Mark 9 - Badon Tolagan Na Biblia

¹ Et kigwan mowan Jesus i “Sejay a konen kod si-kayo, podnon gwariy echom a kainakgwat chiyay a nat metiy nin ira tan metaen ches Afo Chiyos a mantotoray na panakabalin to.”

Iyanbaliw I Kasi-neng Jesus

² Idi epalabas diy enem a akow, iyodop Jesus si Peter, James, tan si John, et eniyed iren agos ched ekayang a chontog. Idi maramen chiyan si-nenges Jesus, iyanbaliw i kasi-neng to,

³ et sema baro tho, pimolaw a chilin mandingsi. Sema polaw to, agwak toy polaw na iyaykoladen baro.

⁴ Et iyanparang mes Elijah tan si Moses a chiyan tebales Jesus.

⁵ Kigwan Peter cha Jesus i “Afo, salamat a gwara kiyed jay. Mengemag kawi na tedon sakmao say sema sa-ki para cha si-kam, sema sa-ki para cha Moses, tan sema sa-ki para cha Elijah.”

⁶ Binngat toy esel tep eg to amtiy konen to tep timahot iren pasiya.

⁷ Et gwara wiy kolpot a enirom ira. Et gwara diy esel a edafod ma kolpot a kigwan to i “Sejay i ensemek kon pasiyen Anak ko. Ki-ngeli yoy nakigwan to.”

⁸ Timangkak iren chakos, nem nagwariy mita ra, malaksid si Jesus bengat.

⁹ Idi maramen manchachalong ired ma chontog, binidin iren Jesus i “Enog i ingwanggwanggwang cha angken siyen tooy mita yo ingkathod manpawilak nin a Anak na Too.”

¹⁰ Isonga, nat ingwanggwanggwang iren ma disipolos toy epasamak cha angken siyen too, no diket natiyabtabal cha no nengoy piyan Jesus a a-seden nonta kigwan to i manpawil.

¹¹ Inbagaan cha i “Niyana nakigwan na mamaistoro na dinteg i mesepol a medebas nin alis Elijah iy say sema Cristo?”

¹² Et insongbat Jesus i “Medebas ngarod alis Elijah say iolnos ton emiin. Nem gwara ngoy iyaysolat cha esel Afo Chiyos maypangkep cha si-kak a Anak na Toon kigwan to i mesepol a da-kaman koy chakel a digat tan damsisen chaak.

¹³ Nem konen kod si-kayo i iyakcheng alis Elijah a kimowan, nem nat piyeschian na too, et imag chiy piya-piyan ched si-kathon inges toy iyaypadtod esel Afo Chiyos.”

Chiyagchag Jesus I Dimonyon Iyay-ejan Cha Nga-ngen Dahi

¹⁴ Idi enalong ires Jesus a ekika-chom ired ma echom a disipolos, mita ren siyali-bongan ira na chakel a too tan gwara iriy mamaistoro na dinteg a ekidisdiskotil.

¹⁵ Sema iren emiin a tothoo, apaman a mita res Jesus, iyasdaaw iren pasiya et bintik chen engaspol.

¹⁶ Et inbagen Jesus i “Nengoy jowan pansosongbathi?”

¹⁷ Et gwariy sa-kin dahid ma chakel a toon engowan i “Maistoro, intolod ko diy anak kod kad-an mo tep naiya-janan na olay na dimonyo et eg mahaesel.

¹⁸ No onkarod anak ko, natingwang to. Idi naepasamak iwan, naimosab i temi tho tan nakimaletket tan nakimenteg. Inbagaan koy disipolos mo i chagchagen cha, nem nagwariy kebedinan cha.”

¹⁹ Et insongbat Jesus i “Si-kayon toon eg naemati! Sa-noy kebejag na pekiolo-olop kod si-kayo? Sa-noy kebejag na pan-ano-anos kod si-kayo? Ala jo di ta nga-nged si-kak.”

²⁰ Et intolod cha ma nga-nged kad-an Jesus, et idi mita niwa dimonyos Jesus, inpakayengkeng ton chakos iwa nga-nga, et etongba ma nga-nga et iyanpoli-polig a man-oosab i temi tho.

²¹ Inbagaan Jesus iwa awa na nga-nga i “Empiyan i inpanchogi tho?” Kigwan niwa awa i “Inchogi tho nonta kaotik to.

²² Eminchakel a nainpantegwang niwa dimonyod afoy tan chanom say bonoen to. Pangaasim! Tolongi mo kawi no gwariy kebedinan mo.”

²³ Kigwan Jesus i “Ngoy piyan mon a-seden, no gwariy kebedinan ko? Sema toon naematid Afo Chiyos, gwariy kebedinan ton emiin.”

²⁴ Et kimeljaw a chakos iwa awa na nga-ngen kigwan to i “Naematiak, nem nat on-anay i pamatik. Pangaasim! Tolongi moak say on-anay!”

²⁵ Idi miten Jesus i chakel a toon emangkesa-nop cha kad-an cha, inseg-ang to ma dimonyon kigwan to i “Si-kam a dimonyon enoleng tan iyanmomom niya nga-nga, bidinen taha i bo-day ka et enog miy oli-olid si-katho.”

²⁶ Et kimeljaw i dimonyo et inpakayengkeng to ma nga-nga, et bimo-day i dimonyo. Sema nga-nga, singen etiy, isonga kin na chakel a too i agpayson etiy.

²⁷ Nem iden Jesus iwa diwa tho et tiyolongan ton bimangon, et imakgwat ma iwa nga-nga.

²⁸ Idi simekep ires Jesus chiwa baliy a si-kara bengat, inbaga iren ma disipolos to i “Niyana eg mi mahachagchag iwa dimonyo?”

²⁹ Kigwan Jesus i “Say dimonyon inges niwan, mesepol a mankararag nin i tood Afo Chiyos asan mebedin a mechagchag iwa dimonyo.”

Sema Maykadgwen Inpangowan Jesus Maypangkep Na Ketiy To

³⁰ Et iyamtik ma ires Jesus chiwan et chidan chiy Galilee. Nat piyan Jesus a amtaan na tooy kad-an cha

³¹ tep towan toroi iriy disipolos ton kigwan to i “Si-kak a Anak na Too, iawat chaak cha naengontred si-kak et bonoen chaak, nem no maykatdon akow, manpawilak.”

³² Nem sema iren disipolos to, eg cha igwathan i piyan Jesus a a-seden, et timahot iren mengibaga.

Siyay Kahejangan?

³³ Idi mimothok ires Jesus cha Capernaum a simekep chiwa baliy, inbagaan Jesus iriy disipolos to i “Nengoy jowan pansosongbathid chalan nonta engkay?”

³⁴ Nem kaeke-eket ira tep iyansosongbathan chiy maypangkep no siyed si-kariy kahejangan.

³⁵ Et timokkong mes Jesus, et tiya-gway to iriy disipolos ton kigwan to i “Angken siyen toon piyan ton kahejangan, mesepol a ibaba thoy angel to tan mansilbid emiin a too.”

³⁶ Et ena-gway na nga-nga et inpaakgwat tod ma kawa na tothoo. Igwang to ma nga-ngen kigwan to i

³⁷ “Sema toon mengegwat na ebaben toon inges to ja nga-nga kagol na pamati thod si-kak, si-kak pay i egwathen to, tan sema toon mengegwat cha si-kak, egwathen to pay ngo ma engito-nod si-kak.”

Sema Toon Nat Mengontred Si-kathayo, Echom Tayo

³⁸ Et kigwan men John cha Jesus i “Maistoro, gwariy mita win toon naiyosal toy ngaran mon menagchag na dimonyos, nem inparit mi tep nat echom tayo.”

³⁹ Nem kigwan Jesus i “Enog i inparit tep sema toon naengosal na ngaran kon mengemag na milagro, nat mebedin a mengowan na ngaaw maypangkep cha si-kak no eng-engkay.

⁴⁰ Tep sema toon nat naengontred si-kathayo, natiyolongan to kiya.

⁴¹ Sejay a konen kod si-kayo, podnon angken siyen toon mengi-kan cha si-kayo angken tasa bengat na chanom say inomen jo tep ekika-chom kayod si-kak a si Cristo, sigoradon mekongkonaan.”

Sema Pengipabasol Na Too

⁴² “Angken siyen toon mengipabasol na angken sa-kin ebaben toon naematid si-kak, magangkana koma no mayba-jat i enbel-at a bathod bokdow to, et iba-tok ched baybay say metiy iy say sema mengipabasol na too.

⁴³ Isonga, no seta diwam i panbasolan mo, ketnom. Tep magangkana no mayka-chom ked biyag a nagwariy pengingkaan to angken sa-ki bengat i diwam iy chegwiy diwam a onkowan ked inpiyirnon kawad-an na afoy a eg ma-ma-chepan.

⁴⁵ Tan no seta sekim i panbasolan mo, ketnom. Tep magangkana no mayka-chom ked biyag a nagwariy pengingkaan to angken sa-ki bengat i sekim iy chegwiy sekim a iba-tok chaked inpiyirno.

⁴⁷ Tan no seta ngon matham i panbasolan mo, ekal mo. Tep magangkana no mayka-chom ked pantorayan Afo Chiyos angken sa-ki bengat i matham iy chegwiy matham a iba-tok chaked inpiyirno.

⁴⁸ Tep cha inpiyirno, eg meti-metiy i bihis a naengan na angel na too tan eg ma-ma-chep i afoy.”

⁴⁹ Et kigwan ngon Jesus i “Emiin a too, mesepol a da-kaman chiy digat say medinis ira. Inges toy mekan a maytangdal cha Afo Chiyos a mesepol a ma-sinan say medinis.”

⁵⁰ Tan kigwan mowan Jesus i “Mapteng i asin, nem no ondamsis, ngoy pesing ton may-oliy namnam to? Isonga, nemnem joy silbi na asin cha biyag jo tan pantitimpoyog kayo.”