ၸ︀ိလ︀ိပ︀်ပ︀ၢႆ︀ 4 - Khamti Shan

ၵ︀ၢမ︀်းꩬ︀င︀်ꩬ︀ွꩫ︀်ꩫ︀ႆ︀ႇၵ︀ဝ်

¹ ပ︀ီႈꩫ︀ွင︀်ႇၵ︀ဝ်ꩴ︀း ꩬ︀ူမ︀ႆ︀ႛက︀ဝ်ႈꩭၢက︀်ႉလ︀ူင︀် ဢ︀ွက︀်ꩡ︀ႂ်ႈလ︀ူင︀်ꩫ︀မ︀်။ လ︀ႆ︀ၢးပ︀ိူဝ်ႈꩬ︀ူꩬ︀ီ က︀ဝ်ႈꩡ︀ူမ︀်းလ︀ူင︀် ꩭုမ︀်လ︀ူင︀်ꩫ︀မ︀်။ ꩬ︀ူ ပ︀ီႈꩫ︀ွင︀်ႇꩭၢက︀်ႉက︀ဝ်ႈ ၸ︀ူႛပ︀ီꩫ︀်ႈꩬ︀ူးက︀ဝ်ႈၵ︀ဝ်ꩴ︀း က︀ၢပ︀်ꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩬ︀ႅတ︀်ႉꩡ︀ႃယ︀င︀်းၵ︀ိူင︀်ꩰက︀ꩫ︀်ႈတ︀ႃႉ။

² ဢ︀ေဝႃတ︀ိꩫ︀ၵ︀ႃꩡ︀ꩫ︀်တ︀ီၵ︀ဝ်ꩴ︀း ꩬ︀ွင︀်ၵ︀ိူဝ်ပ︀ီꩫ︀်ႈလ︀ုက︀်ႉꩬ︀ၢဝ်ၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇꩬ︀ီ ꩬ︀ေႈꩡ︀ႃႉꩬ︀ီ ꩡ︀ႂ်ႈၵ︀ူမ︀်က︀ꩫ︀်ႈတ︀ႃႉ။

³ က︀ူဝ်ႇꩬ︀ေႛꩴ︀း မ︀ႂ်းက︀ေႃႇꩭႂ်ႛပ︀ူဝ်းꩬ︀ွင︀်ၵ︀ႃꩡ︀ႂ်ႈၵ︀ူမ︀်က︀ꩫ︀်ႈꩫ︀ႆ︀ႇ ꩡ︀ွႆ︀ႈꩭႂ်ႛမ︀ႃးတ︀ႃႉ။ ꩬ︀ွင︀်ၵ︀ႃင︀ႆ︀း က︀လ︀ေမ︀ိꩫ︀်င︀ႆ︀း ၸ︀ူႛယ︀ုမ︀်ယ︀မ︀်ႈတ︀ၢင︀်က︀ူဝ်ႇꩫ︀ႆ︀ႇၵ︀ဝ်ယ︀ႃႇ တ︀င︀်းက︀ဝ်ႈၵ︀ၢဝ်ႈၵ︀ၢမ︀်းꩫ︀ီႈ ဢ︀ၢꩫ︀်တ︀ၢꩫ︀်ꩭူမ︀်ႈꩭူဝ်းမ︀ႃးယ︀ဝ်ႇ။ ꩡ︀ိုဝ်ႈၵ︀ဝ်ယ︀ႃႇ ပ︀ၢပ︀်ႉၸ︀ြႃးပ︀ီꩫ︀်ႈꩡ︀ဝ်ႛ ပ︀ၢပ︀်ႉꩡ︀လ︀ၢင︀်းၸ︀ူႛꩫ︀ႆ︀ႛဢ︀ꩬ︀ၢက︀်ႉထႃဝရ︀မ︀ႆ︀ႛ လ︀ွေႛယ︀ဝ်ႇ။

⁴ ꩬ︀ူ တ︀င︀်းၸ︀ြႃးပ︀ီꩫ︀်ႈꩡ︀ဝ်ႛ လ︀ွမ︀်ႈလ︀မ︀်းက︀ꩫ︀်ႈꩬ︀ီ ꩡ︀ူမ︀်းꩭုမ︀်က︀ꩫ︀်ႈတ︀ႃႉ။ က︀ဝ်ႈဝႃႈဢ︀ိက︀်က︀ွတ︀်။ ꩡ︀ူမ︀်းꩭုမ︀်က︀ꩫ︀်ႈမ︀ႃးတ︀ႃႉ။

⁵ က︀ူဝ်ႇလ︀ိူင︀်ႈမ︀ႆ︀ႛက︀ူဝ်ႇလ︀ိူင︀်ႈ ဢ︀ူꩫ︀်ႛꩥ︀ေႈက︀ꩫ︀်ႈတ︀ႃႉ။ ꩡ︀ဝ်ႛယ︀ေꩬ︀ုၵ︀ရ︀ီတ︀်တ︀ီက︀ျွႃးမ︀ႃးꩡ︀မ︀်ႈယ︀ဝ်ႇ။

⁶ က︀ွပ︀်ႉပ︀ိူဝ်ႈက︀ꩬ︀င︀်ပ︀တ︀ု ပ︀ီက︀ပ︀်ႉꩡ︀ႂ်ႈ။ က︀ူႈꩡ︀ွင︀်ႈက︀ူႈလ︀ွင︀်ႈမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ က︀ျေးꩡ︀ူးတ︀ၢင︀်ꩬ︀ီ ဢ︀ꩫ︀်ႈꩬ︀ူꩭၢင︀်ႇꩫ︀ႆ︀ႇ ယ︀ွꩫ︀်းꩬ︀ူးက︀ꩫ︀်ႈတ︀ႃႉ။

⁷ င︀ႆ︀းက︀ီး လ︀ႆ︀ၢးပ︀ိူဝ်ႈꩬ︀ူ ဢ︀ူက︀ꩫ︀်ႛꩫ︀ႂ်းꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀ႆ︀ႇꩬ︀ီ ꩡ︀ႂ်ႈꩬ︀ူ ၵ︀ွꩫ︀်ꩬ︀ူမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ တ︀ၢင︀်းက︀တ︀်ယ︀ီꩫ︀်ႈၵ︀ႅမ︀်းꩬ︀ႃ ဢ︀ꩫ︀်ႈဢ︀ဝ်ႈꩥ︀ႅꩫ︀်က︀ူꩫ︀်းꩭဝ်းꩭလ︀ိုဝ်က︀ေႃႇ ပ︀ွင︀်ꩡ︀ႂ်ႈမ︀ဝ်ꩫ︀ႆ︀ႛꩫ︀ႆ︀ႇꩭႂ်ႛဢ︀ူ။

⁸ ပ︀ီႈꩫ︀ွင︀်ႇၵ︀ဝ်ꩴ︀း ပ︀ႆ︀ၢႈꩭၢင︀်လ︀ေႚလ︀ေႚမ︀ႆ︀ႛ ၵ︀ႂ်ႈဝႃႈꩫ︀ႆ︀ႇယ︀ႃႇ ꩭူဝ်ꩡ︀ႂ်ႈꩬ︀ူမ︀ႆ︀ႛ ဢ︀ꩫ︀်ႈꩬ︀ိုဝ်ႈꩡ︀ႂ်ႈ၊ ဢ︀ꩫ︀်ႈꩫ︀ီႈမ︀ျတ︀်ႉ၊ ဢ︀ꩫ︀်ႈꩥ︀ႃးလ︀ွင︀်ႈ၊ ꩡ︀ႂ်ႈဢ︀ꩫ︀်ႈၵ︀ၢဝ်၊ တ︀ၢင︀်းက︀ႅင︀်းဢ︀ꩫ︀်ႈꩬ︀ႅꩫ︀်ႛ၊ ဢ︀ꩫ︀်ႈက︀ူꩫ︀်းꩫ︀ႆ︀ႇၵ︀ဝ်ꩭုမ︀်ꩫ︀ႆ︀ႇၵ︀ဝ် ꩡ︀ႂ်ႈဢ︀ꩫ︀်ႈမ︀ျတ︀်ႉလ︀ူင︀်ꩬ︀ီ ၵ︀ိူင︀်ႈꩫ︀ီႈယ︀ူဝ်းယ︀ွင︀်ႛꩫ︀ႆ︀ႇၵ︀ဝ်ꩬ︀ိုင︀် ၵ︀ႂ်ႈꩡ︀ႂ်ႈဢ︀ူတ︀ႃႉ။

⁹ ဢ︀ꩫ︀်ႈက︀ဝ်ႈꩬ︀ူမ︀ႆ︀ႛꩬ︀ွꩫ︀်ꩭႂ်ႛꩫ︀ႆ︀ႇၵ︀ဝ် က︀ႃႈꩫ︀င︀်ꩬ︀ူꩫ︀ႆ︀ႛꩥ︀ိꩫ︀်းမ︀ႃး ꩭꩫ︀်မ︀ႃးꩫ︀ႆ︀ႇ က︀မ︀်ႈက︀ႅင︀်းက︀ꩫ︀်ႈတ︀ႃႉ။ င︀ႆ︀းက︀ီး ၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈꩬ︀ူမ︀ႆ︀ႛ ဢ︀ဝ်ႈက︀တ︀်ယ︀ီꩫ︀်ႈၵ︀ျမ︀်းꩬ︀ႃꩭႂ်ႛꩫ︀ႆ︀ႇ တ︀င︀်းꩬ︀ူၵ︀ိင︀်းဢ︀ူ။

ၵ︀ၢမ︀်းတ︀ၢင︀်က︀ျေးꩡ︀ူး က︀ႃႈၵ︀ွင︀်ၸ︀ၢက︀်ꩫ︀ႆ︀ႇၵ︀ဝ်

¹⁰ ꩬ︀ူင︀ႆ︀ႚ က︀ဝ်ႈမ︀ႆ︀ႛ မ︀ႅတ︀်ႉတ︀ႃꩫ︀ႆ︀ႛပ︀ျႃးပ︀ွက︀်ႉမ︀ႃးꩬ︀ီ ꩡ︀ဝ်ႛꩭဝ်းမ︀ႆ︀ႛ က︀ဝ်ႈက︀ျေးꩡ︀ူးတ︀ၢင︀်လ︀ူင︀်ꩫ︀မ︀်။ ဢ︀ꩫ︀်ႈတ︀ေႇတ︀ေႇယ︀ႃႇ ꩬ︀ူက︀ဝ်ႈမ︀ႆ︀ႛတ︀င︀်းꩡ︀ူဝ်ႈ ဢ︀ွက︀်ꩡ︀ႂ်ႈမ︀ႃးꩫ︀က︀ေႃႇ တ︀ၢင︀်းဢ︀ꩫ︀်ႈတ︀ီꩡ︀ွႆ︀ႈမ︀ဝ်ယ︀င︀်းꩬ︀ီꩫ︀မ︀် မ︀ဝ်ꩫ︀ႆ︀ႛꩡ︀ွႆ︀ႈမ︀ႃးꩫ︀ႆ︀ႇꩫ︀ꩫ︀ႆ︀ႇ က︀ဝ်ႈတ︀ွင︀်းဢ︀ူ။

¹¹ ဝႃႈင︀ႆ︀းꩬ︀ီ က︀ဝ်ႈယ︀ပ︀်ယ︀ၢက︀်ႉလ︀ူင︀်မ︀ႃးယ︀ဝ်ႇꩫ︀ꩬ︀ီဝႃႈꩵ︀ႈꩡ︀ႂ်ႈ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး က︀ဝ်ႈယ︀ႃႇ ဢ︀ဝ်ႈဢ︀ꩫ︀်ႈꩫ︀င︀်ၸ︀ူႛꩡ︀ဝ်ႛမ︀ႆ︀ႛယ︀င︀်းꩫ︀ႆ︀ႇ ꩭႂ်ႛပ︀ူဝ်းပ︀ေꩡ︀ႂ်ႈꩡ︀ၢင︀်ႈꩫ︀ႆ︀ႇ ꩭူပ︀်ႉꩭꩫ︀်မ︀ႃးယ︀ဝ်ႇ။

¹² က︀ဝ်ႈမ︀ဝ်ꩫ︀ႆ︀ႛက︀ိꩫ︀်ႈပ︀တ︀ု ꩫ︀ႆ︀ႛက︀ိꩫ︀်ႈဢ︀ိမ︀်ꩰပ︀တ︀ု ꩭၢင︀်ႇꩭိင︀်းပ︀တ︀ု လ︀ူꩫ︀်ႇလ︀ိူဝ်ပ︀တ︀ု ပ︀ီꩫ︀်ႈꩭိုဝ်ပ︀တ︀ု မ︀ိူဝ်ႈလ︀ႂ်ႈပ︀တ︀ု ဢ︀မ︀ႆ︀ႚပ︀တ︀ု က︀ူႈလ︀ွင︀်ႈမ︀ႆ︀ႛꩭႂ်ႛပ︀ူဝ်းပ︀ေꩡ︀ႂ်ႈꩡ︀ၢင︀်ႈꩫ︀ႆ︀ႇ က︀ဝ်ႈꩭူပ︀်ႉꩭꩫ︀် မ︀ႃးယ︀ဝ်ႇ။

¹³ က︀ဝ်ႈမ︀ႆ︀ႛ ꩡ︀ဝ်ႛယ︀ေꩬ︀ုၵ︀ရ︀ီတ︀်တ︀ꩫ︀်းၵ︀ူဝ်းꩭႂ်ႛꩫ︀ႆ︀ႇꩬ︀ီ ဢ︀ꩫ︀်ႈမ︀ꩫ︀်းꩡ︀ဝ်ႛꩭႂ်ႛꩭီတ︀်ꩫ︀ႆ︀ႇတ︀င︀်းလ︀ုင︀် က︀ဝ်ႈꩭီတ︀်ပ︀ီꩫ︀်ႈဢ︀ူ

¹⁴ ꩫ︀ႆ︀ႇꩫ︀က︀ေႃႇ င︀ႆ︀ႚမ︀ိူဝ်ႈက︀ဝ်ႈယ︀ပ︀်ယ︀ၢက︀်ႉꩫ︀ႆ︀ႇ ꩬ︀ူꩡ︀ွႆ︀ႈမ︀ႃးꩫ︀ႆ︀ႇꩬ︀ီ ဢ︀ꩫ︀်ႈꩬ︀ူꩭီတ︀်ꩫ︀ႆ︀ႇ ꩫ︀ီႈလ︀ူင︀်ယ︀ဝ်ႇ။

¹⁵ မ︀ိူဝ်ႈက︀ဝ်ႈꩬ︀ူမ︀ႆ︀ႛ ꩭႃပ︀ထမ︀မ︀ႃးꩭူဝ်းၵ︀ၢဝ်ႈၵ︀ၢမ︀်းꩫ︀ီႈꩬ︀ီ လ︀ုက︀်ႉတ︀ိူင︀်းမ︀ႃက︀ေတ︀ေႃꩫ︀ိမ︀ႆ︀ႛ ဢ︀ွက︀်တ︀ၢင︀်းက︀ႃꩫ︀ႆ︀ႇ ꩬ︀ူꩡ︀ိူဝ်းဝီင︀်းၸ︀ိလ︀ိပ︀်ပ︀ၢႆ︀ꩫ︀ႆ︀ႇၵ︀ဝ်ꩫ︀ႆ︀ၢႈꩫ︀မ︀် က︀ဝ်ႈမ︀ႆ︀ႛဢ︀ဝ်ႈင︀ိူꩫ︀်းꩡ︀ွႆ︀ႈꩬ︀ီ ဢ︀မ︀ူးဢ︀ꩫ︀်ႈက︀ဝ်ႈမ︀ႅက︀်မ︀ႆ︀ႛ တ︀င︀်းက︀ဝ်ႈꩭူမ︀်ႈမ︀ႅက︀်ꩭၢမ︀်ꩡ︀ွႆ︀ႈမ︀ႃးꩫ︀ႆ︀ႇ။ လ︀ွင︀်ႈꩫ︀ႆ︀ႇꩬ︀ူၸ︀ူႛꩡ︀ဝ်ႛက︀ေႃႇတ︀ွင︀်းဢ︀ူ။

¹⁶ မ︀ိူဝ်ႈက︀ဝ်ႈဢ︀ူဝီင︀်း တ︀ႅတ︀်ꩬ︀ႃလ︀ေႃꩫ︀ိက︀်ꩫ︀ႆ︀ႇက︀ေႃႇ ဢ︀ꩫ︀်ႈက︀ဝ်ႈꩭၢင︀်ႇꩫ︀ႆ︀ႇၵ︀ဝ် ပ︀ၢꩫ︀်ႈလ︀ိူင︀်ႈမ︀ဝ်က︀ႃး ꩬ︀ူꩡ︀ွႆ︀ႈမ︀ႃးယ︀ဝ်ႇ။

¹⁷ က︀ဝ်ႈင︀ႆ︀းꩬ︀ီဝႃႈꩫ︀ႆ︀ႇ ၵ︀ႂ်ႈꩫ︀ႆ︀ႛၵ︀ွင︀်လ︀ူꩬ︀ီꩵ︀ႈꩡ︀ႂ်ႈ။ လ︀ုက︀်ႉၵ︀ွင︀်လ︀ူꩬ︀ူမ︀ႆ︀ႛ ꩭႂ်ႛပ︀ူဝ်းꩬ︀ူဢ︀က︀ိဝ်းꩫ︀ႆ︀ႛꩫ︀ႆ︀ႇꩫ︀မ︀်ဝႃႈꩫ︀ႆ︀ႇ။

¹⁸ ၵ︀ွင︀်လ︀ူဢ︀ꩫ︀်ႈꩬ︀ူ ဢ︀ေပ︀ၸ︀ြေႃတ︀ိက︀်မ︀ႆ︀ႛ ၸ︀ၢက︀်မ︀ႃးꩫ︀ႆ︀ႇၵ︀ဝ် က︀ဝ်ႈꩫ︀ႆ︀ႛꩭၢပ︀်ႉꩬ︀ီ ဢ︀ꩫ︀်ႈက︀ဝ်ႈꩭၢင︀်ႇꩫ︀ႆ︀ႇၵ︀ဝ် တ︀င︀်းမ︀ိူင︀်းꩫ︀ႆ︀ႛယ︀ဝ်ႇ။ ၵ︀ွင︀်လ︀ူဢ︀မ︀ႂ်းၵ︀ဝ်ယ︀ႃႇ ၵ︀ႅက︀်ဢ︀ꩫ︀်ႈꩭွမ︀် ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႃးꩡ︀ႂ်ႈꩫ︀က︀ꩫ︀်ႈꩫ︀မ︀်။

¹⁹ င︀ႆ︀းꩫ︀ႆ︀ႇꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛꩭဝ်းက︀ေႃႇ ꩫ︀င︀်မ︀ꩫ︀်းꩡ︀ဝ်ႛ က︀ꩫ︀်ႛꩫ︀ႂ်းꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ မ︀ူꩫ︀်ႈၸ︀ုင︀်းက︀ူႈꩡ︀ွင︀်ႈက︀ူႈလ︀ွင︀်ႈတ︀ီမ︀်ႈက︀ုမ︀်ꩫ︀က︀ꩫ︀်ႈ ဢ︀ꩫ︀်ႈꩬ︀ူꩭၢင︀်ႇꩫ︀ႆ︀ႇတ︀င︀်းမ︀ိူင︀်း ဢ︀က︀ိဝ်းꩭႂ်ႛပ︀ူင︀်ႈပ︀ွက︀်ႉက︀ႃတ︀ႃႉ။

²⁰ ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛꩭဝ်း မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ မ︀ူꩫ︀်ႈꩭႂ်ႛꩭိူဝ်ႈꩭိုင︀်းပ︀ိုင︀်းꩬ︀ႂ်တ︀ီၵ︀ႃႛက︀တ︀ႃႉ။ ꩬ︀ႃႈထု။

ၵ︀ၢမ︀်းလ︀ူပ︀်ꩫ︀ႆ︀ႇၵ︀ဝ်

^21-22 က︀ူꩫ︀်းၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈယ︀ုမ︀်ယ︀မ︀်ႈꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀ႆ︀ႇၵ︀ဝ် က︀ူႈက︀ူဝ်ႇမ︀ႆ︀ႛ က︀ဝ်ႈဢ︀ွက︀်ꩡ︀ႂ်ႈဢ︀ူꩫ︀ꩫ︀ႆ︀ႇ ၵ︀ႆ︀ႈꩭႂ်ႛမ︀ႃးတ︀ႃႉ။ ပ︀ီႈꩫ︀ွင︀်ႇဢ︀ꩫ︀်ႈမ︀ႆ︀ႛယ︀င︀်းꩫ︀ႆ︀ႇၵ︀ဝ်တ︀င︀်းမ︀ိူင︀်းက︀ေႃႇ ꩬ︀ူမ︀ႆ︀ႛဢ︀ွက︀်ꩡ︀ႂ်ႈက︀ꩫ︀်ႈဢ︀ူ။ လ︀ိူမ︀်ꩬ︀ႃပ︀ိူꩫ︀်ႈꩬ︀ီ ပ︀ီႈꩫ︀ွင︀်ႇဢ︀ꩫ︀်ႈꩭိူꩫ︀်းꩡ︀ဝ်ႛꩭူဝ်ꩬ︀ႅင︀်က︀ႄးတ︀ႃမ︀ႆ︀ႛ ꩭီတ︀်ၸ︀ူႛꩡ︀ႂ်ႇꩫ︀ႆ︀ႇၵ︀ဝ် ꩬ︀ူမ︀ႆ︀ႛဢ︀ွက︀်ꩡ︀ႂ်ႈက︀ꩫ︀်ႈဢ︀ူ။

²³ ꩬ︀ူတ︀င︀်းမ︀ိူင︀်းမ︀ႆ︀ႛ ꩡ︀ဝ်ႛယ︀ေꩬ︀ုၵ︀ရ︀ီတ︀်ꩭႂ်ႛဢ︀ီꩫ︀ူႈꩭၢက︀်ႉꩭွမ︀်က︀တ︀ႃႉ။