Микей 4 - Коми Библия 2023

Локтана лӧнь кад

¹ Тадзи лоӧ бӧръя кадӧ: сійӧ керӧсыс, кӧні сулалӧ Господьлӧн крамыс, лоӧ став керӧссьыс на джуджыдджык, став мыльксьыс на вылынджык. Сэтчӧ дугдывтӧг кутасны локны войтыръяс.

² Найӧ чукӧртчасны да шуасны ӧта-мӧдныслы: «Локтӧй, каямӧй Господьлӧн керӧс вылӧ, Яков Енлӧн крамӧ! Господь индас миянлы Ассьыс туйсӧ, медым ми ветлім Сылӧн туйясӧд». Сионсянь воас Индӧдыс, Ерусалимсянь – Господьлӧн кывйыс.

³ Господь отсалас воны ӧти кывйӧ войтыръяслы, кутас веськыда мыждыны ылі муясысь вына чужанкотыръясӧс. Сэки йӧзыс дорасны шыпуртъясысь гӧръяс, шыясысь – чарлаяс. Войтыръяс ӧта-мӧдныслы паныд оз нин лэптыны шыпуртсӧ, водзӧ оз нин кутны велӧдчыны тышкасьны.

⁴ Но быдӧн кутас пукавны аслас виноград йӧрын, аслас инжир пу улын, некод оз кут найӧс повзьӧдлыны. Тадзи висьталіс Господь Саваоф.

⁵ Быд войтыр юрбитӧ аслас енлы, а ми юрбитам Господьлы, асланым Енлы, нэмъяс чӧж.

⁶ Сійӧ лунӧ, – висьталӧ Господь, – Ме чукӧрта чотысьясӧс, ӧтлаӧ вайӧда вошӧмаясӧс, найӧс, кодъяслы Ме мӧдӧдлі шогсӧ.

⁷ Чотысьясӧс вӧча бӧрйӧм коляс войтырӧн, разалӧмаясӧс – вына войтырӧн. Господь лоӧ налӧн ӧксыӧн Сион керӧсын ӧні да нэмъяс чӧж.

⁸ А тэ, Сион нывлӧн керӧсыс, кытысянь Ме ыжъяс бӧрся моз видзӧда Ассьым войтырӧс, тэныд бӧр бергӧдчас ыджыдалӧмыс, Ерусалим нывлы – юралӧмыс.

⁹ Мыйла тэ ӧні гораа горзан? Тэнад ӧмӧй абу ӧксыыд? Воштін ӧмӧй ассьыд туйдӧдысьтӧ? Кага чужтысьӧс моз тэнӧ топӧдӧ дойыд.

¹⁰ Кага чужтысь ань моз ойзы, дойыдла нюглясь, Сион нылӧй, ӧд ӧні тэ петан карсьыс, кутан овны видз-му вылын, мунан Вавилонӧдз. Но сэтысь тэнӧ лоӧ мездӧма, Господь мездас тэнӧ вӧрӧгыдлӧн киысь.

¹¹ Ӧні тэныд паныд чукӧртчисны войтыръяс, найӧ шуалӧны: «Вай янӧдам Сион нылӧс, кутам видзӧдны сійӧс бырӧдӧмсӧ».

¹² Но найӧ оз тӧдны Господьлысь мӧвпъяссӧ, оз гӧгӧрвоны Сылысь кӧсйӧмсӧ, мый Сійӧ чукӧртіс найӧс гумла вылӧ кольтаясӧс моз.

¹³ Чеччы вартнытӧ, Сион нылӧй! Тэнсьыд сюртӧ Ме вӧча кӧртысь, кок гыжтӧ – ыргӧнысь. Войтыръясӧс тэ пасьвартан, налысь эмбурсӧ Господьлы сиан, налысь озырлунсӧ став муӧн Ыджыдалысьлы торйӧдан.