Proverbs 27 - ქართული ბიბლია სრული ვერსია

¹ ნუ იქადი ხვალინდელი დღით, რადგან არ იცი, ეს დღე რას მოიტანს.

² ნუ შეიქებ თავს, სხვამ შეგაქოს; სხვამ, და არა შენმა ბაგეებმა.

³ ლოდი მძიმეა და არც ქვიშაა მსუბუქი, ხოლო სულელის რისხვა ორივეზე მძიმეა.

⁴ მრისხანება სისასტიკეა, ბრაზი – წამლეკავი, შურს კი ვინ აღუდგება წინ?

⁵ ცხადი მხილება სჯობს დაფარულ სიყვარულს.

⁶ მეგობრის სილა გერჩივნოს მტრის კოცნას.

⁷ მაძღარი თაფლსაც დაიწუნებს, მშიერს კი მწარეც ტკბილი ჰგონია.

⁸ სახლიდან გადახვეწილი კაცი მსგავსია ბუდემოშლილი ჩიტისა.

⁹ ზეთი და საკმეველი გულს ახარებს, მაგრამ მეგობრის რჩევა უფრო ტკბილია.

¹⁰ შენს მეგობარსა და მამაშენის მეგობარს ნუ მიატოვებ, და შენი ძმის სახლში ნუ წახვალ შენი გასაჭირის დღეს. კარის მეზობელი გერჩიოს შორს მყოფ ძმას.

¹¹ დაბრძენდი, შვილო, და გამიხარე გული; და მეც სათქმელი მექნება მოწინააღმდეგისთვის.

¹² გონიერი ხედავს საფრთხეს და იმალება, გულუბრყვილო კი ჯიქურ მიდის და ისჯება.

¹³ აიღე მისი მოსასხამი, რადგან უცხოს დაუდგა თავდებად, და უცხოტომელის წილად გაცემული გირაოც.

¹⁴ ხმამაღალი მისალმება დილაუთენია წყევლად ჩაეთვლება მიმსალმებელს.

¹⁵ რაღა ცივი წვიმა და რაღა ანჩხლი ცოლი;

¹⁶ მისი შემკავებელი ქარს აკავებს და მუჭით ზეთს იჭერს.

¹⁷ რკინა რკინას ლესავს და კაცი კაცს.

¹⁸ ვინც ლეღვს უვლის, მის ნაყოფს იგემებს და ბატონის მომვლელს პატივი არ მოაკლდება.

¹⁹ როგორც წყალში ირეკლება კაცის სახე, ისე ირეკლება გული – გულში.

²⁰ როგორც შავეთი და ჯოჯოხეთი ვერ გაძღება, ისე – კაცის თვალი.

²¹ ვერცხლი ბრძმედში იწრთობა გამოხურვებით, ოქრო – ქურაში, კაცი კი ქებით გამოიცდება.

²² ფილაშიც რომ ნაყო სულელი, სიბრიყვეს ვერ მოაცილებ.

²³ იცოდე შენი სამწყსოს ზნე და იზრუნე ფარაზე,

²⁴ რადგან საუკუნო არა არის სიმდიდრე და მუდამ არც გვირგვინი გადადის თაობიდან თაობაზე.

²⁵ ბალახი ჭკნება, მაგრამ ამოიწვერება ახალი ჯეჯილი, და გადაითიბება მთის კალთები;

²⁶ გეყოლება ცხვარი სამოსისათვის და თხა – მინდვრის საფასურისთვის,

²⁷ თხის რძე საკმარისი გექნება სახლეულისა და მონა-მხევალთა სარჩენად.