Микей 1 - Коми Библия 2023

¹ Морешетса Микейлы вӧлі Господьсянь кыв. Сійӧ кадӧ иудаса ӧксыӧн вӧлі Иотам, сэсся – Ахаз, а Ахаз бӧрын – Езекей. Микей аддзыліс Самария да Ерусалим йылысь петкӧдчылӧм.

Самарияӧс да Иудаӧс мыждӧм

² – Кывзӧй, войтыръяс! Кывзы, му! Кывзӧй, сэні олысьяс! Господь Ыджыдыс ставсӧ аддзӧ – Сійӧ локтас Аслас вежа крамысь да мыжалас тіянӧс.

³ Аслас оланінсянь локтас Господь, Сійӧ лэччас да талялас мувыв керӧсъяс.

⁴ Сы кок улын керӧсъяс сыласны ӧзъялысь сись моз, ковтысъяс воссясны кыркӧтшсянь визувтысь ва моз.

⁵ Яковлӧн лёкас вӧйӧм вӧсна, Израиль войтырлӧн мыж вӧсна ставыс тайӧ лоӧ. Коді мыжа Яковлӧн лёк вӧчӧмысь? Абу-ӧ Самария? Коді мыжа, мый Иуда муын кыптісны вись ваян мылькъяс? Абу-ӧ Ерусалим?

⁶ – Ме кисьта Самария кар, сыысь коляс сӧмын из чукӧр, кытчӧ пуктасны виноград. Изъяссӧ ковтысӧ шыблала, карсӧ подулӧдзыс кисьта-бырӧда.

⁷ Идолъяссӧ жугласны, кырсалӧмысь сетӧм козинъяссӧ сотасны. Ме бырӧда сылысь идолъяссӧ, ӧд кырсалӧмысь босьтӧм дон вылӧ сійӧ сувтӧдіс найӧс, и кырсалӧмысь бара лоӧ мынтысьӧма наӧн.

⁸ – Та вӧсна ме кута ырзӧмӧн бӧрдны, кута ветлыны кӧмтӧг-пасьтӧг, шакал моз понда омлявны, страус моз – ымзыны.

⁹ Самариялӧн дойыс бурдлытӧм, сійӧ вуджас Иуда муӧдз, менам войтырлӧн дзиръяӧдз, воас Ерусалим карӧдз.

¹⁰ Энӧ висьталӧй та йылысь Гефын, гораа сэні энӧ бӧрдӧй. Бет-Леафраын туплясьӧй му вылас, тадзи петкӧдлӧй шогалӧмнытӧ.

¹¹ Петӧй карсьыныд, Шафирын олысьяс, пасьтӧгныд петӧй, янӧдӧмаӧн мунӧй. Цаананын олысьяслы некытчӧ пышйыны. Бет-Эцелын бӧрдӧм кылӧ, та вӧсна ті, Шафирысь петысьяс, сэтчӧ онӧ овмӧдчӧй.

¹² Маротын олысьяс оз нин виччысьны бурсӧ, ӧд Господь мӧдӧдіс шог Ерусалим дзиръя дорӧ.

¹³ Лакишын олысьяс, доддялӧй вӧвъяснытӧ тарантасӧ! Тіянсянь Сион нывлӧн мыжыс, тіянсянь Израиль войтырлӧн лёк вӧчӧмыс.

¹⁴ Сетӧй козинъястӧ Морешет-Гефын олысьяслы. Шӧйӧвошисны израильса ӧксыяс, ӧд весьшӧрӧ виччысисны Акзив карсянь отсӧгсӧ.

¹⁵ Марешын олысьяс, тіян дінӧ Ме вайӧда карнытӧ босьтысьӧс, израильса нималана йӧз мунӧны Адуллам карӧ.

¹⁶ Иуда войтыр, шыр юрситӧ, шогсьы муса ныв-пиыд вӧсна! Шырсьы, мед лоан кондор лэбач кодь куш юра, ӧд ныв-питӧ пленӧ нуӧдасны.