Proverbs 3 - ქართული ბიბლია სრული ვერსია

¹ შვილო ჩემო, ჩემს სწავლებას ნუ დაივიწყებ, და ჩემი მცნებანი დაიცვას შენმა გულმა,

² რადგან დღეგრძელობას, სიცოცხლის წლებსა და მშვიდობას შეგმატებენ შენ.

³ წყალობა და ჭეშმარიტება ნუ დაგტოვებს, შეიბი ისინი ყელზე და დაიწერე გულის ფიცარზე,

⁴ მაშინ ჰპოვებ წყალობასა და სიკეთეს ღმერთისა და კაცის თვალში.

⁵ მიენდე უფალს მთელი გულით და შენს გონებას ნუ დაენდობი.

⁶ ყოველ შენს გზაზე შეიცანი იგი, და ის წარმართავს შენს ბილიკებს.

⁷ ნუ იქნები ბრძენი შენს თვალში; გეშინოდეს უფლისა და განერიდე ბოროტებას.

⁸ მკურნალი იქნება ეს შენი სხეულისთვის და ძალას შემატებს შენს ძვლებს.

⁹ პატივი მიაგე უფალს შენი ქონებით და მთელი შენი ჭირნახულის პირველნაყოფით,

¹⁰ და გაივსება შენი ბეღლები ჭერამდე და მაჭარი აქაფდება შენს საწნახელებში.

¹¹ უფლის წვრთნას, შვილო ჩემო, ნუ უკუაგდგებ და მის შეგონებას ნუ მოიძულებ;

¹² რამეთუ ვინც უყვარს, იმას სჯის უფალი, როგორც მამა – საყვარელ შვილს.

¹³ ნეტარია სიბრძნის მპოვნელი და გონიერების მომხვეჭელი!

¹⁴ რადგან სიბრძნის მოხვეჭა ვერცხლის მოხვეჭას სჯობს, და მისი ქონა ხალასი ოქროს ქონას აღემატება.

¹⁵ თვალ-მარგალიტზე უფრო ძვირფასია იგი და არაფერი სანატრელი არ შეედრება მას.

¹⁶ დღეგრძელობაა მის მარჯვენაში, მის მარცხენაში – სიმდიდრე და პატივი.

¹⁷ მისი გზები საამურია, და მისი ყველა ბილიკი მშვიდობაა.

¹⁸ სიცოცხლის ხეა იგი მის მსასოებელთათვის; ნეტარია, ვინც მას არ დასთმობს.

¹⁹ სიბრძნით დააფუძნა უფალმა დედამიწა, გონებით განამტკიცა ცანი.

²⁰ მისი სიბრძნით უფსკრულები გაიხსნა და ღრუბელნი ცვარს აპკურებენ.

²¹ შვილო ჩემო! ნუ დაიფარება ეს შენს თვალთაგან; შეინარჩუნე გონიერება და განსჯა.

²² და იქნებიან ისინი სიცოცხლე შენი სულისა და სამკაული შენი ყელისა.

²³ მაშინ ივლი უსაფრთხოდ შენს გზაზე და შენი ფეხი არ დაბრკოლდება.

²⁴ როცა დაწვები, არ შეგეშინდება და ტკბილი ძილით დაიძინებ.

²⁵ ნუ შეგაკრთობს უეცარი შიში და ნურც ქარიშხალი, რომელიც ბოროტეულთ ატყდება თავს,

²⁶ რადგან უფალი იქნება შენი საყრდენი და დაიცავს შენს ფეხს მახისაგან.

²⁷ ნუ დაუჭერ სიკეთეს მას, ვისაც სჭირდება, თუ შენს ხელს ძალუძს ამის გაკეთება.

²⁸ ნუ ეტყვი მოყვასს: წადი და ხვალ მოდი და მაშინ მოგცემო, თუ მისაცემელი თანა გაქვს.

²⁹ ნუ განიზრახავ შენი მოყვასისათვის ბოროტს, თუ ის მოგენდო და ცხოვრობს შენთან.

³⁰ ნუ შეედავები ადამიანს უმიზეზოდ, თუ ბოროტი არ შეუმთხვევია შენთვის.

³¹ ნუ შეგშურდება მოძალადისა და ნუ აირჩევ ნურც ერთს მის გზათაგან;

³² რადგან სისაძაგლეა უფლის წინაშე მზაკვრობა, წრფელებს კი დაიახლოვებს იგი.

³³ უფლის წყევლაა ბოროტეულის სახლზე, ხოლო მართალთა საცხოვრისს აკურთხებს იგი.

³⁴ მკრეხელებს დასცინის, თავმდაბლებს კი მადლს აძლევს იგი.

³⁵ ბრძენნი პატივს დაიმკვიდრებენ, ხოლო ბრიყვთა ხვედრი დამცირებაა.