Руфа 4 - Коми Библия 2023

Руфаӧс гӧтырӧ босьтӧм

¹ Вооз локтіс карса дзиръя дорӧ да пуксис. Сійӧ аддзис, мый локтӧ сылӧн рӧдвужысь морт, код йылысь сёрнитіс Руфакӧд. Вооз шуис сылы: «Лок татчӧ, пуксьы». Мӧдыс локтіс да пуксис.

² Вооз корис карса юрнуӧдысьясысь дас мортӧс да шуис налы, мед пуксясны. Найӧ пуксялісны.

³ Аслас рӧдвуж мортлы Вооз шуис: «Ноеминь, коді локтіс Моав муысь, вузалӧ миян Элимелек вокнымлысь видз-мусӧ.

⁴ Та йылысь ме кӧсйи сёрнитны тэкӧд. Тані пукалысьяс да войтырлӧн юрнуӧдысьяс дырйи тэ верман ньӧбны мусӧ. А он кӧ кӧсйы ньӧбны, висьтав, медым ме тӧді. Тэысь водзджык некод оз вермы ньӧбнысӧ, а он кӧ ньӧб, ме верма». Рӧдвуж мортыс воча шуис: «Ме ньӧба».

⁵ Вооз шуис сылы: «Тэ кӧ ньӧбан Ноеминьлысь видз-мусӧ, сэки моавса Руфаӧс, кодлӧн верӧсыс кулӧма, тэныд ковмас гӧтырӧ босьтны. Но сійӧ кӧ чужтас пиӧс, оз тэнад, а кувсьӧм верӧсыслӧн нимыс овмӧс вылас кольӧ».

⁶ Та бӧрын рӧдвуж мортыс шуис: «Ме ог вермы ньӧбны Ноеминьлысь мусӧ, ӧд менам пиянлы тайӧ муыс оз вудж. Тэ ньӧб тайӧ мусӧ, ме ог вермы».

⁷ Важӧн Израиль войтыр мусӧ ньӧбигӧн либӧ мӧдлы вуджӧдігӧн сёрнитчӧмсӧ вынсьӧдлісны тадзи: ӧтарыс пӧрччыліс ассьыс кӧмсӧ да сетліс сійӧс мӧдыслы [кодлы вуджӧ вӧлі рӧдыслӧн муыс] – тайӧ вӧлі сёрнитчӧм йылысь пасӧн Израиль войтыр пӧвстын.

⁸ «Ньӧб аслыд», – шуис рӧдвуж морт Воозлы. Сэсся пӧрччис кӧмсӧ [да сетіс сылы].

⁹ Вооз шуис юрнуӧдысьяслы да став йӧзыслы: «Ӧні ті кылінныд, мый ме ньӧба Ноеминьлысь ставсӧ, мый вӧлі Элимелеклӧн, Килионлӧн да Махлонлӧн.

¹⁰ Моавса Руфаӧс, Махлонлысь дӧваӧс, аслым гӧтырӧ босьта, медым кулӧм верӧсыслӧн нимыс овмӧс вылас коляс да сылӧн рӧдыс оз быр чужан карсьыс. Ті тайӧс ставсӧ кывлінныд да аддзылінныд».

¹¹ Карса дзиръя дорын став йӧзыс да юрнуӧдысьяс шуисны: «Да, ми кывлім да аддзылім. Тэнад керкаӧ пырысь гӧтыртӧ Господь мед вӧчас Ракель да Лия кодьӧн, кодъяссянь чужис Израиль войтыр. Озырмӧдчы Епрафаын, нимав Виплиемын!

¹² Тайӧ том аньыслы Господь мед отсалас чужтыны тэныд уна ныв-пиӧс. Сэки тэнад котырыд лоӧ Пареслӧн кодь, кодӧс Фамар чужтіс Иудалы».

¹³ Вооз босьтіс Руфаӧс гӧтырӧ да узис сыкӧд. Господь сетіс Руфалы кынӧмасьны, и сійӧ чужтіс пиӧс.

¹⁴ Ноеминьлы аньяс шуисны: «Ошкӧм Господьлы, коді эз коль тэнӧ питӧг! Мед лоас нималана тайӧ кагаыс Израильын.

¹⁵ Сійӧ лоӧ гажӧдысьӧн да вердысьӧн тэнад пӧрысь кадӧ, ӧд тэнӧ радейтысь моньыд чужтіс сійӧс! Тэнад моньыд сизим пи дорысь на бурджык».

¹⁶ Ноеминь босьтіс пузчужӧм кагаӧс ки вылас. Сійӧ кутіс тӧждысьны кага вӧсна.

¹⁷ Орчча олысь аньяс сёрнитісны, Ноеминьлӧн пӧ пи чужӧма. Кагалы Овид ним пуктісны. Овид лои Ессейлӧн батьӧн, а Ессей – Давидлӧн батьӧн.

¹⁸ Пареслӧн рӧдыс татшӧм: Пареслӧн чужис Хецрон,

¹⁹ Хецронлӧн – Рам, Рамлӧн – Аминадав,

²⁰ Аминадавлӧн – Наашон, Наашонлӧн – Салмон,

²¹ Салмонлӧн – Вооз, Воозлӧн – Овид,

²² Овидлӧн – Ессей, Ессейлӧн – Давид.