1 Тимофейлы 2 - Коми Библия 2023

Кевмысьӧй став йӧзыс вӧсна

¹ Медводз кора тіянӧс: кевмысьӧй Енмыслы, шыасьӧй Сы дінӧ корӧм-кевмӧмӧн да аттьӧалӧмӧн став йӧзыс вӧсна.

² Кевмысьӧй юралысьяс да ыджыдалысьяс вӧсна, медым ми олім лӧня да зыксьытӧг, вежавидзӧмӧн да шогмана ногӧн.

³ Тайӧ бур да шогмӧ Енмыслы, миян Мездысьлы.

⁴ Сійӧ кӧсйӧ, медым став йӧзыс мездмисны да тӧдісны збыльсӧ.

⁵ Енмыс ӧти. Ен да морт костын сулалысьыс тшӧтш ӧти – Морт, Исус Кристос.

⁶ Сійӧ сетіс Асьсӧ, медым ньӧбны став йӧзсӧ. Тайӧ петкӧдлӧ, мый мездана кадыс воис нин.

⁷ Та йылысь юӧртны сувтӧдіс менӧ Ен. Сійӧ индіс менӧ апостолӧн да ентӧдӧмъясӧс збыляс-эскӧмас велӧдысьӧн. Кристос водзын збыль висьтала, ог пӧръясь.

Аньясӧс да айуловӧс туйдӧдӧм

⁸ Ме кӧсъя, медым айулов быдлаын кевмысисны кинысӧ кыпӧдӧмӧн, сӧстӧм сьӧлӧмӧн, лӧгавтӧг да майшасьтӧг.

⁹ Кӧсъя, медым аньяс пасьтасисны лючки-бура, мичмӧдісны асьнысӧ рамлунӧн да вежавидзӧмӧн, а эз юрсинысӧ баситӧмӧн, зарни-жемчуг ӧшлӧмӧн да дона паськӧмӧн.

¹⁰ Найӧ мед мичмӧдасны асьнысӧ бур уджъясӧн. Тадзи колӧ вӧчны Енмысь полысь-вежавидзысь аньяслы.

¹¹ Аньяс мед чӧла да кывзысьӧмӧн велӧдчасны.

¹² Аньлы ог лэдз велӧдны айловӧс либӧ ыджыдавны сы вылын, ань мед чӧв олӧ.

¹³ Ӧд водзджык вӧлі вӧчӧма Адамӧс, сэсся Еваӧс.

¹⁴ Эз Адам ылав, но ань ыштӧмыс вӧсна ылаліс да мыж вӧчис.

¹⁵ Но ань мездмас кага чужтӧм пыр, кутчысяс кӧ эскӧмас, муслунас, вежавидзӧмас да бур оласногас.