2 Каднебӧг 1 - Коми Библия 2023

Соломон корӧ Енлысь мывкыдлун

¹ Давидлӧн Соломон пиыс лои вына ӧксыӧн. Господь, сылӧн Енмыс, вӧлі сыкӧд и вылӧ кыпӧдіс сійӧс.

² Соломон корис ас дінас Израиль му пасьталаысь тышкайӧзлысь юралысь-веськӧдлысьясӧс, ёрдысьясӧс, войтырлысь юралысьясӧс да рӧдкутысьясӧс.

³ Чукӧртчӧм бӧрын Соломон ставныскӧд муніс Гаваонӧ вись ваян мыльк вылӧ. Сэні вӧлі Енлӧн вежа чом, кодӧс овтӧминын вӧчліс Мӧисей, Господьлӧн кесйӧг.

⁴ Водзынджык Давид вуджӧдіс Енлысь кудсӧ Киръят-Яримысь Ерусалимӧ, кӧні сійӧ сувтӧдіс кудйыслы чом.

⁵ Но ыргӧн висьпуктаніныс сулаліс Гаваонын, Господьлӧн вежа чом водзын. Тайӧ висьпуктанінсӧ вӧчліс Хур Урилӧн Безалел пиыс. Сэні Соломон да чукӧртчӧм войтырыс шыасисны Господь дінӧ.

⁶ Ыргӧн висьпуктанін вылын Соломон вайис Господьлы сюрс сотан вись.

⁷ Войнас Соломонлы вӧтас петкӧдчис Ен да шуис: «Кор Менсьым, мый кӧсъян, и Ме сета тэныд».

⁸ Соломон шуис Енлы: «Тэ вӧлін зэв бур сьӧлӧма менам Давид бать дінӧ. Сы бӧрти Тэ пуктін менӧ ӧксыӧ.

⁹ Господьӧй Енмӧй, мед инас Тэнад кывйыд, мый Тэ шулін менам Давид батьлы. Тэ пуктін менӧ ӧксыӧ, медым веськӧдлыны войтырӧн, кодлӧн лыдыс мувывса бус мында.

¹⁰ Сідзкӧ, сет меным мывкыдлун да вежӧр, медым ме верми нуӧдны тайӧ войтырсӧ. Ӧд вермас-ӧ кодкӧ веськӧдлыны Тэнад уна лыда войтырӧн?»

¹¹ Енмыс шуис Соломонлы: «Аслыд тэ эн кор озырлун, овмӧс-эмбур, нималӧм, эн кӧсйы тэнӧ мустӧмтысьяслы кулӧм, эн кор кузь нэм, но корин мывкыдлун да вежӧр, медым веськӧдлыны Менам войтырӧн, кодлы Ме пукті тэнӧ ӧксыӧ. Сыысь, мый тэнад сьӧлӧмад вӧлі татшӧм кӧсйӧм,

¹² Ме сета тэныд мывкыдлун да вежӧр, а озырлунсӧ, овмӧс-эмбурсӧ да нималӧмсӧ Ме сета тэныд сы мында, мыйта эз на вӧв тэӧдз и оз ло тэ бӧрти веськӧдлысь ӧксыяслӧн».

¹³ Гаваонысь, вись ваян мыльк вылысь, кӧні вӧлі вежа чом, Соломон бӧр локтіс Ерусалимӧ да пондіс ӧксыавны Израильын.

Соломонлӧн озырлун

¹⁴ Соломон лӧсьӧдіс аслыс тарантаса вӧвъясӧс: тарантас лыдыс вӧлі сюрс нёльсё, а вӧвъяслӧн лыдыс – дас кык сюрс. Сійӧ видзис найӧс тарантаса тышкайӧзлы торйӧдӧм каръясын да аслас Ерусалим карын.

¹⁵ Соломон ӧксы дырйи Ерусалимын эзысь-зарниыс вӧлі из мында, а сус пуыс вӧлі сы мында, мыйта вӧлі керӧсбердса муын быдмысь инжир пуыс.

¹⁶ Вӧвъяссӧ Соломонлы вайлісны Египетысь да Куваысь. Найӧс ньӧблісны ӧксылӧн вузасьысьяс.

¹⁷ Египетысь вайӧм тарантасыс сулаліс квайтсё сикель эзысь, а вӧлыс – сё ветымын. Соломон ӧксылӧн вузасьысьяс ставсӧ тайӧс вайлісны тшӧтш хеттей войтырлӧн ӧксыяслы да арамейяслӧн ӧксыяслы.