Даниил 6 - Коми Библия 2023

Даниилӧс шыбитӧны левъяслӧн гуӧ

¹ Дарий ӧксылы воис сьӧлӧм вылас кӧсйӧм индыны сё кызь сатрапӧс, кодъяс кутасны веськӧдлыны сылӧн муӧн.

² Наӧн веськӧдлыны сійӧ индіс куим ыджыдалысьӧс, кодъяс пӧвстысь ӧтиыс вӧлі Даниил. Сатрапъяслы колӧ вӧлі висьтавны вӧчӧм уджныс йылысь ыджыдалысьяслы, медым ӧксыӧс эз вӧв сьӧктӧдӧма.

³ Даниил торъяліс мукӧд ыджыдалысьясысь да сатрапъясысь, ӧд сы пытшкын вӧлі ыджыд мывкыдлун. Та вӧсна ӧксы мӧвпаліс индыны Даниилӧс веськӧдлыны став аслас муӧн.

⁴ Сэки ыджыдалысьяс да сатрапъяс пондісны корсьны помка, медым мыжавны Даниилӧс сыысь, мый оз колана ногӧн юрав. Но найӧ нинӧм эз аддзыны, ӧд Даниил эз пӧръясь, а ставсӧ вӧчис веськыда.

⁵ Найӧ шуисны, ми пӧ эгӧ аддзӧй некутшӧм помка мыжавны Даниилӧс, но, гашкӧ, сылӧн Енлӧн Индӧдысь мыйкӧ аддзам.

⁶ Ыджыдалысьяс да сатрапъяс ӧтвылысь локтісны ӧксы дінӧ да шуисны сылы: «Мед олас Дарий ӧксы нэмъяс чӧж!

⁷ Ӧксылӧн муын ыджыдалысьяс, ӧксыув муясын юралысь-веськӧдлысьяс, сатрапъяс да ӧксыӧс туйдӧдысьяс ас костаныс сёрнитчисны корны, медым ӧксы сетас-вынсьӧдас тшӧктӧм, мый комын лун чӧж колӧ кевмысьны сӧмын ӧксылы. А коді пондас кевмысьны мукӧд енлы либӧ мортлы, сійӧс мед шыбитасны левъяслӧн гуӧ.

⁸ Сідзкӧ, ӧксыӧй, сет да кырымав сэтшӧм тшӧктӧм, мый мидияса да персияса индӧдӧс моз сійӧс оз позь вежны-бырӧдны».

⁹ Дарий ӧксы кырымаліс тшӧктӧмсӧ.

¹⁰ Кор Даниил тӧдмаліс, мый ӧксы сетӧма татшӧм тшӧктӧм, сійӧ муніс гортас да кайис вылыс вежӧсас, кӧні ӧшиньясыс видзӧдісны Ерусалимлань. Воддза мозыс куимысь луннас сійӧ пидзӧсчанясьӧмӧн кевмысис аслас Енлы да ошкис Сійӧс.

¹¹ Ыджыдалысьяс да сатрапъяс локтісны сэтчӧ да аддзисны, мый Даниил корӧ-кевмысьӧ аслас Енлы.

¹² Сэсся найӧ мунісны ӧксы дінӧ да шуисны сылы: «Эн-ӧ тэ кырымав татшӧм тшӧктӧмсӧ, мый комын лун чӧж колӧ кевмысьны сӧмын тэныд, ӧксыӧй? А коді пондас кевмысьны мукӧд енлы либӧ мортлы, сійӧс мед шыбитасны левъяслӧн гуӧ». Ӧксы вочавидзис: «Тайӧ тшӧктӧмыс вына, мидияса да персияса индӧдӧс моз сійӧс оз позь бырӧдны».

¹³ Сэки найӧ шуисны ӧксылы: «Иуда муысь пленӧ вайӧдӧм Даниил нинӧмӧ пуктӧ тэнӧ, ӧксыӧй. Сійӧ нинӧмӧ пуктӧ тэнсьыд кырымалӧм тшӧктӧмтӧ, куимысь луннас кевмысьӧ аслас Енлы».

¹⁴ Кор ӧксы кыліс тайӧ кывъяссӧ, сійӧ шогӧ усис да мӧвпыштіс мездыны Даниилӧс. Шонді пуксьытӧдзыс сійӧ корсьысис позянлун, медым мездыны сійӧс.

¹⁵ Но ыджыдалысьяс да сатрапъяс матыстчисны ӧксы дінӧ да шуисны сылы: «Тэ ӧд тӧдан, ӧксыӧй, мый мидияса да персияса индӧд серти ӧксыӧн вынсьӧдӧм тшӧктӧмсӧ оз позь вежны».

¹⁶ Сэки ӧксы тшӧктіс вайӧдны Даниилӧс да шыбитны сійӧс левъяслӧн гуӧ. Ӧксы шуис Данииллы: «Тэнад Енмыд, кодлы тэ дугдывтӧг кесъялан, мед мездас тэнӧ!»

¹⁷ Вайисны ыджыд из да тупкисны гу вомсӧ. Аслас чунькытшнас да чина йӧзыслӧн чунькытшӧн ӧксы пуктіс сэтчӧ печать, медым Даниил йылысь шуӧм кывкӧртӧдсӧ эз вежны.

¹⁸ Ӧксы муніс аслас керкаӧ да сёйтӧгыс водіс узьны, весиг нинӧм эз тшӧкты вайны. Но унмовсьнысӧ эз вермы.

¹⁹ Асъя кыа петігӧн ӧксы чеччис да тэрмасьӧмӧн муніс левъяслӧн гу дорӧ.

²⁰ Гу дорӧ матыстчигӧн сійӧ нориник гӧлӧсӧн шыасис Даниил дінӧ: «Даниил, ловъя Енлӧн кесйӧг! Вермис-ӧ Тэнад Енмыд, кодлы тэ дугдывтӧг кесъялан, мездыны тэнӧ левъясысь?»

²¹ Даниил вочавидзис ӧксылы: «Мед олас ӧксы нэмъяс чӧж!

²² Менам Енмӧй мӧдӧдіс Ассьыс анделсӧ, и сійӧ тупкис левъяслысь вомсӧ. Найӧ эз вермыны вӧчны меным лёксӧ, ӧд Ен водзас ме сӧстӧм, и тэ водзын, ӧксыӧй, ме нинӧмӧн эг мыжмы».

²³ Даниил вӧсна ӧксы ёна нимкодясис да тшӧктіс лэптыны сійӧс гусьыс. Сійӧс лэптісны, и сылӧн вир-яйысь эз аддзыны некутшӧм дойдалӧм, ӧд сійӧ лача кутіс аслас Ен вылӧ.

²⁴ Ӧксы тшӧктіс вайӧдны сійӧ йӧзсӧ, кодъяс мыжалісны Даниилӧс. Найӧс, налысь челядьсӧ да гӧтыръяснысӧ шыбитісны левъяслӧн гуӧ. Найӧ эз на воны гу пыдӧсӧдзыс, левъяс уськӧдчисны на вылӧ, косявлісны найӧс да вильӧдісны налысь лыяссӧ.

²⁵ Та бӧрти Дарий ӧксы гижис став му вылас олысь войтыръяслы, чужанкотыръяслы да быд кыла йӧзлы: «Лӧнь олӧмыс мед содас тіянлы!

²⁶ Ме тшӧкта, мый быдлаын менам юраланінын мед поласны-тіраласны Данииллӧн Енмысь. Сійӧ – Ловъя Ен, помтӧг олысь Ен, Сылӧн юралӧмыс зумыд, Сылӧн ыджыдалӧмыс помасьлытӧм.

²⁷ Сійӧ мездӧ и дорйӧ, вӧчӧ шензьӧданаторъяс да индысьпасъяс енэжас и му вылас. Сійӧ мездіс Даниилӧс левъяслӧн гыж улысь».

²⁸ Дарий ӧксылӧн веськӧдлан кадӧ и персияса Кир ӧксылӧн веськӧдлан кадӧ Данииллӧн ставыс артмис.