Salmo 6 - Kalin Diyos

Kararag Di Ipogaw Ay Maligligatan

¹ Adi ka kod yomamyam ya domosdosa, Apo, begew sin bonget mo.

² Maseg-ang ka ta pabikasem kasin nan awak ko, tan enggay kinmapsotak, palalo nan sakit ko.

³ Palalo abe ay magolo nan nemnem ko. Pig-an pay ay pasaldengem nan ligat ko?

⁴ Somagong ka kod ta omisalakan ka, Apo, gapo sin adi manbalbaliw ay layad mo.

⁵ Tan sin kad-an di natey, magay mannemnem en sik-a, sin isdi magay mandayaw en sik-a.

⁶ Gapo sin ladingit ko, kinmapsokapsotak. Linablabi ay man-og-ogaak sin kaseyseyepak, et mabasbasa din pongan ko si lowak.

⁷ Begew sin kalaban ko, kinmapsot nan matak, tan linmadaladag da gapo si kaoogak.

⁸ Dakayo ay mangam-amag si lawa, omaddawi kayo, tan dinngen Diyos din adawag ko,

⁹ et sigurado ay patgana din kararag ko.

¹⁰ Maabak din kalaban ko et emegyat da. Dalasen da ay lomayaw gapo si bain da.