Даниил 14 - Коми Библия 2023

Даниил эрдӧдӧ Вил идоллӧн попъяслысь ылӧдчӧмсӧ

¹ [Астиаг ӧксы куліс да вуджис батьясыс дінӧ. Сы пыдди ӧксыӧ пуксис Персияысь Кир.

² Даниил вӧлі ӧксылӧн медматысса ёрт, и ӧксылӧн ёртъяс пӧвстысь сійӧ вӧлі медся нималана.

³ Вавилонсаяслӧн вӧлі Вил нима идол. Быд лун сылы вайлісны дас кык мешӧк шобді пызь, нелямын ыжӧс да кыксё литра гӧгӧр вина.

⁴ Ӧксы юрбитіс Вил идоллы, быд лун ветлӧдліс копрасьны сылы. А Даниил юрбитіс аслас Енлы. Ӧксы юаліс Данииллысь: «Мыйла тэ он юрбит Виллы?»

⁵ Даниил вочавидзис: «Ме ог юрбит киӧн вӧчӧм енъяслы. Ме юрбита ловъя Енлы, коді вӧчис енэжсӧ да мусӧ, и коді ыджыдалӧ быд ловъя олысь вылын».

⁶ Ӧксы шуис Данииллы: «Вил ӧмӧй абу ловъя ен? Тэ ӧмӧй он аддзы, мыйта сійӧ быд лун сёйӧ-юӧ?»

⁷ Даниил нюмдӧмӧн вочавидзис: «Ӧксыӧй, эн ылӧдлы асьтӧ. Сылысь пытшкӧссӧ ӧд вӧчӧма сёйысь, а вывтырсӧ – ыргӧнысь, сійӧ некор эз сёйлы-юлы».

⁸ Сэки ӧксы скӧрмис. Сійӧ корис Вил идоллы кесъялысь попъясӧс да шуис налы: «Ті кӧ онӧ висьталӧй меным, коді сёйӧ став тайӧ сёянсӧ, сэки куланныд.

⁹ А ті кӧ верманныд эскӧдны менӧ, мый ставсӧ тайӧс Вил сёйӧ, сэки кулас Даниил, ӧд сійӧ омӧльтіс Вилӧс». Даниил шуис ӧксылы: «Мед лоӧ тэнад шуӧм серти».

¹⁰ Вил идоллы кесъялысь попъяслӧн лыдыс вӧлі сизимдас морт, и налӧн вӧліны гӧтыръяс да челядь.

¹¹ Ӧксы Даниилкӧд локтісны Вил идоллы юрбитанінӧ. Сэні кесъялысь попъяс шуисны: «Ми ӧні петам татысь. А тэ, ӧксыӧй, пукты татчӧ сёян да кисьт вина, а сэсся пет, йигнав ӧдзӧссӧ да аслад чунькытшӧн пукты сэтчӧ печать.

¹² Тэ кӧ аски локтан да аддзан, мый Вил абу ставсӧ сёйӧма, сэки ми кулам, а сёйӧма кӧ, сэки кулас Даниил, коді висьталіс миян йылысь ылӧгсӧ».

¹³ Попъяс эз майшасьны, ӧд пызан улас вӧлі вӧчӧма гуся пыранін. Сэті найӧ волывлісны да сёйлісны став вайӧм сёянсӧ.

¹⁴ Кор попъяс петісны, ӧксы пуктіс Вил идол водзӧ сёян. А Даниил тшӧктіс аслас кесйӧгъяслы вайны пӧим да ӧксы дырйи разӧдны сійӧс джодж пасьталаыс. Та бӧрын ставныс петісны да йигналісны ӧдзӧссӧ. Ӧксы чунькытшнас пуктіс печать, и ставныс мунісны.

¹⁵ Войнас, кыдзи пыр вӧчлісны, Вил идоллы кесъялысь попъяс локтісны юрбитанінӧ гӧтыръясныскӧд да челядьныскӧд да ставсӧ сёйисны-юисны.

¹⁶ Мӧд луннас ӧксы да Даниил чеччисны водз асывнас.

¹⁷ Ӧксы юаліс: «Даниил, дзоньӧсь-ӧ печатьясыс?» Даниил вочавидзис: «Дзоньӧсь, ӧксыӧй».

¹⁸ Юрбитанінлысь ӧдзӧсъяссӧ восьтісны. Ӧксы дзик пыр синсӧ чӧвтліс пызан вылӧ да гораа горӧдіс: «Вил, тэ вына, тэ некодӧс он пӧрйӧдлы!»

¹⁹ Даниил нюмдіс да сувтӧдіс ӧксыӧс, медым сійӧ оз пыр юрбитанін пытшкӧсас. Сійӧ шуис: «Видзӧдлы джоджас. Кодлӧн тайӧ кок туйыс?»

²⁰ Ӧксы шуис: «Ме аддза айуловлысь, аньяслысь да челядьлысь кок туйсӧ».

²¹ Ӧксы ёна скӧрмис да тшӧктіс вайӧдны Вил идоллы кесъялысь попъясӧс, налысь гӧтыръяснысӧ да челядьнысӧ. Попъяс петкӧдлісны гуся пыранін, кыті найӧ пыравлісны юрбитанінӧ да сёйлісны-юлісны ставсӧ, мый вӧлі пызан вылас.

²² Сэки ӧксы тшӧктіс вины найӧс, а Вил бӧлбанӧс сетіс Данииллы. Даниил пазӧдіс бӧлбанӧс да юрбитанінсӧ.

Даниилӧс шыбитӧны левъяслӧн гуӧ

²³ Вавилонын вӧлі ыджыд гундыр, и вавилонсаяс юрбитісны сылы.

²⁴ Ӧксы шуис Данииллы: «Гашкӧ, тайӧ гундырыс йылысь тэ тшӧтш шуан, мый сійӧс ыргӧнысь вӧчӧма? Сійӧ ловъя. Сійӧ сёйӧ-юӧ, и тэ он вермы шуны, мый тайӧ енмыс абу ловъя. Сідзкӧ, копыртчыв сылы».

²⁵ Даниил вочавидзис: «Ме копрася сӧмын Господьлы, аслам Енлы, ӧд Сійӧ – ловъя Ен.

²⁶ Но ме кора тэнсьыд, ӧксыӧй, лэдз меным вины гундырӧс шыпурттӧг да зортӧг». Ӧксы шуис Данииллы: «Ви».

²⁷ Сэки Даниил босьтіс сир, гос да гӧн, пуис ставсӧ ӧти пӧртйын, вӧчис ёкмыль да шыбитіс гундырлы вомас. Ёкмыльсӧ ньылыштӧм бӧрын гундыр шӧри потіс. Даниил шуис: «Со, татшӧм вежаторлы ті юрбитанныд!»

²⁸ Кор вавилонсаяс кылісны тайӧ лоӧмторйыс йылысь, найӧ ёна скӧрмисны да кыпӧдчисны ӧксылы паныд. Найӧ шуисны: «Ӧксы лои иудейӧн. Сійӧ пазӧдіс Вилӧс, виис гундырӧс да попъясӧс».

²⁹ Найӧ локтісны ӧксы дінӧ да шуисны сылы: «Сет миянлы Даниилӧс. А он кӧ сет, ми виам тэнӧ да тэнсьыд гортсаястӧ».

³⁰ Кор ӧксы аддзис, мый найӧ сувтісны сылы паныд, сылы быть ковмис сетны Даниилӧс.

³¹ Найӧ шыбитісны Даниилӧс левъяслӧн гуӧ. Сійӧ вӧлі сэні квайт лун чӧж.

³² Гуас вӧлі сизим лев. Быд лун налы сетлісны кык морт шой да кык ыжӧс. Но тайӧ лунъясас левъяслы эз сетны сёянсӧ, медым найӧ сёйисны Даниилӧс.

³³ Иуда муын оліс Аввакум нима пророк. Сійӧ пуис шыд, тасьтіӧ пуктіс нянь торъяс да мӧдӧдчис видз-му вылӧ нуны шыдсӧ нянь вундысьяслы.

³⁴ Но Господьлӧн андел шуис Аввакумлы: «Ну шыдтӧ Вавилонӧ Данииллы, коді ӧні левъяслӧн гуын».

³⁵ Аввакум шуис: «Ыджыдӧй, Вавилонас ме некор эг вӧвлы, и ог тӧд, кӧні гуыс».

³⁶ Сэки Господьлӧн анделыс босьтіс сійӧс юр пыдӧсӧдыс, кыпӧдіс сійӧс юрсиӧдыс да тӧвныр моз лэбӧдіс-вайӧдіс сійӧс Вавилонӧ левъяслӧн гу дорӧ.

³⁷ Аввакум чукӧстіс: «Даниил, Даниил, босьт тайӧ сёянсӧ, мый Енмыс мӧдӧдіс тэныд».

³⁸ Даниил вочавидзис: «Енмӧй, Тэ абу вунӧдӧмыд менӧ! Тэ он эновт найӧс, кодъяс радейтӧны Тэнӧ».

³⁹ Даниил чеччис да пондіс сёйны. А Енлӧн андел дзик пыр бӧр вайӧдіс Аввакумӧс аслас местаӧ.

⁴⁰ Сизимӧд луннас левъяслӧн гу дорӧ локтіс ӧксы, медым бӧрдны Даниил вӧсна. Сійӧ матыстчис гу дорас, видзӧдліс сэтчӧ да аддзис, мый Даниил пукалӧ сэні.

⁴¹ Ӧксы гораа горӧдіс: «Господьӧй, Данииллӧн Енмӧй, Тэ – ыджыд Ен, Тэысь кындзи мӧдыс абу!»

⁴² Ӧксы тшӧктіс лэптыны Даниилӧс, а найӧс, кодъяс кӧсйисны вины Даниилӧс, тшӧктіс шыбитны левъяслӧн гуӧ. Ӧксылӧн син водзын левъяс дзик пыр косявлісны-сёйисны найӧс.]