Марк 7 - Хальмг келнд орчулсн Әрүн Бичлһс

Бурхна зааврмудын чинрнь ик

¹ Нег дәкҗ Ерусалимас паршмуд болн закана багшнр ирәд, Исусин өөр цуглрцхав.

² Исусин сурһульчнрин зәрмнь Мошен закаһар һаран уһал уга хот ууҗ бәәсинь тедн үзҗ.

³ Өвкнрин заңшалар болхла, цуг евреймүд болн паршмуд хотан уухиннь өмн һаран тохнятаһар уһах зөвтә бәәсмн.

⁴ Базрас ирчкәд, һаран уһал уга хот уудго сәнҗ. Терүнәс талдан чигн заңшал күцәдг бәәсмн: ааһ-шаңһан, хәәсән, зесәр кесн саван болн ширәһән уһацхадмн.

⁵ Тегәд паршмуд болн закана багшнр Исусас сурцхаҗ: – Тана сурһульчнртн өвкнрин заңшалан юңгад мартҗ бәәхмб? Һаран уһал уга юңгад хот ууҗ бәәхмб?

^6-7 – Әәлдәч Эшьян дегтрт таднла әдл хойр чирәтә улсин тускар иигҗ бичәтә бәәнә: «Эн улс хоосн амарн Намаг күндлнә. Теднә зүркнь Нанас хол бәәнә. Эдн күүнә ухалҗ һарһсн номиг Бурхна ном гиҗ дасхна. Эднә сөгдлһн юмн биш».

⁸ Тадн Бурхна заавриг мартад, әмтнә ухалҗ һарһсн заңшалар бәәнәт.

⁹ Әмтнә һарһсн заңшалар бәәхәр седәд, тадн Бурхна заавриг сольҗит!

¹⁰ Моше таднд иигҗ келлә: «Эк эцк хойрин күндл». Бас «Эк эцк хойран му келсн күн үкх зөвтә» – гисн.

¹¹ Тадн болхла: «Эк эцк хойрт өгх белгәрн Бурхнд бәрц бәрчкләв» – гисн уха әмтнд зааҗанат.

¹² Тер номарн тадн әмтиг эк-эцкән күндлдгинь уурулҗ бәәнәт.

¹³ Сурһҗах заңшаларн тадн Бурхна Үгиг уга кеҗит. Талдан чигн түүнлә әдл кесг юм кеҗит, – гиҗ Исус келв.

¹⁴ Исус олн әмт цуглулад келв: – Мини келсиг соңсад медҗ автн:

¹⁵ Күүнә дотр орсн юмн күүг бузрдулшго. Зуг күүнә зүркнәс һарчах юмн күүг бузрдулхмн.

¹⁶ Соңсхар седснь – соңстн!

¹⁷ Герт орхларн келсн үгиннь утхинь цәәлһҗ өгтн гиҗ, сурһульчнр Исусас сурв.

¹⁸ – Тадн бас ода күртл юм медҗ авад угайт? Күүнә дотр орсн юмн күүг бузрдулшго.

¹⁹ Юңгад гихлә, тер орсн юмн күүнә зүркнд орҗ бәәхш, зуг күүнә геснд орад, һарч одна. (Терүгәрн Исус ямаран болв чигн хот цевр гиҗ зәрлв.)

²⁰ Зуг күүнә зүркнәс һарсн юмн күүг бузрдулна.

^21-22 Күүнә зүркнәс му ухата юмн һарна: аля келһн, хулха келһн, кү аллһн, күүнә авальта дерән негдүллһн, ховдг седкл зүүлһн, хар санлһн, худл келлһн, ичр уга йовдл һарһлһн, үлү үзлһн, кү му келлһн, деегүрдлһн, һәрһллһн.

²³ Цуг эн хорта йовдл күүнә дотрас һарад, күүг бузрдулна, – гиҗ Исус хәрү өгв.

Исус буру номта күүкд күүнд дөң болв

²⁴ Һалильяс һарч йовад, Исус Тир гидг балһсна нег герт ирҗ. Нег чигн күүнд бийән эс медүлхәр седсн бийнь чадсмн биш.

²⁵ Исус ирв гисн зәңгиг нег күүкд күн бас соңсҗ. Энүнә күүкинь хар сәкүсн эзлҗ. Күүкд күн ирәд, Исусин көлд сөгдәд, күүкинь эдгәтхә гиҗ сурҗ.

²⁶ Тер буру номта күүкд күн Сирий һазрин Поник әәмгин күн бәәҗ.

²⁷ – Түрүләд Би бичкн күүкд цадхх зөвтәв. Күүкдәсн өдмг булаҗ авад, нохаст өгч болшголм, – гиҗ Исус күүкд күүнд келҗ.

²⁸ – Деед Эзн, тернь тиим! Болв ширә дор кевтсн нохас чигн күүкдәс үлдсн үлдл иднәлм, – гиҗ хәрү өгв.

²⁹ – Тиим хәрү өгсн төләдән йов, хар сәкүсн чини күүкнәсчн һарч одв, – гиҗ Исус келв.

³⁰ Күүкд күн хәрҗ ирәд, орн деерән кевтсн үрән үзв. Хар сәкүсн түүнәс һарч одҗ.

Исус дүлә кү эдгәв

³¹ Тир балһснасн һарад, Сидон балһсар дәврәд, Исус Декапол һазр талк Һалилья нуурин көвәһүр ирв.

³² Тенд Исус тал тодрхаһар келҗ чаддго болн дүлә кү дахулҗ авч ирәд, һаран күргәд эдгәтхә гиҗ сурцхаҗ.

³³ Исус терүг хооран авч һарад, хойр чикнднь һариннь хурһан орулв. Нульмчкад, тер күүнә келнднь һар күрв.

³⁴ Дарунь Исус деегшән хәләчкәд саналдад: – Эфата! (тернь секгд гидг арамейин келн үг).

³⁵ Тер дарунь дүлә күн соңсдг болв, тодрхаһар экләд келв.

³⁶ Исус эн өвәрц йовдлын тускар бичә күүнд келтхә гив. Зуг кедү бичә келтхә гисн бийнь әмтн зогсл уга, нег-негндән келәд йовцхаҗ.

³⁷ – Энүнә кеһәд йовсн юмн йир сән, дүлә улс соңсдг болна, келн уга улс келдг болна, – гиҗ әмтн ик өврмҗ кеҗ, хоорндан күүндцхәҗ.