ᓃᓵᐧᐤ ᐊᑭᓀ ᐋᒋᒧᐃᐧᓇ 1 - ᑲᓈᒋ ᑭᐦᒋ ᒪᓯᓈᐦᐃᑲᐣ1 ᓵᓬᐊᒪᐣ ᒫᑲ ᐅᑯᓯᓴ ᑌᐱᐟ ᑭ ᒪᐢᑲᐃᐧᓯᐋᐤ ᐅ ᑭᐦᒋ ᐅᑭᒫᐃᐧᐃᐧᓂᕽ, ᒥᓇ ᑳ ᑎᐯᔨᐦᒋᑫᔨᐟ ᐅ ᑭᓭᒪᓂᑐᒪ ᑭ ᐃᐧᒉᐃᐧᐠ, ᐁᑯᓯ ᐊᔨᐋᐧᐠ ᑭ ᑭᐢᑌᔨᑖᑯᐃᐠ. 2 ᓵᓬᐊᒪᐣ ᒫᑲ ᑭ ᐊᔭᒥᐦᐁᐤ ᑲᐦᑭᔭᐤ ᐃᐢᕒᐁᐃᓬᐊ, ᑳ ᑭᐦᒋᓯᒫᑲᓂᓯᐃᐧᑭᒫᑲᑕᐋᐧᔨᐟ ᑭᐦᒋᒥᑕᑕᑐᒥᑕᓇᐤ ᒥᓇ ᒫᒥᑖᑕᐦᑐᒥᑕᓇᐤ, ᒥᓇ ᐅᔭᓱᐁᐧᐃᐧᔨᓂᐊᐧ, ᒥᓇ ᑲᐦᑭᔭᐤ ᑳ ᐅᑭᒫᐃᐧᔨᐟ ᒥᓯᐁᐧ ᐃᐢᕒᐁᐃᓬ, ᑳ ᓂᑳᓀᔨᑖᑯᓯᔨᐟ ᐅᑖᐃᐧᐋᐧᐊᐧ ᐅ ᐋᐧᐢᑳᐦᐃᑲᓂᔨᕽ. 3 ᐁᑯᓯ ᒫᑲ ᓵᓬᐊᒪᐣ ᒥᓇ ᑲᐦᑭᔭᐤ ᑳ ᒫᒪᐃᐧ ᒫᐊᐧᒋᐦᐃᑐᔨᐟ ᐁ ᐃᐧᒉᐃᐧᑯᐟ, ᑭ ᐃᑐᐦᑌᐊᐧᐠ ᐃᐢᐸᔭᓄᕽ ᑭᐱᔭᓂᕽ ᑳ ᑭ ᐊᔮᐠ; ᒋᑫᒫ ᐁᑯᑕ ᑭ ᐊᔮᐤ ᐅ ᒫᐊᐧᒋᐦᐃᑐᐃᐧ ᒥᑭᐋᐧᑊ ᑭᓭᒪᓂᑐ, ᐊᓂᒪ ᒧᓯᐢ ᐅᐟ ᐊᑐᐢᑫᔮᑲᓇ ᑭᓭᒪᓂᑐ ᑳ ᑭ ᐅᓯᐦᑖᐟ ᐱᑲᐧᑕᐢᑭᕽ. 4 ᒫᑲ ᐃᐧᔭ ᐅ ᑭᐢᑭᓇᐋᐧᒋᐅᐃᐧᓂᐋᐧᐟ ᑭᓭᒪᓂᑐ ᑌᐱᐟ ᑭ ᐯᑖᐤ ᑭᕒᐃᔮᐦᐟᒋᐊᕒᐃᒼ ᐅᐦᒋ ᐁ ᐃᑐᑕᑖᐟ ᐃᑕ ᑌᐱᐟ ᑳ ᑭ ᑲᐧᔮᒋᑕᒪᐋᐧᑕᕽ; ᒋᑫᒫ ᑭ ᒫᓄᑳᑕᒼ ᒉᕒᐅᓴᓬᐊᒥᕽ. 5 ᐁᑯᓯ ᒥᓇ ᐊᓂᒪ ᐅᓵᐋᐧᐱᐢᑯ ᐸᑭᑎᓈᓱᐃᐧᓈᐱᐢᐠ, ᐯᓴᓬᐃᓬ ᐅᑯᓯᓴ ᔪᕒᐊᐩ, ᐅᑯᓯᓴ ᐦᐊᕒ, ᑳ ᑭ ᐅᓯᐦᑖᐟ, ᐁᑯᑕ ᑭ ᐊᔮᐤ ᐅᐦᑎᐢᑲᐤ ᐅ ᒥᑭᐋᐧᐱᔨᕽ ᑳ ᑎᐯᔨᐦᒋᑫᔨᐟ; ᓵᓬᐊᒪᐣ ᒫᑲ ᒥᓇ ᑳ ᒫᐊᐧᒋᐦᐃᑐᒋᐠ ᑭ ᓇᑐᐢᑲᒪᐊᐧᑕᒪᐧᐠ. 6 ᓵᓬᐊᒪᐣ ᒫᑲ ᑭ ᓈᑕᒼ ᐅᓵᐋᐧᐱᐢᑯ ᐸᑭᑎᓈᓱᐃᐧᓇᐱᐢᐠ ᐅᐦᑎᐢᑲᐤ ᑳ ᑎᐯᔨᐦᒋᑫᔨᐟ, ᑳ ᐊᔮᔨᐠ ᒫᐊᐧᒋᐦᐃᑐᐃᐧ ᒥᑭᐋᐧᐱᕽ, ᒥᓇ ᑭ ᐸᑭᑎᓈᓱ ᐁᑯᑕ ᑭᐦᒋ ᒥᑖᑕᐦᑐᒥᑕᓇᐤ ᒪᒍᐢᑌᐦᐊᒫᑫᐃᐧᓇ. 7 ᐁᐊᐧᑯ ᐁ ᑎᐱᐢᑳᐠ ᑭᓭᒪᓂᑐ ᑭ ᓄᑯᐦᐃᓱᐢᑕᐁᐧᐤ ᓵᓬᐊᒪᓇ, ᒥᓇ ᑭ ᐃᑌᐤ, ᓇᑐᑕ ᑫᑲᐧᐩ ᑫ ᒥᔨᑖᐣ. 8 ᓵᓬᐊᒪᐣ ᒫᑲ ᑭ ᐃᑌᐤ ᑭᓭᒪᓂᑐᐊᐧ, ᑭ ᑭ ᐋᐧᐸᐦᑕᐦᐋᐤ ᒥᐢᑕᐦᐃ ᑭᓭᐋᐧᑎᓯᐃᐧᐣ ᑌᐱᐟ ᓄᑖᐃᐧ, ᒥᓇ ᑭ ᑭ ᑭᐦᒋ ᐅᑭᒫᑳᓯᐣ ᑭᑕ ᑖᐱᐢᑲᒪᐊᐧᐠ. 9 ᐁᑲᐧ ᑌᐯᔨᐦᒋᑫᔭᐣ ᑭᓭᒪᓂᑐ, ᑭᔮᒼ ᑳ ᑭ ᐊᓱᑕᒪᐊᐧᐟ ᑌᐱᐟ ᓄᑖᐃᐧ ᑭᑕ ᐃᐧ ᐋᔮᑕᐢᑌᐤ; ᒋᑫᒫ ᑭ ᑭ ᐃᓯᐃᐣ ᑭᑕ ᑭᐦᒋ ᐅᑭᒫᑲᑕᐊᐧᑭᐠ ᐊᔨᓯᔨᓂᐊᐧᐠ ᑖᐱᐢᑯᐨ ᐁ ᐱᐋᐧᐊᑳᐠ ᐊᐢᑭ ᐁ ᐃᑌᔭᑎᒋᐠ. 10 ᒥᔨᐣ ᐁᑲᐧ ᐃᔨᓂᓯᐃᐧᐣ ᒥᓇ ᑭᐢᑫᔨᑕᒧᐃᐧᐣ, ᑭᑕ ᐊᐧᔭᐃᐧᔮᐣ ᒥᓇ ᑭᑕ ᐱᐦᑐᑫᔮᐣ ᐁ ᐋᐧᐸᒥᒋᐠ ᐅᑯ ᐊᔨᓯᔨᓂᐊᐧᐠ; ᒋᑫᒫ ᐊᐁᐧᓇ ᑫ ᑭ ᐅᔭᓱᐋᐧᑕᐟ ᐅᐦᐃ ᑭᐟ ᐃᔨᓂᒪ ᑳ ᐃᓯ ᒥᐦᒉᑎᒋᐠ? 11 ᑭᓭᒪᓂᑐ ᒫᑲ ᑭ ᐃᑌᐤ ᓵᓬᐊᒪᓇ, ᒋᑫᒫ ᐅᒪ ᐁ ᑭ ᐊᔮᐠ ᑭᑌᐦᐃᕽ, ᒥᓇ ᐁᑳ ᐁ ᑭ ᐅᐦᒋ ᓇᑐᑕᒪᐣ ᐁᐧᔪᑎᓯᐃᐧᐣ, ᒥᔪᐊᔮᐃᐧᐣ, ᐊᐦᐳ ᑭᐢᑌᔨᑖᑯᓯᐃᐧᐣ, ᐊᐦᐳ ᐅ ᐱᒫᑎᓯᐃᐧᓂᐋᐧᐤ ᐊᓂᑭ ᑳ ᐸᑳᐧᑎᐢᑭᐠ, ᐊᐦᐳ ᐁᑳ ᐁ ᓇᑐᑕᒪᐣ ᑭᓀᐧᐢ ᐱᒫᑎᓯᐃᐧᐣ; ᒫᑲ ᐁ ᑭ ᓇᑐᑌᐢᑕᒫᓱᔭᐣ ᐃᔨᓂᓯᐃᐧᐣ ᒥᓇ ᑭᐢᑫᔨᑕᒧᐃᐧᐣ, ᑭᑕ ᐅᔭᓱᐋᐧᑕᒋᐠ ᓂᐟ ᐊᔨᓯᔨᓂᒪᐠ, ᑳ ᑭ ᑭᐦᒋ ᐅᑭᒫᑳᑎᑖᐣ ᑭᑕ ᑎᐯᔨᒪᒋᐠ; 12 ᐃᔨᓂᓯᐃᐧᐣ ᒥᓇ ᑭᐢᑫᔨᑕᒧᐃᐧᐣ ᑭ ᒥᔨᑲᐃᐧᐣ; ᒥᓇ ᑭ ᑲ ᒥᔨᑎᐣ ᐁᐧᔪᑎᓯᐃᐧᐣ ᒥᓇ ᒥᔪᐊᔮᐃᐧᐣ, ᒥᓇ ᑭᐢᑌᔨᑖᑯᓯᐃᐧᐣ, ᐃᔨᑯᕽ ᐁᑳ ᐁ ᑭ ᐅᐦᒋ ᐊᔮᒋᐠ ᑭᐦᒋ ᐅᑭᒫᐊᐧᐠ ᓂᑳᐣ ᑳ ᑭ ᐊᔮᒋᐠ, ᒥᓇ ᓇᒪᐃᐧᔭ ᐊᓂᑭ ᑫ ᐊᐢᑯᐃᐧᐢᑳᐢᑭᐠ ᐁᑯᓯ ᑭᑕ ᐃᓯ ᐊᔮᐊᐧᐠ. 13 ᓵᓬᐊᒪᐣ ᒫᑲ ᑭ ᐯ ᑭᐁᐧᐤ ᑳ ᑭ ᐃᑐᐦᑌᐟ ᐃᐢᐹᔭᓄᕽ ᑭᐱᔭᓂᕽ ᑳ ᑭ ᐊᔮᐠ ᒫᐊᐧᒋᐦᐃᑐᐃᐧ ᒥᑭᐋᐧᐱᕽ, ᒉᕒᐅᓴᓬᐊᒥᕽ ᑳᐃᐧ ᐁ ᑕᑯᓯᕽ; ᐁᑯᓯ ᑭ ᑭᐦᒋ ᐅᑭᒫᑲᑕᐁᐧᐤ ᐃᐢᕒᐁᐃᓬᐊ. 14 ᓵᓬᐊᒪᐣ ᒫᑲ ᑭ ᒫᐊᐧᒋᐦᐁᐤ ᑎᑎᐱᑖᐸᓈᐢᑲᐧ ᒥᓇ ᐅᑌᑕᐱᐊᐧ; ᐁᑯᓯ ᑭ ᐊᔮᐁᐧᐤ ᑭᐦᒋ ᒥᑖᑕᐦᑐᒥᑕᓇᐤ ᐊᔨᐋᐧᐠ ᓀᐋᐧᐤ ᒥᑖᑕᐦᑐᒥᑕᓇᐤ ᑎᑎᐱᑖᐸᓈᐢᑲᐧ, ᒥᓇ ᒥᑖᑕᐦᐟ ᓂᓱᓵᑊ ᑕᐦᑐ ᑭᐦᒋ ᒥᑖᑕᐦᑐᒥᑕᓇᐤ ᐅᑌᑕᐱᐊᐧ, ᐁᐊᐧᑯᓂ ᒫᑲ ᑭ ᐃᑕᑌᐤ ᑎᑎᐱᑖᐸᓈᐢᑯ ᐅᑌᓈᕽ, ᒥᓇ ᐃᑕ ᐁ ᐊᔮᐟ ᑭᐦᒋ ᐅᑭᒫᐤ ᒉᕒᐅᓴᓬᐊᒥᕽ. 15 ᐁᑯᓯ ᑭᐦᒋᐅᑭᒫᐤ ᑭ ᐃᓯᐁᐧᔪᒋᐁᐤ ᐋᐧᐱᐢᑭᓱᓂᔮᐊᐧ ᒥᓇ ᐅᓵᐃᐧᓱᓂᔮᐊᐧ ᐱᔨᐢ ᑖᐱᐢᑯᐨ ᐊᓯᓂᔭᐠ ᒉᕒᐅᓴᓬᐊᒥᕽ, ᒥᓇ ᒫᓯᑭᐢᑳᑎᑲᐧ ᑖᐱᐢᑯᐨ ᓯᑲᒫᕒ ᒥᐢᑎᑲᐧ ᐋᐧᔭᑎᓈᕽ ᑳ ᐊᔮᔨᐟ, ᐁ ᐃᓯ ᐅᓵᒣᔭᑎᔨᐟ. 16 ᐊᓂᐦᐃ ᒫᑲ ᒥᐢᑕᑎᒪᐧ ᓵᓬᐊᒪᐣ ᑳ ᑭ ᐊᔮᐋᐧᐟ ᐃᒋᑊᑎᕽ ᑭ ᐅᐦᑎᓈᐊᐧᐠ; ᑭᐦᒋ ᐅᑭᒫᐤ ᐅᐟ ᐊᑖᐁᐧᐃᐧᔨᓂᒪ ᑭ ᐅᑎᓀᔨᐊᐧ ᐁ ᐯᒋᑎᓴᐅᒥᐦᐟ, ᐁ ᒫᒪᐃᐧ ᑎᐸᐋᐧᒋᐠ ᐁ ᐯᒋᑎᓴᐅᒥᐦᐟ. 17 ᑭ ᓈᑌᐊᐧᐠ ᒫᑲ, ᒥᓇ ᑭ ᐯᓯᐁᐧᐊᐧᐠ ᐃᒋᑊᑎᕽ ᐅᐦᒋ ᑎᑎᐱᑖᐸᓈᐢᐠ ᓂᑯᑖᐧᓵᐧᐤ ᒥᑖᑕᐦᑐᒥᑕᓇᐤ ᓭᑭᓬᐊ ᐋᐧᐱᐢᑭᓱᓂᔮᐤ ᐁ ᑎᐸᐅᐦᐟ, ᐁᑯᓯ ᒥᐢᑕᑎᒼ ᒥᑖᑕᐦᑐᒥᑕᓇᐤ ᓂᔮᓇᓄᒥᑕᓇᐤ ᐊᔨᐋᐧᐠ; ᐁᑯᓯ ᒥᓇ ᑭᑕ ᐋᐸᒋᐋᔨᐟ ᑲᐦᑭᔭᐤ ᐦᐃᑕᐃᑕᐠ ᐅ ᑭᐦᒋ ᐅᑭᒫᒥᐋᐧᐊᐧ ᒥᓇ ᓯᕒᐃᔭ ᑭᐦᒋ ᐅᑭᒫᐊᐧ ᑭ ᐯᓯᐁᐧᐊᐧᐠ ᐁ ᐯᑕᒪᐋᐧᒋᐠ. |
This Bible text is a corrected edition of the 1908 Western Cree Bible; it is in the public domain.
Canadian Bible Society