Наум 3 - Коми Библия 2023

¹ Курыд шог вир кисьтысь карлы! Сійӧ тырӧма ылӧгӧн, виалӧмӧн, сэні дугдывтӧг куштӧны-мырддялӧны.

² Сэні кылӧ орсӧн швичйӧдлӧм, гӧгыльяслӧн грымгӧм. Вӧвъяс гӧрдлӧны, тарантасъяс грымакылӧны.

³ Тӧвзьӧны вӧвъяс вылын верзьӧмаяс, лӧсталӧны шыпуртъяс, югъялӧны шыяс. Виӧмаясӧс он вермы лыддьыны, налӧн шойясыс лыдтӧм-тшӧттӧмӧсь, йӧзыс крукасьлӧны тайӧ шойясас.

⁴ Ставыс тайӧ суис кырсалысь карӧс сылӧн ёна кырсалӧмысь. Сійӧ вӧлі мича, кужис тшыкӧдчыны, кырсалӧмнас сійӧ ылӧдліс войтыръясӧс, тшыкӧдчӧмнас – чужанкотыръясӧс.

⁵ Ме сувта тэныд паныд, – висьталӧ Господь Саваоф. – Ме лэпта тэнсьыд паськӧм пӧлатӧ да плавга сійӧс чужӧм вылад. Тэнсьыд куш яйтӧ Ме петкӧдла войтыръяслы, тэнсьыд яндзимтӧ – йӧз муын олысьяслы.

⁶ Ме лыйла тэнӧ пежторъясӧн, зывӧкта тэнӧ да янӧда йӧз водзын.

⁷ Тэнӧ аддзысьяс пышъясны тэ дінысь да шуасны: «Ниневия карӧс бырӧдӧма!» Некод оз кут бӧрдны сы вӧсна, некод оз бурӧд сійӧс.

⁸ Тэ нинӧмӧн абу бурджык Но-Аммонысь, египетса юркарысь, коді сулаліс Нил ю дорын. Сійӧс быдладорсянь кытшаліс ва, юыс видзис сійӧс, вӧлі сылы зумыд стенмӧн.

⁹ Эфиопия да Египет вӧліны сылӧн ыджыд вынӧн, Пут да Ливия муясын олысьяс отсалісны сылы.

¹⁰ Но сійӧс тшӧтш нуӧдісны пленӧ, сылысь кагаяссӧ виисны туйвежъясын, сылӧн нималана йӧзыс вӧсна пудъясисны, став сылысь тӧдчана йӧзсӧ дорисны чепъясӧн.

¹¹ Тэ тшӧтш коддзытӧдзыд юан тайӧ чашасӧ, тэ тшӧтш пондан корсьны вӧрӧгысь дорйӧм.

¹² Тэнад изкаръясыд – кисьмӧм инжир пу кодьӧсь. Пусӧ кӧ пыркнитан, вотӧсыс веськыда вомас усяс сёйны кӧсйысьлы.

¹³ Тэнад тышкайӧзыд аньяс кодьӧсь, тэнад муын дзиръяясыд гурйыв восьсаӧсь вӧрӧгыдлы, биыс сотӧма тэнсьыд тасъястӧ.

¹⁴ Дасьты ватӧ, ӧд тэнӧ лоӧ кытшалӧма, ёнмӧд ассьыд изкаръястӧ, мун да таляв сёйтӧ, дасьты пачтӧ, вӧч кирпичьястӧ.

¹⁵ Но тэнӧ бырӧдас би, виас шыпурт. Весиг кӧ тэ рӧдман саранча мында, биыс бырӧдас тэнӧ.

¹⁶ Тэнад вузасьысьыд енэжвыв кодзув дорысь на унджык, но найӧ саранча моз разаласны-бырасны.

¹⁷ Тэнад чина йӧзыд – саранча мында, тэнад тышкайӧзӧн веськӧдлысьясыд – геб мында. Кӧдзыд дырйи найӧ дзебсьӧны стен костӧ, а кор петӧ шондіыс, найӧ лэбзьӧны, и он нин тӧд, кӧнӧсь найӧ.

¹⁸ Ассурса ӧксы, тэнсьыд войтыртӧ видзысьясыд узьӧны, тэнад тышкайӧзӧн веськӧдлысьясыд куйлӧны. Тэнад войтырыд разалӧма керӧсъяс пасьтала, некодлы найӧс чукӧртнысӧ.

¹⁹ Тэнсьыд дойястӧ некод оз бурдӧд, найӧ ёна висьӧны. Тэ йылысь юӧрсӧ кылысьяс кутасны клопайтны, ӧд унаӧн тӧдлісны тэнсьыд куслытӧм скӧрлунтӧ.