2 Каднебӧг 2 - Коми Библия 2023

Крам лэптігкежлӧ дасьтысьӧм

¹ Соломон тшӧктіс лэптыны Господьлы крам да аслыс ӧксы керка.

² Сійӧ индіс сизимдас сюрс мортӧс кыскавны-ваявны изъяс, кӧкъямысдас сюрс мортӧс керавны-перйыны изъяс, а куим сюрс квайтсё мортӧс индіс уджалысьяс бӧрся видзӧдны.

³ Тирса Хирам ӧксы дінӧ Соломон мӧдӧдіс йӧзӧс, медым найӧ висьталісны сылы: «Водзынджык тэ отсалін менам Давид батьлы – мӧдӧдлін сылы сус пуяс, медым вӧчны наысь аслыс керка.

⁴ Ӧні ме кыпӧда аслам Господь Енлы крам. Ме вежӧда-торйӧда сійӧс Господьлы, медым тшынӧдны Господь водзын чӧскыд ӧвтанторъяс, медым вайны крамӧ вежа нянь, медым рытын и асылын, шойччан лунӧ и выль тӧлысь чужигӧн да миян Господь Енлы сиӧм гажӧдчан лунъясӧ вайны сотан висьяс, кыдзи пыр кежлӧ тшӧктӧма вӧчны Израильлы.

⁵ Крамыс, мый ме кыпӧда, лоӧ ыджыд, ӧд миян Енным став енсьыс ыджыд.

⁶ Но коді вермас лэптыны Сылы керка, весиг кӧ енэжыс да енэжвывса енэжъясыс оз вермыны тӧрӧдны Сійӧс? Коді ме сэтшӧмыс, медым лэптыны Сылы керка? Ме верма сӧмын вись сотӧм могысь лэптыны Сылы керка.

⁷ Сідзкӧ, мӧдӧд меным мортӧс, коді бура кужӧ вӧчасьны эзысь-зарниысь, ыргӧнысь, кӧртысь, кужӧ вӧчны пемыдгӧрд, югыдгӧрд да гӧрдовлӧз рӧма дӧра, бура кужӧ вундалӧмӧн серпасавны. Сійӧ кутас уджавны Иудаын да Ерусалимын олысь киподтуя йӧзкӧд, кодъясӧс индіс меным Давид батьӧй.

⁸ Нӧшта мӧдӧд меным Ливанысь сус пу, кипарис да гӧрд пу. Ме тӧда, тэнад кесйӧгъясыд бура кужӧны пӧрӧдны ливанса вӧр. Менам кесйӧгъясӧй кутасны ӧтвылысь уджавны накӧд,

⁹ медым дасьтыны уна кер. Ӧд крамыс, мый ме кута вӧчны, лоӧ зэв ыджыд да мича.

¹⁰ Тэнад кесйӧгъяслы, кодъяс кутасны пӧрӧдны вӧр, ме сета пӧткӧдчӧм вылӧ кызь сюрс мешӧк шобді, кызь сюрс мешӧк ид, кызь сюрс бат мында вина да кызь сюрс бат мында олив вый».

¹¹ Тирса Хирам ӧксы мӧдӧдіс Соломонлы гижӧд: «Господь радейтӧ Ассьыс войтырсӧ, та вӧсна пуктіс тэнӧ налы ӧксыӧ».

¹² Хирам нӧшта содтіс: «Ошкӧм Господьлы, Израильлӧн Енлы, коді вӧчис енэжсӧ и мусӧ. Давид ӧксылы Сійӧ сетіс мывкыд пиӧс. Сылӧн пиыс сюсь вежӧра, сійӧ вӧчас Господьлы крам да аслыс ӧксы керка.

¹³ Ме мӧдӧда тэ дінӧ Хирам-Авиӧс, сійӧ – мывкыд да киподтуя морт.

¹⁴ Сылӧн мамыс Дан рӧдысь, а батьыс сылӧн Тирысь. Сійӧ бура кужӧ вӧчасьны эзысь-зарниысь, ыргӧнысь, кӧртысь, изйысь да пуысь, бура кужӧ вӧчны пемыдгӧрд, гӧрдовлӧз да югыдгӧрд рӧма дӧра, тшӧтш вӧсни шабді дӧра. Сійӧ бура кужӧ вундалӧмӧн серпасавны да вӧчны быдпӧлӧс уджсӧ, мый сылы тшӧктасны. Сійӧ ӧтвыв кутас уджавны тэнад киподтуя йӧзкӧд да менам Давид ыджыдлӧн, тэнад батьыдлӧн, киподтуя йӧзкӧд.

¹⁵ Мӧдӧд аслад кесйӧгъяслы шобді, ид, вый да вина, мый йылысь тэ висьтавлін, менам ыджыдӧй.

¹⁶ А ми кутам Ливанын пӧрӧдны вӧр, мыйта тэныд колӧ, а сэсся пуръясӧн кылӧдам саридз кузя Иоппияӧдз. Сэсянь тэ нуан найӧс Ерусалимӧ».

¹⁷ Соломон тшӧктіс артавны мукӧд войтыръяс пӧвстысь Израиль муӧ овмӧдчӧм йӧзӧс. Водзынджык тадзи тшӧтш вӧчліс сылӧн Давид батьыс. Тайӧ йӧзыслӧн лыдыс вӧлі сё ветымын куим сюрс квайтсё морт.

¹⁸ На пиысь сизимдас сюрсӧс Соломон индіс кыскавны-ваявны изъяс, кӧкъямысдас сюрсӧс – керавны-перйыны изъяс, а куим сюрс квайтсё мортӧс индіс уджалысьяс бӧрся видзӧдны.