Даниил 10 - Коми Библия 2023

Тигр ю дорын Данииллы Енсянь восьтӧм

¹ Персияса Кир ӧксылӧн коймӧд веськӧдлан воӧ Данииллы, кодӧс шуисны Белтешацарӧн, вӧлі Енсянь восьтӧм. Тайӧ восьтӧмыс вӧлі збыль, но сійӧс сьӧкыд вӧлі гӧгӧрвоны. Даниил гӧгӧрвоис восьтӧмсӧ аддзылӧм пыр.

² Сійӧ кадас ме, Даниил, шогси куим вежон чӧж.

³ Тайӧ куим вежон чӧжыс чӧскыд сёян эг сёйлы, яй да вина вомам эг босьтлы, юрӧс выйӧн эг мавтлы.

⁴ Медводдза тӧлысьлӧн кызь нёльӧд лунӧ ме вӧлі ыджыд Тигр ю дорын.

⁵ Ме лэпті синмӧс да аддзи шабді паськӧма мортӧс, кодлӧн коскыс вӧлі вӧнялӧма зарни вӧньӧн. Зарниыс вӧлі Уфазысь вайӧм зарни кодь.

⁶ Сылӧн вир-яйыс вӧлі хризолит из кодь, чужӧмыс – чардби кодь, синмыс – би кодь, киыс да кокыс югъялісны весалӧм ыргӧн моз, гӧлӧс шыыс вӧлі уна лыда йӧзлӧн шы кодь.

⁷ Ме, Даниил, сӧмын ӧтнамӧн аддзылі тайӧ петкӧдчылӧмсӧ, а мекӧд орччӧн сулалысь йӧзыс эз аддзывны сійӧс, но найӧс ыджыд полӧм босьтіс, и найӧ котӧртісны да дзебсисны.

⁸ Ме коли ӧтнамӧн. Тайӧ ыджыд петкӧдчылӧмсӧ аддзылігӧн ме дзикӧдз вынтӧмми да лигышмуні, менам чужӧмӧй быгаліс.

⁹ Сылысь гӧлӧс шысӧ кылігӧн ме садьӧс вошті да кымынь уси муас.

¹⁰ Но кодлӧнкӧ киыс инмӧдчис меӧ да лэптіс менӧ, ме сувті пидзӧс вылӧ да киӧн мыджси муас.

¹¹ Сійӧ шуис меным: «Даниил, тэ муса Енмыслы. Гӧгӧрво сійӧ кывъяссӧ, мый ме висьтала тэныд. Чеччы да сувт кок вылад, ӧд менӧ мӧдӧдӧма тэ дінӧ». Кор сійӧ шуис тайӧ кывъяссӧ, ме чеччи дзӧригтыр.

¹² Сійӧ шуис меным: «Эн пов, Даниил! Тэнсьыд кевмӧмтӧ кылӧма медводдза лунсяньыс, кор тэ раммӧдін сьӧлӧмтӧ аслад Ен водзын, медым гӧгӧрвоны сійӧ, мый тэ аддзылін. И ме локті тэнад кевмӧм вӧсна.

¹³ Но Персия муын юралысь андел кызь ӧти лун чӧж водзсасис мекӧд, и меным ковмис кольччыны сэтчӧ персияса ӧксыяс дінӧ. Сэсся Микаил, медыджыд юралысь анделъясысь ӧти, локтіс отсавны меным.

¹⁴ Ӧні ме локті, медым юӧртны тэныд, мый лоӧ тэнад войтырыдкӧд бӧръя кадӧ. Ӧд сійӧ, мый тэ аддзылін, висьталӧ бӧръя кад йылысь».

¹⁵ Кор сійӧ висьталіс меным тайӧс, ме эг лысьт юрӧс лэптыны, эг вермы весиг кыв шуны.

¹⁶ Но кодкӧ морт кодь инмӧдчис менам вомдорӧ, и ме понді сёрнитны. Ме шуи ме водзын сулалысьлы: «Ыджыдӧй, сыысь, мый ме аддзылі, менӧ топӧдіс чорыд дой, и ме дзикӧдз вынтӧмми.

¹⁷ Ыджыдӧй, кыдзи нӧ меным, тэнад кесйӧглы, сёрнитны тэкӧд? Ме дзикӧдз вынтӧмми, весиг лолӧй оз шед».

¹⁸ Сэки сійӧ, коді вӧлі морт кодь, бара инмӧдчис меӧ да вынсьӧдіс менӧ.

¹⁹ Сійӧ шуис меным: «Эн пов, тэ муса Енмыслы! Лӧнь олӧм тэныд, ёнмӧдчы!» Кор сійӧ сёрнитіс мекӧд, ме вынсялі да шуи сылы: «Ыджыдӧй, водзӧ висьтав меным, тэ ӧд вынсьӧдін менӧ».

²⁰ Сійӧ шуис: «Тӧдан-ӧ, мыйла ме локті тэ дінӧ? Ӧні ме бӧр муна, медым вермасьны Персия муын юралысь анделкӧд. А кор ме верма сійӧс, сэки мекӧд вермасьны локтас Греция муын юралысь андел.

²¹ И тайӧ тышас некод оз отсав меным Микаил, тіян юралысь анделныд, кындзи. Но ме висьтала тэныд, мый гижӧма Збыльыслӧн небӧгас.