Proverbs 20 - ქართული ბიბლია სრული ვერსია

¹ ღვინო კაცს მასხარად აქცევს, მაგარი სასმელი – შფოთს ატეხინებს და მისით გზას აცდენილი უჭკუოა.

² მეფის რისხვა ლომის ბრდღვინვას ჰგავს და ვინც მას განარისხებს, თავს საფრთხეში იგდებს.

³ შუღლის აღკვეთა ღირსეული საქციელია, სულელი კი შფოთის ამტეხია.

⁴ ზარმაცი თავის დროზე არ ხნავს, მკის დროს კი დაფაცურდება, მაგრამ რას მოიმკის?

⁵ კაცის გულის ზრახვები ღრმა მორევია, გონიერი კაცი კი ამოზიდავს მათ.

⁶ ბევრი იქადის თავისი სიკეთით, მაგრამ საიმედო ადამიანს სად ნახავ?

⁷ ნეტარია მისი მოდგმა, ვინც მართალია და უზაკველად ატარებს ცხოვრებას;

⁸ მეფე, რომელიც მსაჯულის ტახტზე ზის, ყოველგვარ ბოროტებას აქარწყლებს თვალის გადავლებით.

⁹ ვის შეუძლია თქვას: „მანკიერება არ არის ჩემს გულში, მე განვიწმიდე ჩემი ცოდვებისაგან?“

¹⁰ მრუდე საწონი და მრუდე ადლი – ერთიც და მეორეც სძულს უფალს.

¹¹ ბავშვებიც კი ამჟღავნებენ თავს თავიანთი საქციელით, სწორი თუ არასწორი მოქმედებით.

¹² გამგონე ყური და დამნახავი თვალი – ორივე უფლის შექმნილია.

¹³ ძილისგუდა ნუ იქნები და არ გაღატაკდები. თვალს ნუ მოხუჭავ და პური გექნება.

¹⁴ „არ ვარგა, არ ვარგა“ – ამბობს მყიდველი, – ცოტას გაივლის და ნავაჭრით ტრაბახობს.

¹⁵ არსებობს ოქრო და მრვალი თვალ-მარგალიტი, მაგრამ ყველაზე დიდი განძი მცოდნე ბაგეებია.

¹⁶ აიღე მისი სამოსი, ვინც უცხოს დაუდგა თავდებად; გამოართვი უცხოელისთვის მიცემული გირაო.

¹⁷ არამად ნაშოვნი პური ეტკბილება კაცს, ბოლოს კი ბელტებით აევსება პირი.

¹⁸ გეგმები რჩევით მწიფდება; ომიც სიბრძნით უნდა მომზადდეს.

¹⁹ ჭორიკანა საიდუმლოს გამცემია, პირმორღვეულს ახლოს ნუ გაიკარებ.

²⁰ დედ-მამის მაგინებელს სანთელი ჩაუქრება უკუნეთ ღამეში.

²¹ ნაჩქარევად მოპოვებული სამკვიდრო ბოლოს უკურთხეველი დარჩება.

²² ნუ იტყვი: „მივაგებ ბოროტს სანაცვლოს“, უფალს მიენდე და ის დაგეხმარება.

²³ ყალბი საწონები სძულს უფალს, და მრუდი სასწორი არ არის კარგი.

²⁴ კაცის ნაბიჯებს უფალი წარმართავს; მაშ როგორ გაიგებს ადამიანი საკუთარ გზა-კვალს?

²⁵ მახეა კაცისთვის ნაჩქარევი სიტყვები: „ეს წმიდაა“ და დაუფიქრებლად მიცემული აღთქმა.

²⁶ ბრძენი მეფე გაფანტავს უკეთურთ და კევრით გალეწავს მათ.

²⁷ კაცის სული უფლის სანთელია, აშუქებს გულის ყველა კუთხე-კუნჭულს.

²⁸ მოწყალება და სიმართლე იცავენ მეფეს, და სამართალი განამტკიცებს მის ტახტს.

²⁹ ჭაბუკთა დიდება მათი ძალაა, მოხუცთ კი ჭაღარა ამშვენებთ.

³⁰ დარტყმა და ჭრილობა ბოროტისგან განმწმედია, გვემა კი კაცის შინაგანს ასუფთავებს.