Даниил 8 - Коми Библия 2023

Меж да ай кӧза йылысь Данииллӧн аддзылӧм

¹ Валтасар ӧксылӧн коймӧд веськӧдлан воӧ меным, Данииллы, воддза аддзылӧмыс бӧрын вӧлі нӧшта аддзылӧм.

² Ме аддзи ачымӧс Суза изкарын, Элам нима ӧксыув муын, Улай ю дорын.

³ Ме лэпті синмӧс да аддзи ю дорын сулалысь межӧс. Сылӧн вӧлі кык ыджыд сюр, сёрӧнджык быдмӧм сюрыс вӧлі ыджыдджык.

⁴ Ме аддзылі, мый тайӧ межыс люкасис рытыввывлань, войвывлань да лунвывлань, и мукӧд пемӧсъяс эз вермыны водзсасьны сыкӧд, некод эз вермы мездысьны сыысь. Сійӧ вӧчис, мый кӧсйис, да ёна ышнясис.

⁵ Менам видзӧдігкості рытыввывсянь локтіс ай кӧза, кодлӧн кык син костас вӧлі ыджыд сюр. Муас инмавтӧг сійӧ котӧртіс му весьтӧдыс.

⁶ Ай кӧза веськӧдчис кык сюра межлань, коді сулаліс ю дорын, да скӧрпырысь котӧртіс сылы паныд.

⁷ Ме аддзылі, мый меж дінӧ матыстчигӧн сійӧ нӧшта на пузис скӧрысла, уськӧдчис меж вылӧ да чегис сылысь кыкнан сюрсӧ. Межлӧн эз вӧв выныс водзсасьны ай кӧзакӧд. Ай кӧза уськӧдіс межӧс муас да таляліс сійӧс. Некод эз вермы мездыны сійӧс ай кӧзаысь.

⁸ Ай кӧза пондіс ёна ышнясьны. Но кор сійӧ лои вынйӧра, сэки чегис да усис сылӧн ыджыд сюрыс, а сы пыдди петіс нёль сюр, найӧ чурвидзисны нёльнан му пельӧслань.

⁹ Ӧти сюрсянь петіс нӧшта ичӧт сюр. Сійӧ ыджыда быдмис да нюжаліс лунвывлань, асыввывлань да мича мулань.

¹⁰ Сюрыс быдмис енэжвывса тышкакотыръясӧдз, сэсся тышкакотыръяслысь юкӧнсӧ да кодзувъяслысь юкӧнсӧ шыбитіс му вылӧ да таляліс найӧс.

¹¹ Сюрыс ышнясьӧмӧн кыпӧдчис весиг тышкакотыръяслӧн Юралысьлы паныд, дугӧдіс йӧзсӧ Юралысьлы быдлунся вись вайӧмысь да куштіс-пазӧдіс Сылысь вежаинсӧ.

¹² Быдлунся вись вайӧмысь ӧтдор тшӧтш тышкайӧзӧс налӧн лёк вӧчӧмныс вӧсна вӧлі сетӧма сы киӧ. Збыльсӧ нинӧмӧ пуктӧмӧн сійӧ вӧчис ассьыс уджсӧ, и сылӧн ставыс артмис.

¹³ Ме кывлі кык вежалысь сёрнисӧ. Ӧтиыс юаліс мӧдыслысь: «Дыр-ӧ на тадзи лоӧ? Быдлунся вись вайӧмсӧ дугӧдӧма, вежаинсӧ да тышкайӧзсӧ талялӧма, и лёкыс куштӧ-пазӧдӧ».

¹⁴ Мӧдыс вочавидзис меным: «Тайӧ нюжалас кык сюрс куимсё рыт да асыв, сэсся вежаинсӧ лоӧ сӧстӧммӧдӧма».

¹⁵ Кор ме, Даниил, кӧсйи гӧгӧрвоны тайӧ аддзылӧмсӧ, сэккості кодкӧ морт кодь сувтіс ме водзӧ.

¹⁶ Улай ю весьтысь ме кылі мортлысь гӧлӧс шысӧ. Сійӧ шуис: «Гавриил, гӧгӧрвоӧд сылы аддзылӧмсӧ!»

¹⁷ Гавриил матыстчис сэтчӧ, кӧні ме сулалі. Сэки ме ёна повзи да кымынь уськӧдчи муас. Сійӧ шуис меным: «Мортӧй, тӧд, мый тэнад аддзылӧмыд бӧръя кад йылысь».

¹⁸ Кор сійӧ сёрнитіс мекӧд, ме садьӧс воштӧм морт моз кымынь куйлі му вылас. Но сійӧ инмӧдчис ме дінӧ да сувтӧдіс менӧ кок йылӧ.

¹⁹ Сійӧ шуис меным: «Ме восьта тэныд, мый лоӧ бӧръя скӧралан лунъясӧ. Ӧд сійӧ, мый тэ аддзылін, висьталӧ урчитӧм бӧръя кад йылысь.

²⁰ Тэныд петкӧдлӧм кык сюра межыс – тайӧ мидияса да персияса ӧксыяс.

²¹ Ай кӧзаыс – тайӧ грецияса ӧксы. Кык син костас ыджыд сюрыс – тайӧ грецияса медводдза ӧксы.

²² Кор тайӧ сюрыс чегис, сы пыдди петіс нёль сюр. Тайӧ петкӧдлӧ, мый тайӧ войтыр пӧвстсьыс петас нёль юралӧм, но найӧ оз лоны медводдза ӧксылӧн юралӧмыс кодь вынаӧсь.

²³ Кор тайӧ юралӧмъясыс матыстчасны помлань да Енлы паныд кыпӧдчысьяс тыртасны лёк уджъясныслысь лыдсӧ, сэки локтас яндысьтӧм да наян ӧксы.

²⁴ Сійӧ лоӧ зэв вына, но оз аслас вынӧн сійӧ вынсяв. Сылӧн ставыс кутас артмыны, сійӧ куштас-пазӧдас ставсӧ, бырӧдас вынаясӧс да вежа войтырӧс.

²⁵ Вежӧрлун да наянлун вӧсна сылӧн ставыс кутас артмыны, и сійӧ асьсӧ вылӧ кыпӧдас. Виччысьтӧг сійӧ унаӧс бырӧдас, тшӧтш ыджыдъяслӧн Ыджыдлы паныд кыпӧдчас. Но тайӧ ӧксысӧ лоӧ бырӧдӧма, сӧмын оз морт киӧн.

²⁶ Сійӧ, мый тэ аддзылін рыт да асыв йылысь, – збыль. Но тэ некодлы тайӧс эн восьт, ӧд аддзылӧмыс локтана кад йылысь».

²⁷ Ме, Даниил, дзикӧдз эбӧсысь уси да виси некымын лун чӧж. Сэсся чеччи да бара понді кесъявны ӧксылы. Сійӧ, мый ме аддзылі, ёна чуймӧдіс менӧ, и гӧгӧрвоны эг вермы.