Авдий 1 - Коми Библия 2023

Эдомӧс мыждӧм

¹ Авдийлы Енсянь восьтӧм. Ми кывлім Господь Ыджыдсянь, Сійӧ Эдом йылысь висьталіс, мый войтыръяс дінӧ мӧдӧдӧма юӧртысьӧс, сійӧс мӧдӧдӧма шуны: «Чеччӧй, петамӧй тышӧ Эдомлы паныд!»

² – Эдом, Ме вӧча тэнӧ войтыръяс пӧвстын медічӧтӧн, тэнӧ ставныс пондасны ёна мустӧмтны.

³ Вылӧ кыпӧдчӧмыд ылӧдліс тэнӧ. Изкарын моз тэ олан джуджыд керӧсъяс вылын, тэ мӧвпалан ас йывсьыд: «Некод оз вермы шыбитны менӧ му вылӧ».

⁴ Но тэ кӧ кутш моз лэбзян выліинӧ, овмӧдчан-поздысян кодзувъяс пӧвстӧ, весиг сэтысь Ме шыбита тэнӧ, – висьталӧ Господь.

⁵ Тэ дінӧ кӧ локтісны гусясьысьяс, войся куштысь-мырддялысьяс, найӧ эськӧ бырӧдісны тэнӧ, но гусялісны эськӧ сӧмын мыйта налы колӧ. Тэ дінӧ кӧ локтісны виноград чукӧртысьяс, найӧ эськӧ колисны мыйтакӧ вотӧс.

⁶ Но тіянлысь, Исавсянь чужысьяс, ставсӧ лоӧ гусялӧма, весиг дзебӧм озырлуннытӧ лоӧ корсьӧма-петкӧдӧма.

⁷ Тэкӧд йитӧд кӧрталысьяс вӧтласны тэнӧ аслад муысь, тэнад ёртъясыд пӧръяласны да вермасны тэнӧ, тэнсьыд няньтӧ найӧ пуктасны тэ водзӧ нальк пыдди. Но Исавсянь чужысьяс тайӧс оз гӧгӧрвоны.

⁸ – Сійӧ лунӧ, – висьталӧ Господь, – Ме бырӧда Эдомысь мывкыд йӧзӧс, бырӧда Исав керӧс вылысь вежӧра йӧзӧс.

⁹ Теман, тэнад тышкайӧзыд кутасны дзӧрны-тіравны, Исав керӧс вылын ставнысӧ лоӧ виӧма-бырӧдӧма.

¹⁰ Ассьыд Яков воктӧ дзескӧдӧм вӧсна тэнӧ лоӧ янӧдӧма, Исав, тэнӧ лоӧ пыр кежлӧ бырӧдӧма.

¹¹ Кор локтысь йӧз нуӧдісны пленӧ Яковлысь тышкайӧзсӧ, кор йӧз муысь локтысьяс пырисны дзиръяӧд Ерусалимӧ да пудъясисны Ерусалим вӧсна, сійӧ лунӧ тэ сулалін бокын, тэ вӧлін на кодь жӧ.

¹² Тэ лёка вӧчин, кор нимкодясин вокыдлӧн сьӧкыдалан лунӧ, кор нимкодясин Иуда войтырӧс бырӧдан лунӧ, кор омӧльтін найӧс шог дырйиныс.

¹³ Тэ лёка вӧчин, кор пырин Менам войтырлӧн дзиръяӧд сылӧн шог дырйи, кор видзӧдін сылӧн сьӧкыдалӧм вылӧ, кор куштін сылысь эмбурсӧ сылӧн шог дырйи.

¹⁴ Тэ лёка вӧчин, кор сулалін туйвежын да виалін пышйысьясӧс, кор ловйӧн кольӧмаясӧс сетін шог дырйиныс вӧтлысьяслӧн киӧ.

¹⁵ Но матыстчӧ Господьлӧн луныс, став войтыръясӧс мыждан лун. Кыдзи тэ, Эдом, вӧчин, сідзи жӧ тэкӧд вӧчасны, тэнад вӧчӧмторъясысь водзӧс перъясны.

¹⁶ Кыдзи Менам вежа керӧс вылын ті юинныд Менам скӧрлуна дозйысь, тадзи войтыръяс век кутасны юны Менам скӧрлуна дозйысь. Найӧ пӧттӧдзныс юасны да бырасны, быттьӧ найӧ эз и вӧвны.

Израильӧс мездӧм

¹⁷ А Сион керӧс вылӧ пышйысьяс мездмасны, сійӧ лоӧ вежаинӧн. Яковсянь чужысьяслы бӧр вуджас налӧн муыс.

¹⁸ Яковлӧн рӧдыс лоӧ биӧн, Ӧсиплӧн рӧдыс – ыпъялан биӧн, а Исавлӧн рӧдыс – идзасӧн. Исавлысь рӧдсӧ сотасны-бырӧдасны, сылӧн рӧдысь некод оз коль. Тадзи висьталӧ Господь.

¹⁹ Негевын олысьяс босьтасны Исав керӧс, керӧсбердса муын олысьяс босьтасны Филистим му. Иуда войтыр босьтас Ефрем да Самария муяс, Венямин чужанкотыр босьтас Галаад му.

²⁰ Израильысь пленӧ нуӧдӧм тышкайӧз бӧр бергӧдчасны да босьтасны Ханаан му Сарепта карӧдз, Ерусалимысь Сефарадӧ пленӧ нуӧдӧмаяс бӧр локтасны да босьтасны негевса каръяс.

²¹ Вермысьяс каясны Сион керӧс вылӧ, медым ыджыдавны Исав керӧс вылын. И Господь лоас сэні ӧксыӧн.