ʻO KA ʻEPISETOLE A PAULO KA LUNAʻŌLELO I KO PILIPI 3 - Ka Baibala Hemolele

1 Ua aʻo aku ia iā lākou e makaʻala i ka poʻe kumu hoʻopunipuni.

MOKUNA III.

¹ ¶ No nā mea i koe, e nā hoahānau oʻu, e ʻoliʻoli ʻoukou i ka Haku. ʻAʻole oʻu luhi ke palapala aku iā ʻoukou i nā mea like, a he mea pono hoʻi ia no ʻoukou.

² E makaʻala ʻoukou i nā ʻīlio, e makaʻala i ka poʻe hana ʻino, e makaʻala hoʻi i ka poʻe i ʻokiʻoki ʻia.

³ No ka mea, ʻo kākou ka poʻe i ʻoki poepoe ʻia, ka poʻe hoʻomana i ke Akua me ka naʻau, me ka hauʻoli iā Kristo Iesū, ʻaʻole nō e paulele i ko ke kino;

⁴ akā, ʻo wau paha ka mea hiki ke paulele ma ko ke kino. Inā paha e manaʻo kekahi he mea iā ia e paulele ai ma ko ke kino, he nui aku hoʻi kaʻu.

⁵ Ua ʻoki poepoe ʻia au i ka pō ʻawalu, no ka lāhui kanaka o ʻIseraʻela, no ka ʻohana o Beniamina, he Hebera hoʻi no nā Hebera, a he Parisaio ma ke Kānāwai.

⁶ No ka manaʻo ikaika, hoʻomaʻau akula au i ka ʻekalesia; a ma ka pono o ke Kānāwai, ʻaʻole oʻu hala.

⁷ Akā, ʻo nā mea aʻu i pōmaikaʻi ai, lilo aʻela ia i kuʻu manaʻo i mea pohō no Kristo.

⁸ ʻOiaʻiʻo hoʻi, ke manaʻo nei au i nā mea a pau, he mea pohō ia i loaʻa mai ai ka maikaʻi o ka ʻike iā Kristo Iesū i kuʻu Haku; nona au i hoʻolei ai i nā mea a pau, a ke manaʻo nei au, he ʻōpala wale nō ia i loaʻa ai iaʻu ʻo Kristo,

⁹ i loaʻa hoʻi au i loko ona, ʻaʻole e paʻa ana i kaʻu pono ma ke Kānāwai; akā, i ka pono ma ka manaʻoʻiʻo iā Kristo, ʻo ia ka pono mai ke Akua mai ma ka manaʻoʻiʻo;

¹⁰ i ʻike hoʻi au iā ia, me ka mana o kona ala hou ʻana mai, a me ka hoʻokahi ʻana o kona hōʻino ʻia, i hoʻohālike ʻia aku me kona make ʻana;

¹¹ malia paha e hiki aku auaneʻi au i ke ala hou ʻana o ka poʻe i make.

¹² No ka mea, ʻaʻole i loaʻa iaʻu i nēia manawa, ʻaʻole hoʻi au i hemolele; akā, ke hahai aku nei au, i lālau aku ai au i ka mea i lālau ʻia mai ai au e Kristo Iesū.

¹³ E nā hoahānau, ma kuʻu manaʻo iho, ʻaʻole au i lālau aku; akā, ʻo kēia hoʻokahi kaʻu e hana nei, e hoʻopoina ana au i nā mea i hala ma hope, a e kīkoʻo aku ana au i nā mea ma mua,

¹⁴ ke holo ikaika aku nei au ma ka hōʻailona, i loaʻa iaʻu ka lei o ka poʻe a ke Akua i hea mai ai no luna mai ma o Kristo Iesū lā.

¹⁵ ʻO nā mea a pau e ake e hemolele, e manaʻo kākou ia mea; a inā he manaʻo ʻokoʻa ko ʻoukou i kekahi mea, na ke Akua hoʻi ia e hōʻike mai iā ʻoukou.

¹⁶ Akā, ʻo ka mea i loaʻa iā kākou, e haele kākou ma ke kānāwai hoʻokahi nei, e manaʻo hoʻi kākou i ka mea hoʻokahi.

¹⁷ ¶ E nā hoahānau, e hoʻohālike pū ʻoukou me aʻu, e nānā pono hoʻi ʻoukou i ka poʻe hele like me mākou i kumu hoʻohālike na ʻoukou.

¹⁸ (No ka mea, he nui nō ka poʻe e hele ana, aʻu i haʻi pinepine aku ai iā ʻoukou, a ʻānō hoʻi ke haʻi aku nei au me ka uē ʻana, he poʻe ʻenemi lākou i ke keʻa o Kristo;

¹⁹ ʻo ka make ko lākou hope, ʻo ka ʻōpū hoʻi ko lākou akua, a ma ka mea hilahila ko lākou nani, ke manaʻo nei hoʻi lākou i nā mea o ka honua.)

²⁰ Akā, ʻo ko kākou noho ʻana, aia nō ia ma ka lani; ke kali nei hoʻi kākou i ka Mea Hoʻōla, ʻo ia ka Haku Iesū Kristo no laila mai;

²¹ nāna e hoʻololi aʻe ko kākou kino haʻahaʻa, i lilo ia i ʻano like me kona kino nani, ma ka mana e hiki ai iā ia ke hoʻolilo i nā mea a pau nona.