ᐱᓬᐃᐱᔭᓇ 1 - Kanāci Kihci Masinahikan

¹ pāl mina timatī, ot atoskēyākana Christ cisas, ē masinahamawācik kahkiyaw okanātisiwa Christ cisas kā ayāwāt anita pilipay, asici kihci ayamihēwiyiniwak mina opamistākēwak:

² kisēwātotakowin mina pēyatakēyimowin ki ka wi ocistamākowāw kisēmanito kotāwinaw mina kā tipēyihcikēt cisas Christ.

³ ni nanāskomāw ni kisēmanitom tahtwāw kēskisitotātakwāwi,

⁴ kākikē tahtwāw ē mawimoscikēstamātakok kahkiyaw mamahtākosiwinihk ē mawimoscikēyān,

⁵ ki wiciiwēwiniwāw ohci ē yakotitāhk miywācimowin nistam ē kisikāk ohci piyis anohc;

⁶ oma mitoni ē itatēyitamān, ana kā ki māci atoskātikoyēk miyo atoskēwin kita mitonitāw isko kita o kisikāmit cisas Christ:

⁷ kā isi kwayaskwahk niya oma kita isi mitonēyimitakok kahkiyaw, wiya nitēihk ē ayāwitakok, cikēmā tāpiskoc ni mamācikwapitikowinihk mina ē nātamawātamihk mina ē āyātastāhk miywācimowin, kahkiyaw ki ki wiciiwānāwāw asici niya nisokamākowin.

⁸ cikēmā kisēmanito ni wāpamik, iyikohk kahkiyaw ē pikiskātitakok o kisēwātisiwinihk Christ cisas.

⁹ oma māka nit isi ayamihān, ki sākihiwēwiniwāw kita wēyoci ayāk awasimē mina awasimē kiskēyitamowinihk mina kahkiyaw nisitawinamowinihk;

¹⁰ ēkosi kita kotēyitamēk anihi kā miywāsiki; kita tāpwēyēk mina ēkā kita nayētāwēyitākosiyēk piyis o kisikāmihk Christ;

¹¹ ē moskinēskākoyēk ē isi minisiwahk kwayaskitātisiwin, cisas Christ ohci kā ayāki, kita kistakimiht mina kita mamicimiht kisēmanito.

¹² ēkwa māka ki natawēyimitināwāw kita kiskēyitamēk, niciwāmitik, anihi kā ki ispayiikoyān ki wicitāmakanwa kita yakotēmakahk miywācimowin;

¹³ ēkosi ohi ni mamācikwapisowina Christ isi wāpahtamwak kahkiyaw kihci simākanisak mina kahkiyaw kotakak;

¹⁴ ēkosi māka osām piko kahkiyaw ociwāmimāwak kā tipēyihcikēt isi, atoskam ē ati maskawēyitahkik ni mamācikwāpisowina ohci, ayiwāk sokēyimowak kita wihtahkik kisēmanito ot itwēwin ēkā kīkway ē kostakik.

¹⁵ ātiht tāpwē wihtamākēwak Christa isawānakēyimowin mina kakwē paskiyākēwin ohci; ātiht mina ē miywēyitahkik:

¹⁶ pēyakwayak itotamwak sākihiwēwin ohci, ē kiskēyitahkik ē itayikawiyān kita pikiskwēstamawātamān miywācimowin:

¹⁷ māka wiya kotakak ācimēwak Christa ē wi pikonikēcik, namawiya tāpwē ē itēyitahkik, ē wi pasikonamawicik āyimisiwin ē mēkwā mamācikwapisoyān.

¹⁸ tānisi māka? piko oma misiwē isi, kispin ē itwāsohk ahpo ē tāpwēhk, Christ ācimāw; ēwako ohci māka ni mamahtākosin, ēhē, mina ni ka mamahtākosin.

¹⁹ cikēmā ni kiskēyitēn oma ni pimāciikowinihk kita ispayik, kit ayamihāwiniwāw ohci mina ē ohcistamākawiyān ot ahcāhkwa cisas Christ,

²⁰ ē isi soki itatēyitamān mina pakosēyimoyān, ēkā kēkway kita nanēpēwiikoyān, māka misiwē sokēyimowinihk, tāpiskoc kākikē, ēkosi ēkwa mina anohc Christ kita kistēyitākohiht niyawihk, kispin pimātisiwin ohci, ahpo nipowin ohci.

²¹ cikēmā niya wiya kita pimātisiyān ēwako Christ, ēkosi kita nipiyān ēwako otisiwin.

²² māka kita pimātisiyān ni wiyāsihk, kispin ēwako otisiyān nit atoskēwin, ēkwa kēkway kē nawasonamān namawiya ni kiskēyitēn.

²³ māka ni wawānēyitēn niswayak isi, ē notē sipwētēyān kita wici ayāmak Christ; cikēmā ēwako ayiwāk miywāsin;

²⁴ māka ēyiwēhk kita ayāyān ni wiyāsihk nawac natawēyitākwan kiyawāw ohci.

²⁵ ē ayāyān māka oma maskawēyitamowin, ni kiskēyitēn kita ayāyān, ēhē, kita wici ayāmitakok kahkiyaw, kita yakotēyēk mina kita mamahtākosiyēk tāpwēyēyitamowinihk;

²⁶ ēkosi ki mamahtākosiwiniwāw kita wēyoci ayāk Christ cisas isi niya kitwām mina wāpamiyēko.

²⁷ kiyām māka piko kit isi pimātisiwiniwāw kita wi naiskamomakan o miywācimowin Christ: ēkosi, kispin kē takosinowānē kita wāpamitakok, ahpo kispin kē otamāpiciwānē, kita pētamān ē isi ayāyēk, ē maskawikāpawiyēk pēyak mitonēyicikanihk, pēyak, ahcāhk ohci ē māmawi wikostamēk tāpwēyēyitamowin miywācimowinihk;

²⁸ ēkā māka kēkway kita ohci sēkiikoyēkok kā nakāskakik: ēwakwānima ē payatē kiskinawācitamāhcik nisiwanātisiwin, māka kiyawāw pimācihowin, kisēmanito māka ohci;

²⁹ cikēmā kiyawāw ki ki pakitinamākawināwāw Christ ohci, namawiya piko kita tāpwētawāyēk, māka mina kita kotakitāyēk wiya ohci;

³⁰ ē ayāyēk ēwako kotakitāwin kā ki isi wāpamiyēk, ēkwa māka kā pēhtamēk ē isi ayāyān.