ፍልብስዩስት እቂዝ 2 - ኽምጣጘ ኣይር ኪዳን

ፈወነ 2 ክርስቶስት ተከድየንት ቲክነነው

¹ ነስየ ክርስቶስትውዝ በርታቐነው ፃይርነቅ ኣቕርነውዝየ፣ ጝፍቅሪዝም ዲብሽትርነቅ ኣቕርነውዝየ፣ መንፈስ ቅዱስ ጅቅም ኽቭር ፃይርነቅ ኣቕርነውዝየ፣ ክታስ ክታይም ስቝርትዝመ ርኽርኽነዝ ቓሊስርነውዝየ፣

² ላው ፍቅርዝ፣ ላው መንፈስዝ፣ ላው ኣለመዝ ኣቕርን ቲስመመነውዝ ይዲስተድየንት ፍፅም ፃቭጥን።

³ ላጥድ ክታጊስ ቺዝጥጘጘ ትኽትነዝ ኻስቭጥንጚ፦ «ይቕምስ» የነውዝ ዊንም፦ «ይጊስለ ኣውኩ» የነው ምክኸዝ ውረውረቅ ፃቭትርነ።

⁴ ክታጊስ ኣውማውድቅ ላየይዙ ኣርወድየንት ኻስቭነጚ ጝቕምቱ ኣርወድየንት ጭቝ ኻስቪነ።

⁵ ክርስቶስ እየሱስትል ዊነው እኒን ኻሰቭድ ክታጭስም ኣነ።

⁶ ጘጝ ኣምላክ ኣቕ ፅባ፣ እደረ ጅቅ እርውደነውድየንት፣ ሊቅጠ ጥውሻው ፃቭ እግዚየውም።

⁷ ዊገድ ግን ጝቕምት ባደው ፃቭ፣ ኣገልጋይዙ ባኽሪድ ፃዩ፤ እቀ ኣራየዝም ጋልፅሽቱ፤

⁸ እጅር ኣቕ እዅርሽም፣ ጝቕምት ዝጥቅ ሹ፤ ክርጘል ኣሽም፣ ያውም ሚስቅልል ሲቅልሽን ክረነውል ኣሽ፣ ኣዚቱ።

⁹ እንዝ ማጥን እደረ ጝት ጭቕጘ ንየስ ንየስ ሹ፤ ሽስቅ ዲቈው ሽም ይዉ።

¹⁰ እንም ሲመይልም ዝቨይልም ዝቨይዝ ሳይልም ፅበውድቅ እጝቅ፣ ጝግርቪዝ እየሱስ ክርስቶስት ሽዝ ግርቨቭሻንስ፣

¹¹ እደረ ኣይርስ ክቭር ኣቓንስ ማጥንም፣ ጝምቸይዝ፦ «እየሱስ ክርስቶስ ኣደረ የጝ» የው ሚዝርዳንስ ማጥን የጝ።

ኣልሚል ብርኻኒዝጘ ኣቭርኸነው

¹² እንዝ ማጥን ቀንሽርነቅ ይፅንወ! ዊትርቅ ኣዚትርነቅ ዊንድርነጘ፣ ነንም ያን ክታጅቅ ዊናንድ ጭቝ ኣቒጝቀ ነን ያን ክታጅቅ እጀው ግርየይዝም ጐውተነውዝመ ኪብርዘነውዝ ክታቓደነድየንት ቐናዝርን ፋፅምጥን።

¹³ እደረ ጝፍቃድድየንት በንርናንስመ ሰራሽርናንስ ማጥን ጘጝ ጝቕም ክታት ቸልስጡ።

¹⁴ ሰራሽርነው ሰቭድየንትቅ ቍርምርም ዪጝቀ ዊንም ተከራክርሺጝቀ ሰራጭጥን።

¹⁵ እንም ጠማም፣ ጭቓም ኣቐው ዅለይዝ ማኽሊል ንፁኻን፣ ነቐፈ እጅርነቅ፣ ኒውርም እጅርነቅ እደረት ቝር ኣቕርን ፅግልውጢዝጘ ኣልሚዝ ኣቭርኽርናንስ የጝ።

¹⁶ ክርስቶስ ተረው ግርየይዝ ይማክኽሸነ ኣጠ ማጥን ርዅየዙ ቃልድየንት ሲቭክጥን፤ እንም ኣቐውዝየ ያን ጊነዝ ውጥዪቀርም፤ ዊንም ይልቕረድ ጊነ ኣቕ እዳቒየውም የነት የጝ።

¹⁷ ዊገድ ግን ክታእምንቲዙ ምስዋይቲል፣ ኣግልግለውቲልም፣ ያን ይቕምም ዝየነው ቍርቫን ኣቕ ቅብጣን፣ ክታእጝቅ ጅቅ ጭቕጘ ዲስ ይጭር።

¹⁸ ክትንም ቈሽ ጘጝት ጭቕጘ ዲስ ይትርነ ጥውሸኵ።

ጢመቲወስስመ ኣፍረዲጡስታ ኣግልግለውትድ

¹⁹ ክታጂጘድየንት ወጭ ዲስ ያንስ ማጥን ጢመቲወስት ቃዝየዝ ክታጐ እፃጭር የር ኣደረ እየሱስስ ቲስፈ ፃቨኵን።

²⁰ ክታገቨይዝቍዝ ጭቕጘ ኻልየው ጢመቲወስትለ ላየ እጅርም እጀር።

²¹ ላጥድ ግን ኣደረ እየሱስትውድ ኣዪጝቀ ጝታቕምቱ ኣርወድ እቻዝጥጘ ውጠውጢሽትጘኵ።

²² ዊገድ ግን ክትን ኣርቕርናንትጘ ጢመቲወስ ዅር ጚር ጅቅ ሰራሻንትጘ ይጅቅ ወንጌልድየንት ኣግልግለነውዝ ጝቕምት ሚዝርስኩ።

²³ እንዝ ማጥን ኣቐው ይገቨድየንት ተረድጨጘ በውዝ ጝት ክታጐ በርስጨ ቲስፈ ፃቨኵን።

²⁴ ያን ይቕምም ቈሽ ክታጐ ተጠር ኣቐጘ ኣደረስ ተማምንጭኩን።

²⁵ እኒዝጘም ይፃምረ ኣቐው፣ ዊተድረይዝጘም ኣቕ ይጅቅ ሰራሸው፣ ክትን ይጭስ በንዘውድየንትቅ ፃቫንስ ማጥን ይጐ እፃቕርነው ይዝን ኣፍረዲጡት ክታጐ ዊስ በርስጨ በንዘው ኣቕ ችጝኩን።

²⁶ ጘጝ ክታእጝቅትቅ በነኵ፤ ጘጝ ፅዊተነውድ ክትን ወሽርናንስቅም ክታቍዝ ጨጝቅሽኩ።

²⁷ እርግጥ ፅዊት ክርጘል ችጝ ዊኑ፤ እደረ ግን ስቝርት ፃቩ፤ ሳቝረውድም ጝጭስ ጭቝ ኣቒጝቀ ኽዝንዝ ዲጊል ኽዝን ቈሺታየጘ ይጭስም የጝ።

²⁸ እንዝ ማጥን እንደ ገነ ጝት ቓልድርናንድ ዲስ ይርናንስመ ይጭጝቅትድም ቀላንስ ማጥን ጝት ክታጐ በርስጨ ደርጥኩን።

²⁹ ነስየ ጝት ክርስቲያን ዚነይዝጘ ፃቭርን ኽየው ዲስተዝ ለምትጥን፤ ጝት ተከቍ እቅድዛትም ኪብርዝጥን።

³⁰ ክትን ጣቀትዝ ችጝሽርን እርውዝትርነ ቸሊርነውድየንት፣ ጘጝ እርውዝጠ ጝርዅየይዝ እኳ ኻዝኒጝቀ ክርስቶስትቍዝ የው ክርጘል ችጝ ዊኑ።