Ifray kə məni gi mba. Wə du ɓa mba kə Zezu Kris, mum gi mba kədan namba gi sin mə ɓay məni mum gila' nday cop kədan namba nday gi.

Namba ɗaw wə du ɓa mba kə Kris

¹¹ Hi sôwâ məni cu tagura mi, handay wə mi ɗe kə jeɓ, ɓay handay wə ɗe tu nday kə sum tagura (zə kwa məni sôwâ wə gi wə tu nday), i dla' wa dan məni hi ke ɓa' si:

¹² Kəri rum, hi ke seŋ kə Kris, hi ke sôwâ rəkway, ɓay hi cu ke wə du sôwâ məni Ifray da' kuni mi. Hi cu ke wə du dan kawvun Ifray məni mum kawvun wa rum kə sôwâ um kuni mi. Hi ke gay' wə du sôwâ nya, hi cu ke kə kwa məni hi gak njay vunduk ri wa rum mi, ɓay hi cu ke kə Ifray mi.

¹³ Ama mgbaŋ ni nə, wə du ɓa mi kə Zezu Kris, hi sôwâ məni ke seŋ, hi faŋ mbə həre' zə mar Kris.

¹⁴ Zə Kris kə tu rum kə məni ne mba heɓ kə gi sôwâ Zuwif kə sôwâ məni cu zu saŋ sôwâ Zuwif mi faŋ sôwâ mə ɗawa. Kə mar Kris, mum bru la' tu ruɓ məni ke tak i nday ɓay ke gi nday faŋ sum sî nji.

¹⁵ Mum ɗənok dan dlay sôwâ Zuwif kə dan daŋ' məni wə han, kədan mum gi zu saŋ mə hoɓ kuni faŋ sôwâ mə mbrew ɗaw wə du ɓa nday kə rumu. Ndəna', mum cin heɓ du ndaya.

¹⁶ Kə mar Kris wa gu, mum tle sî məni ke mbok nday nə ta rəka: Kə mar um, mum ɓa zu saŋ mə hoɓ kuni faŋ tu ɗaw, ɓay gila' nday kə Ifraya.

¹⁷ Ndəna', Kris mbə ka' Dan mə Kəɗam məni wə ne heɓ nə ne ni, hi sôwâ məni cu zu saŋ sôwâ Zuwif mi, məni ke seŋ kə Ifray, ɓay ne kə sôwâ Zuwif məni ke həre' kə rum ta'a.

¹⁸ Zə Kris, namba daŋ', sôwâ Zuwif kə sôwâ məni cu zu saŋ sôwâ Zuwif mi, namba gak mbə kor Ba mba kə vari Simbeɗ Ifray məni wə kawɓa mba.

¹⁹ Zə rum, hi sôwâ məni cu zu saŋ sôwâ Zuwif mi, hi cu rəkway ko sôwâ məni wə gaŋ kə sem za' mi, ɓay hi faŋ sôwâ cava Ifraya.

²⁰ Hi ta', hi gway' wə du so məni wə ɗam də fray wa tor zu so məni sum sin Kris kə sum ka' dan kuni tor, Zezu Kris kə tu rum, mum gway' mə kaw dleŋ so rumu.

²¹ Mum kə məni kaw gbəgboŋ so rum daŋ', ɓay mum kə məni wə gi so rum mbuɗ də kofo du Bârî kədan faŋ so bur Ifraya.

²² Wə du ɓa mi kə rum, hi ta', hi gway' wə du so məni wə ɗam də fray kədan hi kə sôwâ məsin daŋ' faŋ so məni Ifray wə suk han kə Simbeɗ umu.