Valooma 1 - UTESITAMENTI UMPYA

¹ Nene Pauli ndili nkivaga va Jesu Kilisiti ndi ańilangile ukuta ndive mwapositili ndi ańalile ukuta ndive vakutsova ilivangili lya Nguluve,

² ilyu atsovye ṅani kakatale, ilyu atsovelaga mbańamalago va mwene avalivikile muvakalata avavalatse,

³ ilikuntsova unswambe UJesu Kilisiti unkuludeva vitu, uvi kuluvasu lwa vanu aholilwe mumbeju jya Ndaviti,

⁴ uvi kuluvasu lwa Mepo va vuvalatse avonekye nsipelwa sya maka ukuva vi nswambe va Nguluve upwu atsukage kuvaswe.

⁵ Vi uvi twupilye mumwene nuluhungu nuvwapositili uvwa kunkavila avakutsikonga itsa lwidiko lwa kulyidikila ilitavwa lya mwene nsivumbuko syoni sya vanu.

⁶ Mwu ndi nuńe nsivumbuko isi ńi avilangile UJesu Kilisiti.

⁷ Ndikuvavigila ńivoni ńi vagane va Nguluve ńi ndi mu-Loma, ńi vilangwa ńi vavalatse. Ndikuvapembetsa ndita: Nu-Nguluve udada twivoni nu-Jesu Kilisiti unkuludeva vi avasajage nuluhungu nulunotsehetso.

⁸ Mbulongolo ndikuvasanila ńivoni kwa Nguluve vango, nditsovela mwa Jesu Kilisiti ndita mwalimi ulwakuva ndivwene ulwidiko lwińo lupulikike ikilunga kyoni.

⁹ Namwene Unguluve uvi ndikumbombela mumwuja gwango upwu ndisimilitsa ilivangili lya nswambe, namwene ndita ambwene ukuvakumbuhitsa uńe kitasila.

¹⁰ Mańa sikutsoni muńisajo tsane itsu ndikisaja pwu ndita: Ńnage ju Nguluve ndingave pange ndavonaga ilitsuva ilinge ańidike nune ukuta nditse kwańe kukwa.

¹¹ Mańa ndinogilwe sitso ukwitsa kukuvalola uńe ulwakuva ndita ndikavape akange akakungilwa ka mwa Mepo aka kuvadulusa.

¹² Nditsova ukuta tukahuvitsanye lu lwidiko ulwu tuli nalwo twivoni nuńe nune.

¹³ Lola nandisiha kwańe ńi vajyango nditsige ndisaganitse ukwitsa kwańe, mańa isinge siṅilivwe ukusika kulino ukuta ndipele nakaseke mwańe nda mbapanzi avange.

¹⁴ Mańa ndipelile ukuva nkutsigilwa voni nava-Giliki navakunzi navańaluhala navatsilaluhala.

¹⁵ Mańa ndingave ndale nuńe ńi va mu-Loma ndinogilwe ukuvavula ilivangili ili.

¹⁶ Mańa nandiva nisoni pivangili ulwakuva gwu maka ga Nguluve aga kuvapoka voni avikwidika nun-Juta mbulongolo nun-Giliki vuvule-vule.

¹⁷ Ulwakuva vuvalalwike mumwa uvugolosu uvunogile kwa Nguluve uvwihuma ndwidiko uvulotsa kulwidiko. Nduvwu livigilwe ilita: Uvi vungave uvugolosu vwa mwene vuhumile ndwidiko vi iva nuvwumi.

¹⁸ Mańa uluvipo lwa Nguluve luvalalwike kukyańa itsu vikumwila avanu Unguluve napavugalo vwoni vwa vanu avisiga uvwajilweli vwa Nguluve mbugalo vwavene.

¹⁹ Ulwakuva twoni utwakummańila Unguluve tuli pavuvalasu vatumańile, mańa Unguluve avavulile.

²⁰ Ulwakuva vwoni uvwalo vwa Nguluve uvwa kuvutitu, nditsova amaka ga mwene ga sikutsoni nuvunguluve vwamwene vwoni ndita ikuvuvonya ulwa luhala, ilolela mumbombo tsamwene itsitengwe upwu kyapelilwe ikilunga. Pwu tsijagile itsa kulega.

²¹ Mańa napene ulwakuva vammańile Unguluve napene vakaleka nukumwimika ukuta Nguluve jilweli vakaleka nukusana kumwene. Bako natsene itsu mwisagilaga tsikipela ndindule vuvule. Pwu iṅisi jikagwa munumbula tsavene inzilaluhala.

²² Avene vwu vikiginya vita tuli nuluhala, pwu vakipela ukuva vapelwa vuvule.

²³ Uvwene uvuvaha vwa Nguluve untsilakwanduka vwu vakandula vakahwanihitsa ndikihwani nikya munu unjage nikya sidege nikya ṅanu nikya tunu twoni.

²⁴ Pwu Unguluve akavataga umwuvale mbunogwe vwa munumbula tsavene, akavatagila mbuvivi vwa kwihelula navene imihana.

²⁵ Mańa vatsikilivulaga itsa jilweli itsikuntsova Unguluve vakatsipela ukuva tsa vunwasi. Vakandeka umpeli umwenelwimiko sikutsoni jilweli, vakalutilila pakusyimika sisipelwa syu vakasivombela sisyo.

²⁶ Pwu Unguluve akavataga ukuta vapitsage uvunogwe uvwa kwihelula. Mańa: avadala navene valekile umwu vapelilwe ummana vakilivwe nkuvomba itsu navapelilwi.

²⁷ Navene navagosi vuvule-vule. Valekile ukuva navo avadala nduvwu vapelilwe, vapyilanye navene vene uvwu vahambwike mbunogwe. Ungosi akavomba itsili mwiko nungosi unine, pwu vakikavila mumihana gyavene isihombivwa isyavanogye, isya kuvahomba paluvejangiko lwavene.

²⁸ Nduvwu navene vatetsaga nanogili Unguluve ukummańa, pwu namwene Unguluve akavatagila muńisagilo itsu natsinogili, nukuvomba akavataga ukuta vavombe itsili mwiko.

²⁹ Pwu vudigile uvugalagala vwoni, nuvugalo, nuvunogwasyoni, nuvuvivi vuvule, vigwite nakavini, nuvubudi, nukulwa, nuvuteki, nińiho imbivi.

³⁰ Vahehi, vahovi, vagilila-Unguluve, vańalwiginyo, vagilila-avajyavo, vikiginya vene, vagulaimbivi imya, vilavahotsi.

³¹ Vatsilaluhala, valekalwidiṅano ulwu mwidiṅine navo, vatsilavumańane, vatsilakisa.

³² Avene napene nupwu valumańile uludumulilo lwa Nguluve ulwu adumulye ṅani ulwu atye: Voni avivomba tsitsitsi vali kukuswa kwene napene avene bako vatye nukutsivomba vuvule navene vatye nukuvahekelela avikutsivomba vita vwu vannonu.