Valooma 2 - UTESITAMENTI UMPYA

¹ Pwu ndita: Natsikuli itsinge itsa kwibelela uve vi munu ungave vukuvahiga itsinge avange. Mańa tsoni itsu vukummiga ujyunge unnino, tsu vukwitsovela umwa vimwene uvuvivi nuve, ulwakuva nuve tsu vuvomba itsu vukummiga unnino.

² Lola uvwe tulumańile ukuta Unguluve nijaga upwu ikuvahiga avene avivomba tsitsitsi, igolosa jilweli.

³ Lino uve vi munu vi vukuvahiga avivomba tsitsitsi vwu nuve uli pakuvomba tsitso, pwu pange nda vwita ndiponaga ukuńiga Unguluve?

⁴ Pange nda vukuvugilila nuvudekedeke vwa mwene uvuvelye, nulwijumilitso ulwu ikijumilitsa sikutsoni nupwu sikutsoni ita “lya image”? Nda nuvuvweni uvudekedeke vwa mwene ukuta vulonda ukukulotsa kulukilivuko?

⁵ Lola ulwakuva ṅangasu inumbula jyako, ulwakuva najilumańili lusiku nulukilivuko pwu pange utye ndikilundikilaga uluvipo lwa palitsuva lya luvipo upwu Unguluve alavonekaga pavuvalasu ukuta igolosa ukuhiga tsoni.

⁶ Mańa umwene voni alavapa pambombo tsavene mpamato-mpamato uju itsa mwene uju itsa mwene.

⁷ Avikijumilitsa imbombo innonu, avilondela mumwa nuvuvaha nulwimiko navutsilakujaga vwu ikuvapa uvwumi vwa sikutsoni.

⁸ Mańa avikaṅinana avikutsila itsa jilweli, avikutsidika tsene tsitsa mbivi vwu ikuvapa niligoga nuluvipo.

⁹ Ivika nuvukuvilwa nuvusumbe panumbula tsa vanu voni avivomba imbivi. Itengula pan-Juta ikonga pan-Giliki.

¹⁰ Avene avivomba innonu vwu ikuvapa uvuvaha nulwimiko nulunotsehetso. Itengula pan-Juta ikonga pan-Giliki.

¹¹ Mańa Unguluve nikummalila ujyunge umunu mbunnonu kumiho.

¹² Mańa voni avatulile inongwa isimilitso navali natso, vwu valajagaga kitahigilivwa musimilitso. Navoni avatulile inongwa isimilitso vwu vali natso, vwu valahigilivwagwa musimilitso.

¹³ Ndatetsaga vwu vagolosu kwa Nguluve avipulika kwene kukupulika isimiltso, bako avene avikutsikonga isimilitso vwu lweli vwu valatsovwagwa uvugolosu.

¹⁴ Mańa avapanzi sikutsoni upwu vikonga musimilitso vwu navali natso itsene, upwu vita vwu tupelilwe, vwu pwu vipelile ukuva similitso avene, vipelile ukuva tsitso navali natso.

¹⁵ Lola avene vavonike ukuta tsivigilwe munumbula tsavene isimilitso. Vavonike namuńivonelo tsa vene upwu vikivona avene, namuńisagilo tsa vene upwu itsinge tsivungana tsitso tsene, upwu itsinge tsivuja tsibelelanila tsitsu tsene.

¹⁶ Upwu ndita valahigilivwagwa, pwu nditsova palitsuva ilyu avanu voni alavahigilaga mwa Jesu Kilisiti natsitsa kuvutitu inongwa tsa vene, nduvwu nditsova sikutsoni mwivangili ilyu ndikuvavula uńe.

¹⁷ Lola uve vukitsova uvu-Juta, vwitotike isimilitso, vukiginya vwita ndili munu va Nguluve,

¹⁸ utsimańile itsu anogilwe umwene utsimańile tsoni, umwu tsipatukine (ninnonu nimbivi) utsiliṅanitse ulwakuva vupulika sikutsoni isimilitso,

¹⁹ vwivwene vimwene ukuva vi ndongotsi va vabosu, ukuva vi lumuli lwa va-muṅisi,

²⁰ ukuva vi mbungaluhala va vapelwa, ukuva vi mańisi va vańehe, ulwakuva uvwene musimilitso mwu utsivwene itsa vumańi vwoni nitsa jilweli.

²¹ Apene upwu vukuvamańisa avange pwu navukimańisa vimwene. Upwu vwita ndahitsaga, pwu uve vuhitsa.

²² Upwu vwita ndaligupaga, pwu uve vuligupa. Upwu vwita gali mwiko une amanguluve, pwu uve vwigona mwa Tempeli.

²³ Upwu vukiginya vwita uvwe tuli natso isimilitso, pwu uve vukumelula Unguluve nulumeno lwako ulwu vukutsimena isimilitso.

²⁴ Nduvwu livigilwe ilita: Vwu uńe ńi ilitavwa lya Nuguluve ndipelile ukudukwa amadusi mbapanzi.

²⁵ Mańa ukukegetwa kwu kwiki kwu kunnonu ungave vukonga musimilitso. Lola ungave isimilitse utsimenile vwu pwu ukukegetwa kwako kwipelile ukuva kutsilakukegetwa vuvule.

²⁶ Apene angave umwene untsilakukegetwa amalile akongile tsoni itsu Unguluve asimilitse musimilitso atye tsu tsa vugolosu tsitso, nda vwu pwu Unguluve untsilakukegetwa uju ikuntsovaga itetsaga kwu kuva nkegetwa vuvule?

²⁷ Pwu umunu uju uvi pakivumbuko nali nkegetwa uvi atsimalile isimilitso akutsikonga, vi ulavona ikukuhiga uve vi vukutsimena isimilitso vwu uli nakalata va similitso vwu uli nakwo ukukegetwa.

²⁸ Mańa ulatetsaga vwu n-Juta uvi n-Juta mumbele vuvule. Ulatetsaga vwu ikegetilwe uvi akegetilwe vuvule mummana.

²⁹ Bako uvi n-Juta kuvutitu vwu n-Juta jilweli uvi akegetilwe ukukegetwa kwa munumbula ukuhumile kwa Mepo, kwubako ukukongile mukalata vuvule, vwu akegetilwe jilweli. Vi ulwimiko lwamwene navikumwimika avanu, bako umwene alamwimika Unguluve.