फिलिप्पियां 4 - बिलासपुरी नौआं नियम

¹ इस खातर मेरे प्यारे साथी विश्वासियो, हऊँ तुहां ने बौहत जादा प्रेम कराँ कने तुहांजो मिलणे जो तरसया राँ; तुहें मेरी मौज कने मेरे कम्मां रा ईनाम ये, इस खातर प्यारे मित्रो लगातार प्रभुये पर मजबूतिया ने विश्वास करदे रौआ।

ब्यबहारिक निर्देश

² हऊँ यूओदिया ने बी कने सुन्तुखे ने बी विनती कराँ, भई सै प्रभु च इक जुट हुईने रौ।

³ मेरे सच्चे साथी सन्तुखे तेरेने बी मेरी विनती भई इन्हां जनानां री मदद करयां, ये क्लेमेंस कने मेरे दुज्जे साथियां समेत खुशखबरी फैलाणे च मेरे सौगी जुटी रियां रैईयां, तिन्हांरे नौं जे जीवना रिया कताबा च लिखिरे।

⁴ प्रभु च हमेशा मौज करदे रौआ; हऊँ फेरी भीं बोलां, मौज करा।

⁵ तुहांरी सहनशीलता सारे लोक जाणी सक्को, प्रभु जल्दी औणे औल़ा।

⁶ किसी बी गल्ला री चिन्ता मता करदे; पर हर इक गल्ला च धन्यवादा सौगी प्राथना कने विनतिया च अपणे निवेदन परमेशरा रे सामणे रखदे जावा।

⁷ तां परमेशरा तुहांजो शान्ति देणी सै जे माहणुआं रिया समझा ते बाहर इ, सै जे तुहांरे मना जो कने तुहांरे विचाराँ जो मसीह यीशुये च सुरक्षित रखगी।

⁸ इस खातर साथी विश्वासियो, तिन्हां गल्लां रा ध्यान करा सै जे सच्चियां इ, कने सै गल्लां जे आदर रे लायक इ, कने सै जे किछ ठीक आ, कने सै जे किछ पवित्र आ, सै जे किछ सुन्दर आ, सै जे किछ सराहना रे लायक आ, यनिके कोई बी होर उत्तम गुण या प्रशंसा री गल्लां ओ तिन्हां पर ध्यान लगाया करा।

⁹ सै गल्लां जे तुहें माहते सिखियां, कने ग्रहण कित्तियां कने सुणियां कने मांह च देखियां, तिन्हां गल्लां रा पालन करदे रौआ, तां शान्तिया रे परमेशरा तुहांरे सौगी रैहणा।

दान्ना रे खातर धन्यवाद

¹⁰ तुहें पक्का मेरिया भलाईया रे खातर सोच्चां थे पर तुहांजो मेरी मदद करने खातर मौका नीं मिलया था, पर हुण आखिरकार तुहांजो मेरे बारे च भीं ते चिन्ता जाग्गी, इसते हऊँ प्रभु च बड़ा भरी खुश हुया।

¹¹ किसी जरूरता रिया वजह ने हऊँ ये नीं बोल्ली कराँ, काँह्भई हऊँ चाये केढ़िया बी हालता च रहूँ; मैं तिसच इ सन्तोख करना सिक्खी लरा।

¹² हऊँ थोड़े च बी जीणा सिखी गरा कने ताहली जे मेरले काफी आ तां बी मैं जीणा सिखीरा; हर इक गल्ला कने हर इक हालाता च मैं तृप्त हूणा सिखीरा, ताहली जे मेरले खाणे रे खातर बौहत किछ आ कने बौहत कम आ कने चाये मेरले मेरिया जरूरता ते जादा या कम आ।

¹³ सै जे मिन्जो सामर्थ देआं, तिसरे जरिये हऊँ सब किछ करी सक्कां।

¹⁴ किछ बी हो तुहें मेरे दुखां च मेरी सहायता करीने खरा इ कित्या।

¹⁵ हे फिलिप्पी रे लोको, तुहें त जाणाँ यें खुशखबरिया रे प्रचारा रे तिन्हां शुरु रे दिनां च ताहली जे मैं मकिदुनिया प्रदेश छड्डया था, तां लेणे-देणे रे बारे च सिर्फ तुहांरिया कलीसिया जो छड्डिने किसी होर कलीसिये मेरी सहायता नीं कित्ती थी।

¹⁶ ताहली जे हऊँ थिस्सलुनीके नगरा च था, मेरी जरूरतां पूरी करने रे खातर तुहें कई बार मेरी मदद किति।

¹⁷ हऊँ ये नीं बोलां भई हऊँ उपहार लेणे रा इच्छुक आ, पर तुहांरिया सहायता रिया वजह ते हऊँ तुहांजो परमेशरा री आशीष पान्दे हुये देखणा चाँह।

¹⁸ हुण मिन्जो तुहांरे जरिये भेज्जिरा सब किछ मिलीगरा कने ये बौहत जादा, काँह्भई ये सब इपफ्रदीतुस ल्याईरा कने मैं तिसजो ग्रहण कित्तिरा, सै सुख देणे औल़ी सुगन्ध कने ग्रहण करने लायक बलिदान्ना साई तिसते जे परमेशर खुश हुआं।

¹⁹ कने मसीह यीशुये सै जे कित्या तिसरिया वजह ते मेरे परमेशर तुहांजो अपणे बौहत धना ने सै किछ जे तुहांरी जरूरत इ तिसजो परमेशरा देणा।

²⁰ औआ, अहें हमेशा परमेशरा री स्तुति करिये सै जे अहांरा पिता। आमीन।

आखरी नमस्कार

²¹ यीशु मसीह च सब पवित्र लोकां जो हऊँ नमस्कार बोल्लां। जेहड़े विश्वासी मेरे सौगी ये सै तुहांजो नमस्कार बोल्लां ये।

²² सारे पवित्र लोक, खास करीने सै जे बादशाह रे घराने रे, तुहांजो नमस्कार बोल्लां ये।

²³ प्रभु यीशु मसीह रा अनुग्रह तुहां सब्बीं ने बणीरा रौ।