Йоиль 2 - Коми Библия 2023

Господьлӧн лун

¹ – Буксӧй буксанӧн Сионын, гораа горзӧй Менам вежа керӧс вылын! Тіралӧй-дзӧрӧй, тайӧ муас олысьяс, ӧд Господьлӧн луныс локтӧ, сійӧ матын нин.

² Тайӧ луныс сап пемыдӧн вевттьысьӧма, сійӧс кытшалӧма сьӧд кымӧр да сук ру. Асъя югӧр моз паськалӧ керӧсъяс вылын лыдтӧм-тшӧттӧм да вына войтыр. Татшӧм войтырыс эз на вӧвлы, и некор оз ло.

³ Сы водзвылын мунӧ бырӧдана би, бӧрсяньыс – ыпъялысь би. Водзвылас муыс Эдэм сад кодь, бӧрвылас – кушмӧм овтӧмин. Некод оз вермы мездмынысӧ.

⁴ Уськӧдчысьяс вӧвъяс кодьӧсь, чукӧрӧн тӧвзьӧны.

⁵ Найӧ чеччалӧны керӧсъяс вывті, кылӧ тарантас гӧгыльяслӧн кодь шы, сотчысь идзаслӧн кодь шы. Найӧ тышӧ петысь вына тышкайӧз кодьӧсь.

⁶ Найӧс аддзӧмысь войтыръяс тіралӧны, йӧзыслӧн чужӧмныс быгалӧма.

⁷ Найӧ котӧртӧны тышкайӧз моз, вермасьысьяс моз кавшасьӧны карса стен вылӧ. Быдӧн мунӧ аслас нырвизьӧд, оз кеж аслас туйысь.

⁸ Ӧта-мӧдсӧ оз тойлавны, быдӧн кутӧ ассьыс нырвизьсӧ. Найӧ котӧртӧны ёсь шыяслы паныд, найӧс нинӧм оз сувтӧд.

⁹ Найӧ уськӧдчӧны кар вылӧ, кавшасьӧны карса стен вылӧ, гусясьысь моз ӧшиньӧд пырӧны керкаясӧ.

¹⁰ На водзын муыс дзӧрӧ, енэжыс сыркакылӧ. Шондіыс да тӧлысьыс пемдасны, кодзувъяс югӧрсӧ воштасны.

¹¹ Гораа чуксалӧмӧн Господь веськӧдлӧ тышкайӧзнас, Сылӧн тышкайӧзыс лыдтӧм-тшӧттӧм, Сылӧн тшӧктӧм серти вӧчысь вына. Господьлӧн луныс ыджыд да повзьӧдана, вермас-ӧ кодкӧ ловйӧн кольны?

Бергӧдчӧй Господь дінӧ

¹² – Бергӧдчӧй Ме дінӧ став сьӧлӧмнаныд, видзалӧй да сыркъялӧмӧн бӧрдӧй, – висьталӧ Господь весиг талун.

¹³ Энӧ паськӧмнытӧ косялӧй, а сьӧлӧмнытӧ. Бергӧдчӧй Господьлань, асланыд Енлань, ӧд Сійӧ бур да мелі сьӧлӧма, Сылӧн терпитӧмыс ыджыд, Сылӧн буралӧмлы абу помыс, Сійӧ дась бӧр босьтны Ассьыс мыждана шуӧмсӧ.

¹⁴ Гашкӧ, Сійӧ вештас скӧрлунсӧ да бурсиас, сэки ті бара верманныд вайны Господьлы, асланыд Енлы, нянь вись да вина вись.

¹⁵ Буксӧй буксанӧн Сионын, урчитӧй вежа видзалан лунъяс, юӧртӧй ыджыд чукӧртчӧм йылысь!

¹⁶ Чукӧртӧй войтырӧс, вежӧдӧй чукӧртчӧмаясӧс, корӧй пӧрысьясӧс, вайӧдӧй челядьӧс, вайӧй пузчужӧм кагаясӧс. Верӧспу мед эновтас узьлан жырсӧ, гӧтырпу мед петас аслас шойччан вежӧсысь.

¹⁷ Бӧрдӧй, попъяс, крам посводз да висьпуктанін костын. Господьлӧн кесъялысьяс, шуӧй: «Господьӧй, ло бур сьӧлӧма Аслад войтыр дінӧ. Эн сет янӧдны Ассьыд войтыртӧ, эн лэдз мукӧд войтырлы омӧльтны миянӧс. Мед найӧ оз шуны, кӧні Израильлӧн Енмыс».

Господь бурсиӧ Ассьыс войтырсӧ

¹⁸ Сэки Господь сувтас дорйыны Ассьыс мусӧ, Сійӧ бурсьӧлӧмтчас Аслас войтырыс дінӧ.

¹⁹ Господь шуас Аслас войтырлы: – Ме сета тіянлы нянь, вина да вый, ті пӧттӧдзныд понданныд сёйны. Водзӧ ог лэдз мукӧд войтырлы янӧдны тіянӧс.

²⁰ Войвывсянь уськӧдчысьясӧс Ме ылыста тіян дінысь, вӧтла найӧс ватӧм куш муӧ, водзвылас мунысьясӧс Ме вӧйта асыввыв саридзӧ, бӧрвылас мунысьясӧс – рытыввыв саридзӧ. Унасьыс-уна лёктор вӧчӧмсьыс налӧн шойысь пондас ӧвтны сісьмӧм лёк дук.

²¹ Эн пов, муӧй, гажӧдчы да нимкодясь, ӧд Господьлӧн уджъясыс ыджыдӧсь.

²² Энӧ полӧй, пемӧсъяс, овтӧминса йирсянінъяс вылын бара петас веж турун, пуяс пондасны вотӧсавны, инжир да виноград ваясны уна вотӧс.

²³ Гажӧдчӧй, Сионын олысьяс, нимкодясьӧй Господь Енныд вӧсна! Сійӧ сетас тіянлы тырмымӧн зэр, воддза мозыс ыстас тіянлы арся да тувсовъя зэр.

²⁴ Вартанінъяс тырасны няньӧн, пычкан гуяс – винаӧн да выйӧн.

²⁵ Ме вештыся тіянлы сійӧ вояссьыс, кор Ме ыстылі тіян вылӧ саранча, чиркъясӧс, гагъясӧс да лёльӧясӧс, медым тайӧ ыджыд тышкачукӧрыс сёйис быдтаснытӧ.

²⁶ Ті понданныд пӧттӧдзныд сёйны, понданныд ошкыны Господьӧс, ассьыныд Ентӧ, коді вӧчис тіянлы шензьӧданаторъяс. Менсьым войтырӧс некор оз ло янӧдӧма.

²⁷ Сэки ті тӧдмаланныд, мый Ме ола Израиль войтыр пӧвстын, мый Ме – Господь, тіян Енныд, и Меысь кындзи мӧд Енмыс абу. Менсьым войтырӧс некор оз ло янӧдӧма.

Господь кисьтас Ассьыс Ловсӧ быд морт вылӧ

²⁸ – Тайӧ лунъяс бӧрын Ме кисьта Ассьым Лолӧс быд морт вылӧ. Тіян пиянныд да нывъясныд пондасны пророкавны, олӧмаяс пондасны вӧтавны збыльмана вӧтъяс, зонъясныд кутасны аддзыны Енсянь петкӧдчылӧмъяс.

²⁹ Сійӧ лунъясӧ Ме кисьта Ассьым Лолӧс тшӧтш кесйӧгъяс да кесйӧг аньяс вылӧ.

³⁰ Енэжын и му вылын петкӧдла индысьпасъяс: вир, би да тшын.

³¹ Шондіыс пемдас, тӧлысьыс вирӧн ойдас Господьлӧн ыджыд да повзьӧдана луныс вотӧдз.

³² И быдӧн, коді шыасяс Господь дінӧ, мездмас. Господьлӧн шуӧм серти мездмӧмыс лоӧ Сион керӧсын да Ерусалимын. Мездмасны найӧ, кодъясӧс корас Господь.