Salmo 4 - Kalin Diyos

Kararag Sin Labi

¹ Sik-a ay Diyos ay mangitonton sin kalintegak, somongbat ka kod mo mankararagak. Magay nanposiposak ed idi sin napaligatak, ngem gapo sin tolong mo, naiwayaanak. Ed wani, someg-ang ka ay Apo, ta dengngem kasin nan adawag ko.

² Dakayo ay ipogaw, pig-an ngin di somaldengan yo ay manglaslasoy ya mangibabain sin kaipogaw ko? Apay nga laylayden yo pay laeng din magay silbi na ya on-onodan yo din baken tet-ewa?

³ Nemnemen yo ay si Diyos et inkasina din matalek ya nadiyosan ay ipogaw para en sisya, isonga din karkararag ko et dengdengngena.

⁴ Manpayegpeg kayo komas egyat yo ya isaldeng yo san basol yo. Mo bomaktad kayo ta maseyep kayo, mannemnem kayo ay kosto.

⁵ Mantalek kayo en Yahweh ay Diyos tako ya idawat yo en sisya di kosto ay daton yo.

⁶ Ad-ado di mangwani, “Sino di mangipasiged sin biyag tako?” O Diyos, ipailam kod en dakami din layad ya seg-ang mo.

⁷ Dakdakdake din ragsak ko ay indawat mo mo din ragsak di ad-adoy inani na ya din ad-adoy danom di obas ay arak na.

⁸ Mo ibaktad ko ay maseyep, natalna di nemnem ko, tan sik-a anggoy, Yahweh, di salaknib ko.