Иуда 1 - Коми Библия 2023

¹ Гижӧ Иуда, Исус Кристослӧн кесйӧг, Яковлӧн вок. Чолӧмала тіянӧс, кодъясӧс Ен Бать корис да вежӧдіс. Исус Кристос видзӧ тіянӧс.

² Буралӧмыс, лӧньлуныс да муслуныс мед содас тіянлы.

Ылӧгвелӧдысьяс

³ Мусаяс, ме ёна кӧсйи гижны тіянлы миян ӧтувъя мездмӧм йылысь, но лыдди коланаӧн водзджык туйдӧдны тіянӧс, медым ті вӧлінныд дасьӧсь дорйыны ассьыныд эскӧмнытӧ. Тайӧ эскӧмсӧ Енмыс сетіс вежа войтырлы ӧтчыд да пыр кежлӧ.

⁴ Тіян пӧвстӧ наяна сюйсисны Ентӧг олысьяс. Татшӧм йӧзыслы важӧн нин дасьтӧма мыждӧмсӧ. Миян Енлысь буралӧмсӧ найӧ бергӧдӧны лэдзчысьӧм оласногӧ. Найӧ соссьӧны ӧти Ен Ыджыдысь да миян Господь Исус Кристосысь.

⁵ Ті, дерт, тӧданныд нин ставсӧ, но кӧсъя казьтыштны тіянлы, мый Господь мездіс Ассьыс войтырсӧ Египет муысь, но бӧрыннас на пӧвстысь бырӧдіс эскытӧмъясӧс.

⁶ Анделъясӧс, кодъяс эз донъявны ассьыныс ыджыдалан вынсӧ да эновтісны енэжвывса оланінсӧ, Господь пыр кежлӧ дорис чептӧн да видзӧ сап пемыдас ыджыд мыждан лун кежлӧ.

⁷ Тадзи лои тшӧтш Содомын, Гомораын да на гӧгӧр каръясын олысьяскӧд. Тайӧ анделъясыс моз найӧ кырсалісны да сетчисны зывӧк оласногӧ, та вӧсна найӧс вӧлі мыждӧма да сотӧма куслытӧм биын. Миянлы тайӧ ӧлӧдӧм вылӧ.

⁸ Дзик тадзи лоӧ тайӧ Ентӧг олысьясыскӧд. Найӧ ылӧдлӧны тіянӧс асланыс вӧтъясӧн, пежалӧны ассьыныс вир-яйнысӧ, нинӧм туйӧ пуктӧны юралысьясӧс да лёкӧдӧны енэжвывса юралысь-веськӧдлысьясӧс.

⁹ Кор Микаил архангел вензис омӧлькӧд Мӧисей шой йылысь, сійӧ эз лысьт лёкӧдны-мыждыны омӧльӧс. Сӧмын шуис: «Господь мед ӧлӧдас тэнӧ».

¹⁰ Тайӧ йӧзыс лёкӧдӧны сійӧ, мый асьныс оз гӧгӧрвоны. А мый вежӧртӧм пемӧсъяс моз кылӧны асланыс вир-яйын, сійӧ кыскӧ найӧс бырӧдӧмӧ.

¹¹ Курыд шог налы! Найӧ мунӧны Каин туйӧд, горшасьӧны сьӧм вылӧ, Валаам моз ылалӧмаӧсь. Корей моз найӧ паныд кыпӧдчӧны, та вӧсна Корейӧс моз найӧс лоӧ бырӧдӧма.

¹² Кор ті мусапырысь чукӧртчанныд ӧтвыв сёйны, татшӧм йӧзыс яндысьтӧг тшӧгӧдӧны асьнысӧ да лоӧны тіянлы крукӧдӧн. Найӧ – тӧвнырӧн новлӧдлан ватӧм кымӧръяс, вотӧс вайтӧм арся пуяс, вужнас нетшыштӧмаяс, кык пӧв кулӧмаяс.

¹³ Найӧ – саридзвывса гыяс, кодъяс лёкысь быгзьӧны асланыс янӧдан уджъясӧн. Найӧ – вошласьысь кодзувъяс, кодъяслы век кежлӧ дасьтӧма сап пемыдсӧ.

¹⁴ Тайӧ йӧзыс йылысь водзвыв висьтавліс Енок, Адамсянь сизимӧд чужанвужйысь петысь: «Со, локтӧ Господь Аслас лыдтӧм-тшӧттӧм вежа анделъяскӧд,

¹⁵ медым мыждыны став йӧзсӧ. Сійӧ мыждӧ Ентӧг олысьясӧс налӧн лёк уджъясысь да янӧдӧ мыж вӧчысьясӧс, кодъяс шуасисны Господь вылӧ лёкӧдан кывъясӧн».

¹⁶ Тайӧ йӧзыс век шуасьӧны да элясьӧны. Найӧ олӧны асланыс лёк кӧсйӧмныс серти да Индӧд торкалӧмӧн. Найӧ тшапа сёрнитӧны да ошкӧны мукӧдсӧ, медым аслыныс мыйкӧ курыштны.

Видзӧй асьнытӧ Енлӧн муслунас

¹⁷ Но ті, мусаяс, энӧ вунӧдӧй миян Господь Исус Кристослӧн апостолъяслысь водзвыв висьталӧмсӧ.

¹⁸ Найӧ шулісны тіянлы, мый бӧръя кадӧ локтасны лёкӧдысьяс, кодъяс олӧны асланыс пеж кӧсйӧмныс серти.

¹⁹ Татшӧм йӧзыс ваясны тіян костӧ юксьӧм. Найӧ олӧны вир-яй сертиныс, Енлӧн Лолыс на пытшкын абу.

²⁰ Но ті, мусаяс, ёнмӧдӧй асьнытӧ вежа эскӧмнаныд, кевмысьӧй Вежа Лов нуӧдӧм улын.

²¹ Видзӧй асьнытӧ Ен муслунас. Виччысьӧй сійӧ кадсӧ, кор миян Господь Исус Кристос Аслас буралӧмнас вайӧдас миянӧс помтӧм олӧмӧ.

²² Майшасьысьяс дінӧ лоӧй бур сьӧлӧмаӧсь,

²³ а мукӧдсӧ мездӧй би пытшкысь моз. Видзчысьӧмӧн янӧдӧй найӧс, зывӧктӧй весиг вир-яйсянь пежасьӧм паськӧмнысӧ.

Енмӧс ошкӧм

²⁴ Енмыс вына видзны тіянӧс усьӧмысь да вайӧдны тіянӧс Аслас дзирдлунӧ нимкодясьысь да сӧстӧм войтырӧн.

²⁵ Ыджыд мывкыда ӧти Ен мездіс миянӧс Исус Кристос Господьным пыр. Сылы ошкӧм-нимӧдӧмыс, Сылӧн выныс-ыджыдалӧмыс олӧм пуксьытӧдзыс, ӧні да нэмъяс чӧж. Аминь.