Йоиль 3 - Коми Библия 2023

Господь мыждас войтыръясӧс

¹ – Сійӧ лунъясӧ Ме бара сета Иудалы да Ерусалимлы воддза кодьыс бур олӧм.

² Ме чукӧрта войтыръясӧс да вайӧда найӧс Иосафат ковтысӧ. Сэні Ме кута мыждыны найӧс Аслам Израиль войтыр вӧсна да Аслам му вӧсна сыысь, мый войтыръяс пӧвстӧ разӧдісны Менсьым войтырӧс, юклісны Менсьым муӧс.

³ Пудъясьӧмӧн найӧ юклісны Менсьым войтырӧс, зонмӧс вузалісны сійӧ жӧ донсьыс, мый мынтылісны кырсалысь аньлы, нылӧс вузалісны, медым вина ньӧбны да юны.

⁴ Тир, Сидон да Филистим му, мый ті Месянь кӧсъянныд? Гашкӧ, ті кӧсъянныд водзӧс перйыны Менсьым? Тадзи кӧ, регыд Ме бергӧда водзӧс перйӧмнытӧ ас выланыд.

⁵ Ті гусялінныд Менсьым эзысь-зарниӧс, нуинныд Менсьым донаторъяс асланыд юрбитанінъясӧ.

⁶ Иудаын да Ерусалимын олысьясӧс ті вузалінныд грек войтырлы, медым ылӧджык нуӧдны найӧс чужан мусьыныс.

⁷ Но Ме бӧр вайӧда найӧс сэтысь, кытчӧ ті найӧс вузалінныд. Ме бергӧда лёк вӧчӧмнытӧ ас выланыд.

⁸ Тіянлысь ныв-пинытӧ Ме вузала Иуда войтырлы, а найӧ вузаласны ылын олысь Сава войтырлы. Тадзи висьталӧ Господь.

⁹ Юӧртӧй войтыръяс пӧвстын: – Дасьтысьӧй ыджыд тыш кежлӧ, чукӧртӧй тышкайӧзӧс! Петӧй тышӧ, вермасьысьяс!

¹⁰ Асланыд гӧръясысь дорӧй шыпуртъяс, чарлаясысь – шыяс. Вынтӧм мед шуас: «Ме вына тышкасьысь».

¹¹ Войтыръяс, тэрмасьӧй локны быдласянь, чукӧртчӧй ковтысӧ! Господьӧй, вайӧд сэтчӧ Ассьыд вермасьысьястӧ!

¹² Мед кыпӧдчасны войтыръяс, мед локтасны Иосафат ковтысӧ. Сэні Ме пукся, медым мыждыны войтыръясӧс.

¹³ Босьтӧй чарла, ӧд воис вундан кад. Талялӧй войтыръясӧс виноградӧс моз, ӧд пычкан гуыс тыр, вийӧдчанінысь вина моз визувтӧ налӧн вирыс, ӧд лёкыс налӧн вывті ыджыд.

¹⁴ Унасьыс-уна йӧз чукӧртчӧма мыждан ковтысӧ, ӧд Господьлӧн луныс матыстчӧ ковтыслань.

¹⁵ Шондіыс да тӧлысьыс пемдасны, кодзувъяс югӧрсӧ воштасны.

¹⁶ Господь равӧстас-горӧдас Сионсянь, Ассьыс гӧлӧс шысӧ сетас Ерусалимсянь. Сэки енэжыс да муыс сыркмунасны. Но Господь доръяс Ассьыс войтырсӧ, Сійӧ видзас Израиль пиянӧс.

¹⁷ – Сэки ті тӧдмаланныд, мый Ме – Господь, тіян Енныд, Ме ола Сионын, Аслам вежа керӧсын. Ерусалим лоӧ вежаинӧн, и мукӧд войтыр сэтчӧ оз пыр.

¹⁸ Сійӧ лунӧ керӧсъяс вывсянь пондас войтавны вина, мылькъяс вывті визувтны йӧв, Иуда муын сёртасъяс тырасны ваӧн. Господьлӧн крамысь визувтас ва, сійӧ пондас юктавны Ситтим ковтыс.

¹⁹ Иуда войтырӧс виалӧм-дзескӧдӧм понда, налӧн муын мыжтӧм вир кисьтӧм понда Египет му лоӧ кушинӧн, Эдом – овтӧминӧн.

²⁰ Но Иуда муын пыр лоӧ олысьыс, Ерусалимын пондасны овны нэмъяс чӧж.

²¹ Налысь вирсӧ кисьтӧмысь Ме водзӧс перъя, Египетӧс да Эдомӧс ог коль мыждытӧг. Господь олӧ Сионын!