Левит 15 - Хальмг келнд орчулсн Әрүн Бичлһс

Залу күүнә цогц-махмудын кирин тускар

¹ Деед Эзн Мошед болн Ахаронд келнә:

² – Израилин улст соңсхад келтн: «Залу күүнә бий мөчәснь һардг кирәс көлтә тиим залу бузр.

³ Залусин бий мөчәс торлго эс гиҗ удандан һарчах ямаран чигн кир терүг бузрдана.

⁴ Тиим залуһин кевтсн орн бузр, терүнә суусн орм бас бузр.

⁵ Терүнә ориг көндәсн күн хувцан уһах, бийән уһахмн болҗана. Асхн күртл тер цевр биш болх.

⁶ Бий мөчәснь кир һарчах залуһин суусн ормд суусн күн хувцан уһах, бийән уһахмн болҗана. Асхн күртл тер цевр биш болх.

⁷ Тиим залуһин махмудтнь һар күрсн күн хувцан уһах, бийән уһахмн болҗана. Асхн күртл тер цевр биш болх.

⁸ Тиим залу цевр күн тал нульмхлаг, тер күн хувцан уһах, бийән уһахмн болҗана. Асхн күртл тер цевр биш болх.

⁹ Юн чигн юмиг унад суусн орм бузр.

¹⁰ Кемр терүнә дор юн чигн бәәсн болхла, терүгинь көндәснь асхн күртл цевр биш болх. Кемр залуһин суусн юмиг өргсн күн хувцан уһахмн, бийән уһахмн болҗана. Тер күн асхн күртл цевр биш болх.

¹¹ Кемр бий мөчәснь кир һарчах залу талдан күүг һаран уһалго көндәхлә, тер күн хувцан уһах, бийән уһах йоста. Асхн күртл тиим күн цевр биш.

¹² Кемр тер залу шавр буһш көндәсн болхла, тер буһшиг хамхлх кергтә. Кемр тер сав модар кегдсн болхла тер савиг уһах кергтә.

¹³ Бий мөчәснь кир һарчах залу эдгхләрн, терүнә хөөн дола хонад хувцан, бийән урсхулын уснд уһатха. Тегәд тер цевр болх.

¹⁴ Нәәмдгч өдртән 2 көглҗрһ эс гиҗ 2 баахн көглҗрһ шову хошадар авад Деед Эзнә өмн Харһлтын Шатрин үүднд зогсад, тедниг гелңд өгтхә.

¹⁵ Гелң тер шовудар бәрц бәрх: негинь килнцәс цеврллһнә бәрцд орулх, хойрдгчинь шаталһна бәрцд орулх. Тиигҗ гелң Деед Эзнә өмн гемән хәрүллһнә авъяс кех, махмудынь кирәс цеврлх.

¹⁶ Асань һарсн залу махмудан кевтнь уһах йоста. Тегәд тер асхн күртл цевр биш болх.

¹⁷ Залуһин аса асхрсн эдәр, эс гиҗ арсар кесн ямаран чигн юмн уһагдх зөвтә. Тер юмс асхн күртл цевр биш болх.

¹⁸ Кемр тер залу күүкд күүнлә кевтәд асаһан һарһсн болхла, хоюрн бийән уһахмн болҗана. Тедн асхн күртл цевр биш.

Күүкд күүнә сарин кирин тускар

¹⁹ Кемр күүкд күүнә махмудас йирдән сарин цусн һарчахлаг, тиигхләг тер долан хонгтан цевр биш болх. Терүг көндәсн күн болһн асхн күртл цевр биш.

²⁰ Цеврлгдҗәсн цагтан кевтсн ормнь, суусн ормнь цугтан цевр биш.

²¹ Терүнә кевтсн ориг көндәсн күн эврәннь хувцан уһах, усар бийән уһах зөвтә. Тер күн асхн күртл цевр биш.

²² Терүнә суусн өлг-эдиг көндәсн кен чигн эврәннь хувцан, бийән уһах зөвтә. Тер күн асхн күртл цевр биш.

²³ Кемр тиим гергнә орн деер өлг-эд бәәсн болхла, кен чигн терүнә суусн орндгиг, эс гиҗ суусн өлг-эдиг көндәсн болхла, асхн күртл тер цевр биш.

²⁴ Кемр залунь терүнлә нииләд унтхла, гергнәннь бузрнь залуднь орх. Тер залу долан хонгтан цевр биш болх. Терүнә кевтсн орн цевр биш.

²⁵ Күүкд күүнәс цеврллһнә цагт биш цусн кесг өдртән һарчахла, эс гиҗ цеврллһнә цагас удандан цусн һарчахла, тиигхлә тер өдрмүдт цугтаднь цеврллһнә цагт әдл тер цевр биш.

²⁶ Цусна кир һарчах өдрмүдлә әдл цеврллһнә цагт тер ямаран чигн орнд кевтхләг, тернь цевр биш болх. Терүнә суусн ямаран чигн өлг-эд цевр биш болх. Цеврллһнә цагла әдл цевр биш болх.

²⁷ Тиим өлг-эд көндәсн күн болһн цевр биш болх, эврәннь хувцан болн бийән тер уһах йоста, асхн күртл цевр биш.

²⁸ Цусн һардган уурхла, долан хонг тоолад тегәд тер цеврдх.

²⁹ Нәәмдгч өдртән тер 2 көглҗрһ, эс гиҗ 2 баахн көглҗрһ шову авад Харһлтын Шатрин үүдн тал гелңгүр иртхә.

³⁰ Гелң нег шовуг килнцәс цеврллһнә бәрцд орулх. Хойрдгч шовуһинь гелң шаталһна бәрцд орулх. Тиигҗ гелң күүкд күүг Деед Эзнә өмн гемән хәрүллһнә авъяс күцәһәд, сарин кирәс цеврлх».

³¹ Тегәд Израилин улсиг цевр биш бәәдләс саглтн. Яһад гихлә тедн дунд бәәх Мини өргә гериг цевр биш бәәдләрн бузрдах. Эс гиҗ тедн үкх.

³² Залу күүнәс һарчах асан кир бийинь бузрдана, тегәд терүнә закан тиим болҗана.

³³ Эннь бас сарин кир һарчах күүкд күүнә, залуһин болн гергнә цеврллһн болҗах өдрмүдт, залу күн бузр гергнлә нииләд кевтснә туск закан.