Левит 12 - Хальмг келнд орчулсн Әрүн Бичлһс

Күүкд күн үр һарһсна хөөтк цеврллһн

¹ Деед Эзн Мошед келнә:

² – Израилин улст күргәд кел: «Кемр күүкд күн көвү һарһхла, тер долан хонгтан киртә болх. Сарин кир ирснлә әдл болдмн.

³ Нәәмдгч өдртнь нилхин әмнә үзүртнь керчлһ кех кергтә.

⁴ Һарчах цуснасн тер күүкд күн 33 хонгтан цеврлгдх. Тер бичә әрүн юм көндәтхә, цеврллһнәсн эс һартл бичә әрүн бәәрн тал өөрдтхә.

⁵ Күүкн үр һарһсн гергн хойр долан хонгтан цевр биш болх. Сарин кир ирснлә әдл болдмн. Терүнә хөөн 66 өдртән һарчах цуснасн тер цеврлгдх.

⁶ Көвү эс гиҗ күүк һарһсна хөөн цеврллһнә болзг чилхлә, Харһлтын Шатрин үүдн тал иртхә. Тенд гелңд нег наста хурһ шаталһна бәрцд орулхин төлә авч иртхә. Дәкәд көглҗрһ эс гиҗ баахн көглҗрһ шовуд килнцәс цеврллһнә бәрц гиҗ авч иртхә.

⁷ Гелң терүнә гемән хәрүллһнә авъяс күцәһәд, Деед Эзнд эн бәрцс гиҗ өгх. Тегәд үр һарһсн күүкд күн һарчах цуснасн цеврлгдх. Эннь көвү эс гиҗ күүк һарһсн гергнә бәрх закан.

⁸ Кемр тер хөөнә хурһ эс авч ирҗ чадхла, тиигхлә 2 көглҗрһ эс гиҗ 2 баахн көглҗрһ шовуд авч иртхә. Нег шовуг шаталһнд орулх, хойрдгчинь килнцәс цеврллһнә бәрцд орулх. Гелң терүнә гемән хәрүллһнә авъяс күцәтхә, тегәд тер цевр болх».