Efeesoon Asso 1 - KEESAMMI KITAABA

¹ Waa'i doo'llinne Yesuus Kiristoosina asse'amaanchi ihummi Phaawuloosiinsi Yesuus Kiristoosanne amma'nnitakko'oo Waa'i minaadabina

² Niyyanni Waa'iinsii Moollanni Yesuus Kiristoosiinsii eroommii xummii ki'nnuwwina ihona.

Kiristoosinne Siidamoo Ayyaa'n Anceeta

³ Kiristoos kollinne iima'n uullina hasisoo luwwi hundam niina uwwimminne neese maasse'u ni Moollanni Yesuus Kiristoosina anni Waa'i galaxxamaakkoohan ihona.

⁴ Keesammaammoo keenoo miiqakkam luwwi bee'i keenoo inkaa ixxi illagenne hee'nnoommisina uulli qooccamoo'n illageenim Kiristoos kollinne neese doo'llukko.

⁵ Waa'i ixxi sawwitinne doo'llaa Yesuus Kiristoos kollinne ixxena oos inkoommisina gaassaatim iittaa yukkisa issukko.

⁶ Eehid issukkokim iittoo Beet kollinne kora'am niina uwwu lombi yoo eroommina ixxo galaxxinoommisinatte.

⁷ Ixxek eroommi gabal bee'an ihu bikkina ixxi Beet xiiginne ni baaxiilo haafaa neese gatisukko.

⁸ Eekkam ixxaanninne qooroominnee lachchinnee hundinnem neesenne wonshukko.

⁹ Kiristoos kollinne Waa'i gaassaatim sawwu ixxi sawwixxeka issaa ixxi doo'llika maaxamu woshsha niina la'isukko.

¹⁰ Oo ixxi sawwu sawwitim amman afoohaare iimanennee uullannee yoo luwwi hundam mat issaa Kiristoosiinsi woroon isseenatte.

¹¹ Luwwi hundam ixxi sawwaa doo'llukkisa issoo Waa'i gaassaatim sawwukkisinne ixxi oos inkoommisina Kiristoos kollinne neese doo'llukko.

¹² Oohim sirannem Kiristoosa ege'llinummi keen ixxi lombina galata uwwinummuuyyi hee'nnoommisinatte.

¹³ Odim ki'nnuwwa gatisoo hanqo'i mishiraachchi sagara macceessakka'a Kiristoosanne amma'nnitakka'a ixxi uwweena neeyyata aagu Keesammi Ayyaaninnem koobantakko'ookko.

¹⁴ Waa'i lombina galat ihoo'isina ixxi minaadabina neeyyata aagu gatimma a'llineembe'i afeebe'e oo Keesammi Ayyaan niina lubbato.

Phaawuloos Efeesoo'n Mannina Waa'a Uunxukkisa

¹⁵ Moollanni Yesuusanne yoo ki'nnuwwi amma'nnatoo amma'nnaan hunda iittitakkam iittoo macceesummi bikkina

¹⁶ an Waa'a uunxoommi amman hundam ki'nnuwwa tiirummuuyyi Waa'a galaxximma urummi amman bee'e.

¹⁷ Waa'a qoossitakka'a laqqakkamisina qoorimmaa kaaltaa uwwoo Keesammi Ayyaana ki'nnuwwina uwwoo'isina ni Moollanni Yesuus Kiristoosina an lombi yoo Waa'a uunxoommo.

¹⁸ Waa'i hinkido'i neeyyatina weeshuda'ee ixxi minaadabina ixxi biijoominne uwwoo lombaam heechchaa laqqakkamisina ki'nnuwwik woda'n illi fooqoo'isina odim Waa'a uunxoommo.

¹⁹ Ixxonne amma'nninummi neesenne baxukkuuyyi yoo ixxi malaayyi gabal bee'an ihukkisa laqqakkamisinam uunxoommo. Oo gabalbee'i malaayyim

²⁰ Waa'i Kiristoosa lehiinsi ki'isaa iimanenne ixxi makkanne afuussu ammane la'isukkane.

²¹ Eehanniinsim lobok gassaaniinsi, gassimmi malaayyi yoo keeniinsi, malaayyaammuwwiinsii moollanno'iinsii hundiinsim lophphaakkoo summa siixxaa xale'i ka uullannette ihoo'n waaroo uullannem gassookko.

²² Odim hundem luwwim ixxi lokkiinsi woroonette ihoo'isina issukko. Amma'nnaa'n wixxixxi woronnem hundem luwwannem horoor ihoo'isina issukko.

²³ Oo amma'nnaa'n wixxitim Kiristoosina orachcho; Kiristoosim amma'nnaaninnee mulli luwwinnee hundinnem wo'mmaakkoohane.