Даниил 5 - Коми Библия 2023

Стен вылын гижӧд

¹ Валтасар ӧксы дасьтіс ыджыд гаж аслас сюрс чина йӧзлы да накӧд ӧтвылысь юис вина.

² Юӧм бӧрас Валтасар тшӧктіс вайны зарни да эзысь дозмукъяс, мый сылӧн Навукодоносор батьыс петкӧдліс ерусалимса крамысь. Валтасар кӧсйис юны тайӧ дозмукъяссьыс аслас чина йӧзкӧд, гӧтыръясыскӧд да кесйӧг-гӧтыръясыскӧд.

³ Енлӧн крамысь петкӧдӧм зарни дозмукъяссӧ вайӧм бӧрын ӧксы аслас чина йӧзкӧд, гӧтыръясыскӧд да кесйӧг-гӧтыръясыскӧд пондісны юны сэтысь.

⁴ Найӧ юисны вина да ошкисны зарниысь да эзысьысь вӧчӧм енъясӧс, ыргӧнысь да кӧртысь вӧчӧм енъясӧс, пуысь да изйысь вӧчӧм енъясӧс.

⁵ Дзик сійӧ кадас тыдовтчис морт ки да пондіс гижны ӧксы керкалӧн еджыдӧн мавтӧм стенӧ, кытчӧ усис бисянь югыдыс. Ӧксы кор аддзис гижысь кисӧ,

⁶ ёна повзис, чужӧмыс сылӧн кельдӧдіс, кокыс лигышмуніс, пидзӧсыс пондіс дзӧрны.

⁷ Ӧксы гораа горӧдіс, медым вайӧдісны сы дінӧ кимӧститчысьясӧс, калдеяса мывкыд йӧзӧс да пемӧс мускӧн тунасьысьясӧс. Сійӧ шуис вавилонса тӧдысь-туналысьяслы: «Коді лыддяс да гӧгӧрвоӧдас стенмӧ гижӧмасӧ, сійӧс пасьтӧдасны пемыдгӧрд паськӧмӧ, сьыліас ӧшӧдасны зарни чеп, и сійӧ лоӧ менам муын чин серти коймӧд юралысьӧн».

⁸ Локтісны ӧксылӧн тӧдысьясыс, но эз вермыны лыддьыны гижӧмасӧ, эз вермыны гӧгӧрвоӧдны сійӧс ӧксылы.

⁹ Валтасар ӧксы ёна повзис, весиг чужӧмыс вежсис. Сылӧн чина йӧзыс тшӧтш шӧйӧвошисны.

¹⁰ Ӧксылӧн мамыс кывліс, мый йылысь сёрнитӧны ӧксы да сылӧн чина йӧзыс, и локтіс налӧн гажӧдчанінӧ. Сійӧ шуис: «Мед олас ӧксы нэмъяс чӧж! Ӧксыӧй, тэнад мӧвпъясыд мед оз майшӧдлыны тэнӧ, тэнад чужӧмыд мед оз кельдӧд!

¹¹ Тэнад муын олӧ морт, код пытшкын вежа Енлӧн Лолыс. Тэнад батьыдлӧн веськӧдлан кадӧ на аддзисны, мый сы пытшкын эм сюсьлун, вежӧрлун да енъяслӧн кодь мывкыдлун. Навукодоносор ӧксы, тэнад батьыд, пуктіс сійӧс туналысьяс, кимӧститчысьяс, калдеяса мывкыд йӧз да пемӧс мускӧн тунасьысьяс вылын ыджыдӧн.

¹² Ӧд тайӧ Даниил пытшкас, кодӧс ӧксы нимтіс Белтешацарӧн, эм ыджыд мывкыдлун, вежӧрлун да сямлун гӧгӧрвоӧдны вӧтъяс, восьтны гусяторъяс да сьӧкыдлунъяс дырйи разьны гӧрӧдъяс. Мед корасны Даниилӧс гӧгӧрвоӧдны гижӧмасӧ».

¹³ Сэки Даниилӧс вайӧдісны ӧксы дінӧ, и ӧксы шуис сылы: «Тэ-ӧ сійӧ Даниилыс, кодӧс Иуда муысь пленӧ босьтӧмаяскӧд вайӧдіс ӧксы, менам батьӧй?

¹⁴ Ме кывлі, мый тэ пытшкын Енлӧн Лолыс, и тэнад эм сюсьлун, вежӧрлун да ыджыд мывкыдлун.

¹⁵ Ме дінӧ вайӧдлісны тӧдысьясӧс да кимӧститчысьясӧс, медым лыддьыны тайӧ гижӧмасӧ да гӧгӧрвоӧдны сійӧс меным, но найӧ эз вермыны гӧгӧрвоӧднысӧ.

¹⁶ Но тэ йылысь ме кывлі, мый тэ верман гӧгӧрвоӧдны вӧтъяс да сьӧкыдлунъяс дырйи разьны гӧрӧдъяс. Тэ кӧ верман лыддьыны тайӧ гижӧмасӧ да гӧгӧрвоӧдны сійӧс, тэнӧ пасьтӧдасны пемыдгӧрд паськӧмӧ, сьыліад ӧшӧдасны зарни чеп, и тэ лоан менам муын чин серти коймӧд юралысьӧн».

¹⁷ Даниил вочавидзис ӧксылы: «Козинъястӧ коль ас ордад либӧ сет мукӧдлы, а гижӧмасӧ ме лыддя тэныд, ӧксыӧй, да гӧгӧрвоӧда сійӧс.

¹⁸ Ӧксыӧй, Медвылысса Ен сетіс тэнад Навукодоносор батьлы юралӧм, ыджыдалан вын да ошкӧм-нимӧдӧм.

¹⁹ Сылӧн ыджыдалан вынысь, мый сетіс сылы Енмыс, полісны-тіралісны войтыръяс, чужанкотыръяс да быд кыла йӧз. Кодӧс ӧксы кӧсйис, сійӧс и виис, кодӧс кӧсйис, сійӧс ловйӧн колис, кодӧс кӧсйис, сійӧс кыпӧдіс, кодӧс кӧсйис, сійӧс лэдзис.

²⁰ Но ачыс сійӧ вылӧ кыпӧдчис, чорзьӧдіс сьӧлӧмсӧ да пондіс этш тӧдтӧг ышнясьны, и сійӧс вӧлі шыбитӧма ӧксылӧн юралан пуклӧсысь, сійӧ воштіс ассьыс нималӧмсӧ.

²¹ Сійӧс вӧтлісны йӧз дінысь, и сылӧн вежӧрыс лои пемӧслӧн кодь. Сійӧ оліс вӧлявывса осёлъяскӧд, ӧш моз сёйис турун, сылысь вир-яйсӧ кӧтӧдіс лысва. Тадзи вӧлі сыкӧд, кытчӧдз сійӧ эз гӧгӧрво, мый Медвылысса Енмыс ыджыдалӧ мувывса став йӧзыс вылын да пуктӧ ӧксыӧ, кодӧс кӧсйӧ.

²² Тэ, Валтасар, Навукодоносорлӧн пиыс, тӧдін ставсӧ тайӧс, но тэ эн раммӧдчы.

²³ Тэ кыпӧдчин енэжвывса Господьлы паныд. Тэныд вайисны Господьлӧн крамысь босьтӧм дозмукъяс, и тэ да тэнад чина йӧзыд, гӧтыръясыд да кесйӧг-гӧтыръясыд юинныд сэтысь вина. Тэ ошкин эзысьысь да зарниысь, ыргӧнысь да кӧртысь, пуысь да изйысь вӧчӧм енъясӧс, кодъяс оз аддзыны, оз кывны да оз гӧгӧрвоны. А Енсӧ, кодлӧн киын тэнад олӧмыд да тэнад туйясыд, тэ эн ошкы.

²⁴ Та вӧсна Сысянь вӧлі мӧдӧдӧма ки, коді гижис тайӧ кывъяссӧ.

²⁵ Стенӧ гижӧма: ”Мене, мене, текел, у-парсин”.

²⁶ Тайӧ кывъясыслӧн вежӧртасыс татшӧм: ”Мене” – Енмыс арталіс тэнсьыд юралан лунъястӧ да пуктіс налы пом.

²⁷ ”Текел” – тэнӧ веситӧма вески вылын и казялӧма, мый тэ кокньыд.

²⁸ ”У-парсин” – тэнсьыд мутӧ лоӧ юкӧма кык пельӧ да сетӧма Мидия да Персия войтыръяслы».

²⁹ Та бӧрти Валтасарлӧн тшӧктӧм серти Даниилӧс пасьтӧдісны пемыдгӧрд паськӧмӧ, сьыліас ӧшӧдісны зарни чеп да юӧртісны, мый сійӧ лоӧ тайӧ муас чин серти коймӧд юралысьӧн.

³⁰ Сійӧ жӧ войнас калдеяса Валтасар ӧксыӧс виисны,

³¹ а ӧксыӧ пуктісны мидияса Дарийӧс, кодлы вӧлі квайтымын кык арӧс.