ᐱᓬᐃᐱᔭᓇ 1 - ᑲᓈᒋ ᑭᐦᒋ ᒪᓯᓈᐦᐃᑲᐣ

¹ ᐹᓬ ᒥᓇ ᑎᒪᑏ, ᐅᐟ ᐊᑐᐢᑫᔮᑲᓇ ᙭ ᒋᓴᐢ, ᐁ ᒪᓯᓇᐦᐊᒪᐋᐧᒋᐠ ᑲᐦᑭᔭᐤ ᐅᑲᓈᑎᓯᐊᐧ ᙭ ᒋᓴᐢ ᑳ ᐊᔮᐋᐧᐟ ᐊᓂᑕ ᐱᓬᐃᐸᐩ, ᐊᓯᒋ ᑭᐦᒋ ᐊᔭᒥᐦᐁᐃᐧᔨᓂᐊᐧᐠ ᒥᓇ ᐅᐸᒥᐢᑖᑫᐊᐧᐠ:

² ᑭᓭᐋᐧᑐᑕᑯᐃᐧᐣ ᒥᓇ ᐯᔭᑕᑫᔨᒧᐃᐧᐣ ᑭ ᑲ ᐃᐧ ᐅᒋᐢᑕᒫᑯᐋᐧᐤ ᑭᓭᒪᓂᑐ ᑯᑖᐃᐧᓇᐤ ᒥᓇ ᑳ ᑎᐯᔨᐦᒋᑫᐟ ᒋᓴᐢ ᙭.

³ ᓂ ᓇᓈᐢᑯᒫᐤ ᓂ ᑭᓭᒪᓂᑐᒼ ᑕᐦᑖᐧᐤ ᑫᐢᑭᓯᑐᑖᑕᑳᐧᐃᐧ,

⁴ ᑳᑭᑫ ᑕᐦᑖᐧᐤ ᐁ ᒪᐃᐧᒧᐢᒋᑫᐢᑕᒫᑕᑯᐠ ᑲᐦᑭᔭᐤ ᒪᒪᐦᑖᑯᓯᐃᐧᓂᕽ ᐁ ᒪᐃᐧᒧᐢᒋᑫᔮᐣ,

⁵ ᑭ ᐃᐧᒋᐃᐁᐧᐃᐧᓂᐋᐧᐤ ᐅᐦᒋ ᐁ ᔭᑯᑎᑖᕽ ᒥᔮᐧᒋᒧᐃᐧᐣ ᓂᐢᑕᒼ ᐁ ᑭᓯᑳᐠ ᐅᐦᒋ ᐱᔨᐢ ᐊᓄᐦᐨ;

⁶ ᐅᒪ ᒥᑐᓂ ᐁ ᐃᑕᑌᔨᑕᒫᐣ, ᐊᓇ ᑳ ᑭ ᒫᒋ ᐊᑐᐢᑳᑎᑯᔦᐠ ᒥᔪ ᐊᑐᐢᑫᐃᐧᐣ ᑭᑕ ᒥᑐᓂᑖᐤ ᐃᐢᑯ ᑭᑕ ᐅ ᑭᓯᑳᒥᐟ ᒋᓴᐢ ᙭:

⁷ ᑳ ᐃᓯ ᑲᐧᔭᐢᑲᐧᕽ ᓂᔭ ᐅᒪ ᑭᑕ ᐃᓯ ᒥᑐᓀᔨᒥᑕᑯᐠ ᑲᐦᑭᔭᐤ, ᐃᐧᔭ ᓂᑌᐃᕽ ᐁ ᐊᔮᐃᐧᑕᑯᐠ, ᒋᑫᒫ ᑖᐱᐢᑯᐨ ᓂ ᒪᒫᒋᑲᐧᐱᑎᑯᐃᐧᓂᕽ ᒥᓇ ᐁ ᓈᑕᒪᐋᐧᑕᒥᕽ ᒥᓇ ᐁ ᐋᔮᑕᐢᑖᕽ ᒥᔮᐧᒋᒧᐃᐧᐣ, ᑲᐦᑭᔭᐤ ᑭ ᑭ ᐃᐧᒋᐃᐋᐧᓈᐋᐧᐤ ᐊᓯᒋ ᓂᔭ ᓂᓱᑲᒫᑯᐃᐧᐣ.

⁸ ᒋᑫᒫ ᑭᓭᒪᓂᑐ ᓂ ᐋᐧᐸᒥᐠ, ᐃᔨᑯᕽ ᑲᐦᑭᔭᐤ ᐁ ᐱᑭᐢᑳᑎᑕᑯᐠ ᐅ ᑭᓭᐋᐧᑎᓯᐃᐧᓂᕽ ᙭ ᒋᓴᐢ.

⁹ ᐅᒪ ᒫᑲ ᓂᐟ ᐃᓯ ᐊᔭᒥᐦᐋᐣ, ᑭ ᓵᑭᐦᐃᐁᐧᐃᐧᓂᐋᐧᐤ ᑭᑕ ᐁᐧᔪᒋ ᐊᔮᐠ ᐊᐊᐧᓯᒣ ᒥᓇ ᐊᐊᐧᓯᒣ ᑭᐢᑫᔨᑕᒧᐃᐧᓂᕽ ᒥᓇ ᑲᐦᑭᔭᐤ ᓂᓯᑕᐃᐧᓇᒧᐃᐧᓂᕽ;

¹⁰ ᐁᑯᓯ ᑭᑕ ᑯᑌᔨᑕᒣᐠ ᐊᓂᐦᐃ ᑳ ᒥᔮᐧᓯᑭ; ᑭᑕ ᑖᐯᐧᔦᐠ ᒥᓇ ᐁᑳ ᑭᑕ ᓇᔦᑖᐁᐧᔨᑖᑯᓯᔦᐠ ᐱᔨᐢ ᐅ ᑭᓯᑳᒥᕽ ᙭;

¹¹ ᐁ ᒧᐢᑭᓀᐢᑳᑯᔦᐠ ᐁ ᐃᓯ ᒥᓂᓯᐊᐧᕽ ᑲᐧᔭᐢᑭᑖᑎᓯᐃᐧᐣ, ᒋᓴᐢ ᙭ ᐅᐦᒋ ᑳ ᐊᔮᑭ, ᑭᑕ ᑭᐢᑕᑭᒥᐦᐟ ᒥᓇ ᑭᑕ ᒪᒥᒋᒥᐦᐟ ᑭᓭᒪᓂᑐ.

¹² ᐁᑲᐧ ᒫᑲ ᑭ ᓇᑕᐁᐧᔨᒥᑎᓈᐋᐧᐤ ᑭᑕ ᑭᐢᑫᔨᑕᒣᐠ, ᓂᒋᐋᐧᒥᑎᐠ, ᐊᓂᐦᐃ ᑳ ᑭ ᐃᐢᐸᔨᐃᑯᔮᐣ ᑭ ᐃᐧᒋᑖᒪᑲᓇᐧ ᑭᑕ ᔭᑯᑌᒪᑲᕽ ᒥᔮᐧᒋᒧᐃᐧᐣ;

¹³ ᐁᑯᓯ ᐅᐦᐃ ᓂ ᒪᒫᒋᑲᐧᐱᓱᐃᐧᓇ ᙭ ᐃᓯ ᐋᐧᐸᐦᑕᒪᐧᐠ ᑲᐦᑭᔭᐤ ᑭᐦᒋ ᓯᒫᑲᓂᓴᐠ ᒥᓇ ᑲᐦᑭᔭᐤ ᑯᑕᑲᐠ;

¹⁴ ᐁᑯᓯ ᒫᑲ ᐅᓵᒼ ᐱᑯ ᑲᐦᑭᔭᐤ ᐅᒋᐋᐧᒥᒫᐊᐧᐠ ᑳ ᑎᐯᔨᐦᒋᑫᐟ ᐃᓯ, ᐊᑐᐢᑲᒼ ᐁ ᐊᑎ ᒪᐢᑲᐁᐧᔨᑕᐦᑭᐠ ᓂ ᒪᒫᒋᑳᐧᐱᓱᐃᐧᓇ ᐅᐦᒋ, ᐊᔨᐋᐧᐠ ᓱᑫᔨᒧᐊᐧᐠ ᑭᑕ ᐃᐧᐦᑕᐦᑭᐠ ᑭᓭᒪᓂᑐ ᐅᐟ ᐃᑌᐧᐃᐧᐣ ᐁᑳ ᑮᑲᐧᐩ ᐁ ᑯᐢᑕᑭᐠ.

¹⁵ ᐋᑎᐦᐟ ᑖᐯᐧ ᐃᐧᐦᑕᒫᑫᐊᐧᐠ ᙭ᐊ ᐃᓴᐋᐧᓇᑫᔨᒧᐃᐧᐣ ᒥᓇ ᑲᑫᐧ ᐸᐢᑭᔮᑫᐃᐧᐣ ᐅᐦᒋ; ᐋᑎᐦᐟ ᒥᓇ ᐁ ᒥᔦᐧᔨᑕᐦᑭᐠ:

¹⁶ ᐯᔭᑲᐧᔭᐠ ᐃᑐᑕᒪᐧᐠ ᓵᑭᐦᐃᐁᐧᐃᐧᐣ ᐅᐦᒋ, ᐁ ᑭᐢᑫᔨᑕᐦᑭᐠ ᐁ ᐃᑕᔨᑲᐃᐧᔮᐣ ᑭᑕ ᐱᑭᐢᑫᐧᐢᑕᒪᐋᐧᑕᒫᐣ ᒥᔮᐧᒋᒧᐃᐧᐣ:

¹⁷ ᒫᑲ ᐃᐧᔭ ᑯᑕᑲᐠ ᐋᒋᒣᐊᐧᐠ ᙭ᐊ ᐁ ᐃᐧ ᐱᑯᓂᑫᒋᐠ, ᓇᒪᐃᐧᔭ ᑖᐯᐧ ᐁ ᐃᑌᔨᑕᐦᑭᐠ, ᐁ ᐃᐧ ᐸᓯᑯᓇᒪᐃᐧᒋᐠ ᐋᔨᒥᓯᐃᐧᐣ ᐁ ᒣᑳᐧ ᒪᒫᒋᑲᐧᐱᓱᔮᐣ.

¹⁸ ᑖᓂᓯ ᒫᑲ? ᐱᑯ ᐅᒪ ᒥᓯᐁᐧ ᐃᓯ, ᑭᐢᐱᐣ ᐁ ᐃᑖᐧᓱᕽ ᐊᐦᐳ ᐁ ᑖᐯᐧᕽ, ᙭ ᐋᒋᒫᐤ; ᐁᐊᐧᑯ ᐅᐦᒋ ᒫᑲ ᓂ ᒪᒪᐦᑖᑯᓯᐣ, ᐁᐦᐁ, ᒥᓇ ᓂ ᑲ ᒪᒪᐦᑖᑯᓯᐣ.

¹⁹ ᒋᑫᒫ ᓂ ᑭᐢᑫᔨᑌᐣ ᐅᒪ ᓂ ᐱᒫᒋᐃᑯᐃᐧᓂᕽ ᑭᑕ ᐃᐢᐸᔨᐠ, ᑭᐟ ᐊᔭᒥᐦᐋᐃᐧᓂᐋᐧᐤ ᐅᐦᒋ ᒥᓇ ᐁ ᐅᐦᒋᐢᑕᒫᑲᐃᐧᔮᐣ ᐅᐟ ᐊᐦᒑᐦᑲᐧ ᒋᓴᐢ ᙭,

²⁰ ᐁ ᐃᓯ ᓱᑭ ᐃᑕᑌᔨᑕᒫᐣ ᒥᓇ ᐸᑯᓭᔨᒧᔮᐣ, ᐁᑳ ᑫᑲᐧᐩ ᑭᑕ ᓇᓀᐯᐃᐧᐃᑯᔮᐣ, ᒫᑲ ᒥᓯᐁᐧ ᓱᑫᔨᒧᐃᐧᓂᕽ, ᑖᐱᐢᑯᐨ ᑳᑭᑫ, ᐁᑯᓯ ᐁᑲᐧ ᒥᓇ ᐊᓄᐦᐨ ᙭ ᑭᑕ ᑭᐢᑌᔨᑖᑯᐦᐃᐦᐟ ᓂᔭᐃᐧᕽ, ᑭᐢᐱᐣ ᐱᒫᑎᓯᐃᐧᐣ ᐅᐦᒋ, ᐊᐦᐳ ᓂᐳᐃᐧᐣ ᐅᐦᒋ.

²¹ ᒋᑫᒫ ᓂᔭ ᐃᐧᔭ ᑭᑕ ᐱᒫᑎᓯᔮᐣ ᐁᐊᐧᑯ ᙭, ᐁᑯᓯ ᑭᑕ ᓂᐱᔮᐣ ᐁᐊᐧᑯ ᐅᑎᓯᐃᐧᐣ.

²² ᒫᑲ ᑭᑕ ᐱᒫᑎᓯᔮᐣ ᓂ ᐃᐧᔮᓯᕽ, ᑭᐢᐱᐣ ᐁᐊᐧᑯ ᐅᑎᓯᔮᐣ ᓂᐟ ᐊᑐᐢᑫᐃᐧᐣ, ᐁᑲᐧ ᑫᑲᐧᐩ ᑫ ᓇᐊᐧᓱᓇᒫᐣ ᓇᒪᐃᐧᔭ ᓂ ᑭᐢᑫᔨᑌᐣ.

²³ ᒫᑲ ᓂ ᐊᐧᐋᐧᓀᔨᑌᐣ ᓂᓴᐧᔭᐠ ᐃᓯ, ᐁ ᓄᑌ ᓯᐯᐧᑌᔮᐣ ᑭᑕ ᐃᐧᒋ ᐊᔮᒪᐠ ᙭; ᒋᑫᒫ ᐁᐊᐧᑯ ᐊᔨᐋᐧᐠ ᒥᔮᐧᓯᐣ;

²⁴ ᒫᑲ ᐁᔨᐁᐧᕽ ᑭᑕ ᐊᔮᔮᐣ ᓂ ᐃᐧᔮᓯᕽ ᓇᐊᐧᐨ ᓇᑕᐁᐧᔨᑖᑲᐧᐣ ᑭᔭᐋᐧᐤ ᐅᐦᒋ.

²⁵ ᐁ ᐊᔮᔮᐣ ᒫᑲ ᐅᒪ ᒪᐢᑲᐁᐧᔨᑕᒧᐃᐧᐣ, ᓂ ᑭᐢᑫᔨᑌᐣ ᑭᑕ ᐊᔮᔮᐣ, ᐁᐦᐁ, ᑭᑕ ᐃᐧᒋ ᐊᔮᒥᑕᑯᐠ ᑲᐦᑭᔭᐤ, ᑭᑕ ᔭᑯᑌᔦᐠ ᒥᓇ ᑭᑕ ᒪᒪᐦᑖᑯᓯᔦᐠ ᑖᐯᐧᔦᔨᑕᒧᐃᐧᓂᕽ;

²⁶ ᐁᑯᓯ ᑭ ᒪᒪᐦᑖᑯᓯᐃᐧᓂᐋᐧᐤ ᑭᑕ ᐁᐧᔪᒋ ᐊᔮᐠ ᙭ ᒋᓴᐢ ᐃᓯ ᓂᔭ ᑭᑖᐧᒼ ᒥᓇ ᐋᐧᐸᒥᔦᑯ.

²⁷ ᑭᔮᒼ ᒫᑲ ᐱᑯ ᑭᐟ ᐃᓯ ᐱᒫᑎᓯᐃᐧᓂᐋᐧᐤ ᑭᑕ ᐃᐧ ᓇᐃᐢᑲᒧᒪᑲᐣ ᐅ ᒥᔮᐧᒋᒧᐃᐧᐣ ᙭: ᐁᑯᓯ, ᑭᐢᐱᐣ ᑫ ᑕᑯᓯᓄᐋᐧᓀ ᑭᑕ ᐋᐧᐸᒥᑕᑯᐠ, ᐊᐦᐳ ᑭᐢᐱᐣ ᑫ ᐅᑕᒫᐱᒋᐋᐧᓀ, ᑭᑕ ᐯᑕᒫᐣ ᐁ ᐃᓯ ᐊᔮᔦᐠ, ᐁ ᒪᐢᑲᐃᐧᑳᐸᐃᐧᔦᐠ ᐯᔭᐠ ᒥᑐᓀᔨᒋᑲᓂᕽ, ᐯᔭᐠ, ᐊᐦᒑᕽ ᐅᐦᒋ ᐁ ᒫᒪᐃᐧ ᐃᐧᑯᐢᑕᒣᐠ ᑖᐯᐧᔦᔨᑕᒧᐃᐧᐣ ᒥᔮᐧᒋᒧᐃᐧᓂᕽ;

²⁸ ᐁᑳ ᒫᑲ ᑫᑲᐧᐩ ᑭᑕ ᐅᐦᒋ ᓭᑭᐃᑯᔦᑯᐠ ᑳ ᓇᑳᐢᑲᑭᐠ: ᐁᐊᐧᑳᐧᓂᒪ ᐁ ᐸᔭᑌ ᑭᐢᑭᓇᐋᐧᒋᑕᒫᐦᒋᐠ ᓂᓯᐊᐧᓈᑎᓯᐃᐧᐣ, ᒫᑲ ᑭᔭᐋᐧᐤ ᐱᒫᒋᐦᐅᐃᐧᐣ, ᑭᓭᒪᓂᑐ ᒫᑲ ᐅᐦᒋ;

²⁹ ᒋᑫᒫ ᑭᔭᐋᐧᐤ ᑭ ᑭ ᐸᑭᑎᓇᒫᑲᐃᐧᓈᐋᐧᐤ ᙭ ᐅᐦᒋ, ᓇᒪᐃᐧᔭ ᐱᑯ ᑭᑕ ᑖᐯᐧᑕᐋᐧᔦᐠ, ᒫᑲ ᒥᓇ ᑭᑕ ᑯᑕᑭᑖᔦᐠ ᐃᐧᔭ ᐅᐦᒋ;

³⁰ ᐁ ᐊᔮᔦᐠ ᐁᐊᐧᑯ ᑯᑕᑭᑖᐃᐧᐣ ᑳ ᑭ ᐃᓯ ᐋᐧᐸᒥᔦᐠ, ᐁᑲᐧ ᒫᑲ ᑳ ᐯᐦᑕᒣᐠ ᐁ ᐃᓯ ᐊᔮᔮᐣ.