Даниил 13 - Коми Библия 2023

Сусаннаӧс мыжалӧм

¹ [Вавилонын оліс Йояким нима морт.

² Сійӧ босьтіс гӧтырӧ Хилкилысь Сусанна нывсӧ. Сусанна вӧлі зэв мича, Енсьыс полысь ань.

³ Сылӧн бать-мамыс вӧліны веськыда олысьяс, и ассьыныс нывсӧ найӧ велӧдісны Мӧисейлӧн Индӧдӧ.

⁴ Йояким вӧлі зэв озыр, сылӧн керка дорас вӧлі сад йӧр. Йояким ордӧ чукӧртчывлісны иудейяс, ӧд сійӧ вӧлі мукӧд дорсьыс медся нималана.

⁵ Сійӧ вонас иудейяс пӧвстысь кык юрнуӧдысьӧс индісны ёрдысьясӧн. Найӧ вӧліны сэтшӧм йӧз, кодъяс йылысь Господь висьталіс: «Лёк вӧчӧмыс петіс Вавилонысь ёрдысь-юрнуӧдысьяссянь, кодъяс эз сяммыны веськӧдлыны войтырнас».

⁶ Тайӧ ёрдысьясыс тшӧкыда волывлісны Йояким ордӧ, и на дінӧ волывлісны ставныс, кодъяслӧн вӧліны могъяс-вензьӧмъяс.

⁷ Луншӧр каднас, кор йӧзыс разӧдчывлісны, Сусанна пырджык ветлӧдліс верӧсыслӧн сад йӧрын.

⁸ Кыкнан юрнуӧдысьыс быд лун видзӧдісны сад йӧрын ветлӧдлысь Сусанна вылӧ. На пытшкын кыптіс лёкколӧм Сусанна дінӧ.

⁹ Налӧн пемдіс вежӧрныс, найӧ эз лэптыны синсӧ енэжланьыс, тӧд выланыс эз кутны веськыда мыждӧмсӧ.

¹⁰ Найӧ вӧлі тырӧмаӧсь лёкколӧмӧн Сусанна дінӧ, но ӧта-мӧдсьыс дзебисны тайӧс.

¹¹ Налы вӧлі яндзим висьтавны сы йылысь, мый кӧсйӧны узьны Сусаннакӧд.

¹² Быд лун найӧ сюся кыйӧдісны Сусанна бӧрся. Ӧтчыд найӧ шуисны ӧта-мӧдныслы:

¹³ «Мунам гортӧ, пажын кад нин». И быдӧн мӧдӧдчис гортланьыс.

¹⁴ Сэсся найӧ бӧр бергӧдчисны, локтісны сэтчӧ жӧ да юалісны ӧта-мӧдныслысь, мыйла пӧ тэ бергӧдчин. Найӧ висьталісны ӧта-мӧдныслы асланыс лёкколӧм йылысь да сёрнитчисны, коді кутшӧм кадӧ локтас, медым суны Сусаннаӧс ӧтнассӧ.

¹⁵ Найӧ виччысисны лӧсялана кадсӧ. Мукӧд лунъясӧ моз Сусанна бара локтіс сад йӧрӧ кык кесйӧг анькӧд, медым мыссьыны, ӧд ывлаас ёна пӧжис.

¹⁶ Сад йӧрын некод сэсся эз вӧв кык юрнуӧдысь кындзи, кодъяс дзебсьӧмӧн кыйӧдісны аньӧс.

¹⁷ Сусанна шуис кесйӧг аньяслы: «Вайӧй меным вый да майтӧг, йигналӧй сад йӧрсьыс дзиръяяссӧ, и ме кута мыссьыны».

¹⁸ Найӧ вӧчисны сылӧн шуӧм серти: йигналісны сад йӧрлысь дзиръяяссӧ да петісны бокыса ӧдзӧсӧд, медым вайны сійӧ, мый вӧлі тшӧктӧма вайны. Кык дзебсьӧм юрнуӧдысьӧс кесйӧг аньяс эз аддзывны.

¹⁹ Кор кесйӧг аньяс мунісны, юрнуӧдысьяс чеччисны да котӧртісны Сусанна дінӧ. Найӧ шуисны сылы:

²⁰ «Сад йӧрлысь дзиръяяссӧ йигналӧма, и некод оз аддзы миянӧс. Ми кӧсъям узьны тэкӧд, эн пыксьы миянлы, узь миянкӧд.

²¹ А он кӧ вӧч тадзи, сэки ёрд водзын ми висьталам, мый тэ вӧлін зонкӧд, та вӧсна тэ ыстін ас дінсьыд кесйӧг аньястӧ».

²² Сусанна сьӧкыда ымӧстіс да шуис: «Ме налькйӧ шеді! Ме кӧ вӧча тадзи, менӧ виччысьӧ кулӧм, а ог кӧ вӧч, сэки ме ог мын тіян киысь.

²³ Но бурджык лоӧ, ме кӧ ог вӧч тадзи. Господь водзын мыж вӧчӧм дорысь бурджык веськавны тіян мыждӧм улӧ».

²⁴ Сусанна мыйвынсьыс горӧдіс. Юрнуӧдысьяс тшӧтш горӧдісны.

²⁵ Ӧтиыс котӧртіс да восьтіс сад йӧрлысь дзиръясӧ.

²⁶ Керкаын вӧлысьяс кылісны сад йӧрысь горзӧм. Найӧ котӧрӧн локтісны да пырисны сад йӧрӧ бокыса ӧдзӧсӧд, медым видзӧдлыны, мый лои Сусаннакӧд.

²⁷ Юрнуӧдысьяс пондісны мыжавны Сусаннаӧс. Сусанналӧн кесйӧгъясыс весьӧпӧрисны, налы яндзим лои, ӧд водзынджык нинӧм татшӧмторсӧ эз кывлыны сы йылысь.

²⁸ Мӧд луннас, кор войтырыс чукӧртчис Сусанналӧн Йояким верӧсыс ордӧ, сэтчӧ тшӧтш локтісны тайӧ кык юрнуӧдысьыс. Найӧ кӧсйисны сетны Сусаннаӧс кулӧм вылӧ, ӧд вӧлі тырӧмаӧсь лёкнас.

²⁹ Найӧ тшӧктісны вайӧдны Хилкилысь Сусанна нывсӧ, Йоякимлысь гӧтырсӧ. Сусаннаӧс вайӧдны мӧдӧдісны йӧзӧс,

³⁰ и сійӧ локтіс аслас бать-мамыскӧд, челядьыскӧд да став рӧдвужыскӧд.

³¹ Сусанна вӧлі зэв мича да муса чужӧма,

³² и сылӧн чужӧмыс вӧлі тупкӧма. Но тайӧ лёк вӧчысьясыс тшӧктісны сылы восьтны чужӧмсӧ, медым пӧткӧдчыны сылӧн мичлуннас.

³³ Сылӧн рӧдвужыс и ставныс, сы вылӧ видзӧдысьяс, бӧрдісны.

³⁴ А тайӧ кык юрнуӧдысьыс сувтісны войтыр водзас да пуктісны кинысӧ Сусанналӧн юр вылас.

³⁵ Сусанна бӧрдігтырйи видзӧдіс енэжас, ӧд сійӧ лача кутіс Господь вылӧ.

³⁶ Юрнуӧдысьяс висьталісны: «Кор ми ӧтнаным ветлӧдлім сад йӧрӧд, тайӧ аньыс локтіс сэтчӧ кык кесйӧг анькӧд. Сійӧ йигналіс сад йӧрлысь дзиръяяссӧ, а кесйӧг аньяссӧ бӧр мӧдӧдіс.

³⁷ Сы дінӧ локтіс зон, коді вӧлі дзебсьӧма сад йӧрас, да водіс сыкӧд.

³⁸ Ми вӧлім сад йӧр пельӧсын, но кор аддзим тайӧ мыж вӧчӧмсӧ, котӧртім на дінӧ.

³⁹ Найӧ вӧлі ӧтлаын куйлӧны. Зонсӧ ми эгӧ вермӧй кутны, ӧд сійӧ вӧлі миянысь вынаджык. Сійӧ восьтіс дзиръясӧ да пышйис.

⁴⁰ Но тайӧ аньсӧ ми кутім да юалім сылысь: ”Коді вӧлі тайӧ зонмыс?” Но сійӧ эз кӧсйы висьтавны миянлы. Ми аддзылім ставсӧ тайӧс да ӧні висьталам та йылысь».

⁴¹ Йӧзыс эскисны налы, ӧд найӧ вӧліны войтырлӧн юрнуӧдысьясӧн да ёрдысьясӧн, и Сусаннаӧс мыждісны кулӧм вылӧ.

⁴² Сэки Сусанна гора гӧлӧсӧн шыасис: «Помтӧг олысь Енмӧй, Тэ тӧдан став гусяторсӧ, Тэ водзвыв ставсӧ тӧдан!

⁴³ Тэ тӧдан, мый найӧ ылӧгсӧ висьталісны ме йылысь. Ме эг вӧч сійӧ, мыйысь тайӧ юрнуӧдысьясыс мыжалӧны менӧ, но ӧні меным ковмас кувны».

⁴⁴ Господь кыліс сылысь гӧлӧс шысӧ.

⁴⁵ Кор Сусаннаӧс нуӧдісны виӧм вылӧ, Енмыс ышӧдіс том Данииллысь вежа ловсӧ,

⁴⁶ и Даниил гораа горӧдіс: «Ме абу мыжа тайӧ аньлысь вирсӧ кисьтӧмысь!»

⁴⁷ Сэки став войтырыс бергӧдчис Данииллань да юаліс: «Мый тэ шуин?»

⁴⁸ Сэки Даниил сувтіс войтыр пӧвстас да шуис: «Израиль войтырӧй, ті ӧмӧй сэтшӧм мывкыдтӧмӧсь? Ті збыльсӧ тӧдмавтӧг мыжданныд израильса аньӧс.

⁴⁹ Бӧр бергӧдчӧй, медым веськыда мыждыны! Тайӧ кык мортыс ылӧгсӧ висьталісны сы йылысь».

⁵⁰ Став войтырыс тэрмасьӧмӧн бӧр бергӧдчис. Войтырлӧн юрнуӧдысьяс шуисны Данииллы: «Пуксьы миян шӧрӧ, ӧд Енмыс пуктіс тэнӧ юрнуӧдысьӧ. Висьтав миянлы, мый тэнад сьӧлӧмад».

⁵¹ Даниил шуис налы: «Тайӧ кык мортсӧ ылӧджык торйӧдӧй ӧта-мӧдсьыныс, и ме юася найӧс быдӧнӧс торйӧн».

⁵² Найӧс торйӧдісны ӧта-мӧдсьыныс. Та бӧрын Даниил корис на пиысь ӧтисӧ да шуис сылы: «Тэ пӧрысь нин, но пыр на вӧчан лёксӧ. Ӧні воссисны тэнад воддза мыжъясыд:

⁵³ тэ эн веськыда мыждыв, мыжтӧмъясӧс мыждылін, а мыжаясӧс лэдзлін. Но Господь висьталӧ: ”Мыжтӧмӧс да веськыда олысьӧс кулӧм вылӧ эн мыжды”.

⁵⁴ Тэ кӧ аддзылін тайӧ аньсӧ, сідзкӧ, висьтав, кутшӧм пу улын найӧ куйлісны». Сійӧ шуис: «Фисташ пу улын».

⁵⁵ Даниил шуис сылы: «Дзик збыльысь. Тайӧ ылӧгсьыс тэ вештысян аслад юрнад. Енлӧн тшӧктӧм серти Сылӧн анделыс керыштас тэнӧ шӧрипӧв».

⁵⁶ Тайӧ мортсӧ нуӧдісны. Даниил тшӧктіс вайӧдны мӧдсӧ да шуис сылы: «Тэ ханаан войтырысь, абу Иуда войтырысь. Аньлӧн мичлуныс ыштӧдіс тэнӧ, тэнад лёкколӧмыд тшыкӧдіс тэнӧ.

⁵⁷ Тадзи ті вӧчлінныд израильса аньяскӧд, и найӧ полӧмнысла узьлісны тіянкӧд. Но тайӧ иудаса аньыс эз сетчы, медым мыж вӧчны тіянкӧд.

⁵⁸ Ӧні висьтав меным, кутшӧм пу улын найӧ куйлісны, кор тэ суин найӧс». Сійӧ вочавидзис: «Тупу улын».

⁵⁹ Даниил шуис сылы: «Тайӧ ылӧгсьыс тэ вештысян аслад юрнад. Енлӧн анделыс виччысьӧ шыпуртӧн, медым керыштны тэнӧ шӧрипӧв. Сійӧ дзикӧдз бырӧдас тіянӧс кыкнаннытӧ».

⁶⁰ Став чукӧртчӧм йӧзыс гораа горӧдісны да ошкисны Енмӧс, коді мездӧ Сы вылӧ лача кутысьясӧс.

⁶¹ Йӧзыс кыпӧдчисны тайӧ кык юрнуӧдысьыслы паныд, ӧд Даниил налӧн жӧ кывъясӧн петкӧдліс, мый найӧ висьталісны ылӧгсӧ.

⁶² Накӧд вӧчисны сідзи, кыдзи найӧ кӧсйисны вӧчны асланыс матыссакӧд. Мӧисейлӧн Индӧд серти йӧзыс виисны найӧс. Сійӧ лунӧ вӧлі мездӧма мыжтӧм мортӧс.

⁶³ Хилки да сылӧн гӧтырыс ёна ошкисны Енмӧс Сусанна нывсьыс. Сусанналӧн Йояким верӧсыс да став рӧдвужыс тшӧтш ошкисны Енмӧс сыысь, мый Сусанна вӧлі мыжтӧм – эз вӧч яндысьтӧмтор.

⁶⁴ Сійӧ лунсяньыс и водзӧ Даниилӧс пондісны ёна ыдждӧдлыны войтыр пӧвстын.]