Mark 8 - Badon Tolagan Na Biblia

Pikan Jesus I Epat A Dibon Too

¹ Nontan a timpo, esa-sa-nop mowan i chakel a tood kad-an Jesus. Idi nagwara wiy kakanen cha, tiya-gway Jesus i disipolos ton kigwan to i

² “Emangkaikaasiiak ired ja too tep gwara ired si-kak na tedon akow et nagwara wiy kakanen cha.

³ No pebtik ko ira iy eg ira nin engan, onkapsot emo la ired chalan tep sema iren echom, aragwiy edafoan cha.”

⁴ Et insongbat iren ma disipolos to i “Ahow mango, nem ngoy pesing tayon mengeda na kakanen cha iy iyaydasin iyay a dogad a nagwariy bali-baliy chiyay?”

⁵ Inbagen Jesus i “Piyen tinapay i gwared si-kayo?” Kigwan cha i “Pitho.”

⁶ Et inpatokkong men Jesus iriy too. Ida thoy pithon tinapay et iyansalamat cha Afo Chiyos. Piyetpet-ing ton in-i-kan tod disipolos to et in-ap-ap ched too.

⁷ Gwara pay iriy otik a babechis a paideng. Iyansalamat si Jesus kagol na paideng et inpaiap-ap to ngo.

⁸ Engan a emiin i too et iyapsel ira. Et kiyoskos iren ma disipolos i ebay-anan, et pino thoy pithon basket.

⁹ Say kabibidang na engan, chanchanin epat a dibon too. Idi iyakcheng ma iwan, inpabtik Jesus i too,

¹⁰ et ekidogan a chakos cha disipolos tod bangken kimowan ired sahop na Dalmanutha.

Inbaga Na Pharisees I Mengemag Si Jesus Na Milagron Pamaneknek

¹¹ Gwariy echom a Pharisees a kimowan cha kad-an Jesus, et inchogi ren mekidiskotil. Piyan chen memaras et inbagaan cha i mengemag na milagron mengipaneknek i si Afo Chiyos nowan i engito-no did si-katho.

¹² Et ngima-jas si Jesus kagol na engos ton kigwan to i “Si-kayon too niman, niyana nainpili-pilit jon maybiybiyan kayo na milagro? Sejay a konen kod si-kayo, podnon nagwariy maybiybiy a milagrod si-kayo.”

¹³ Idi iyakcheng a kigwan Jesus iwan, bintihan to wa ira, et iyankeb-ong mowan chiwa bangka et bima-sil cha piig niwa baybay na Galilee.

In-arig Jesus I Toro-toro Na Pharisees Tan Ogadin Herod Cha Para Debag Na Tinapay

¹⁴ Iyaytompong a diningding na disipolos Jesus i mengitahin ira na tinapay a sikdop cha. Gwariy sa-sa-kin tinapay chiwa bangka.

¹⁵ Et tiyengteng men Jesus i disipolos to i “Tanchaani yoy para debag na Pharisees tan si Herod.”

¹⁶ Idi inki-ngelan iren ma disipolos iwan, iyankinowan ira i “Kigwan to emo man tep nagwariy intahin tayon tinapay.”

¹⁷ Amten Jesus i chiyan tabtabala, isonga kigwan to i “Niyana jowan tabtabalay kanagwara na tinapay? Eg jo pay laeng nin egwathan? Esa-dinan ayay nemnem jo?

¹⁸ Ithan i matha yo, nem eg kayo mahamatha. Ithan i ngila yo, nem eg kayo mahaki-ngel. Diningding jo aya ma epasamak nontan?

¹⁹ Idi piyetpet-ing ko ma dimen tinapay a inpahan kod ma dimen dibon too, piyen basket i injanan jo na ebay-anan?” Kigwan cha i “Sawal na chegwa.”

²⁰ “Et sema pithon tinapay a inpahan kod ma epat a dibon too, piya ngon basket i injanan jo na ebay-anan?” Kigwan cha i “Pitho.”

²¹ Et kigwan men Jesus i “Et eg jo pay laeng egwathan?”

Ingkal Jesus I Korab Na Tood Bethsaida

²² Idi mimothok ires Jesus cha Bethsaida, gwariy sa-kin dahin ekorab a intolod ched kad-an Jesus. Ekiadok ira i isagpat toy diwa thod ma dahi say ma-kal i korab to.

²³ Et chigwat Jesus iwa ekorab et inbalnay tod awas niwa siyodad. Chiyopdaan toy matha tho tan insagpat toy diwa thod si-katho. Et inbaga wen Jesus i “Gwariy mowan mathaa?”

²⁴ Timangkak i ekorab a kigwan to i “Ahow, kowan mathaa i toon singen kejow a kainahad ira.”

²⁵ Et insagpat men Jesus mowan i diwa thod matha tho. Et sini-neng na ekorab a pasiya. Koston iya-kal i korab to, et marigwes miy peni-neng to.

²⁶ Et inpabtik men Jesus a kigwan to i “Pandiritso ken onbetik. Enog i sa-mad chiwa siyodad a edafoan tayo.”

Sema Kigwan Peter Maypangkep No Siyes Jesus

²⁷ Et kimowan mes Jesus tan disipolos tod otik a siyo-siyodad cha sahop na Caesarea Philippi. Idi man-aahad ira, inbagaan Jesus i disipolos to i “Nengoy nakigwan na too maypangkep no siyaak?”

²⁸ Et kigwan cha i “Nakigwan na echom i si-kam si John a Naemonjag. Nakigwan ngo na echom i si-kam si Elijah. Nakigwan ngo pay na echom i si-kam i sa-kin profita nonta bayag da.”

²⁹ Et inbagen Jesus i “Nem no si-kayo ngo, ngoy nakigwan jo maypangkep no siyaak?” Insongbat Peter i “Si-kam i Cristo.”

³⁰ Et binidin ma iren Jesus i eg cha polos igwanggwanggwang no siyes si-kathod angken siyen too.

Sema Pilmiron Inpangowan Jesus Maypangkep Na Ketiy To

³¹ Et iyanchogid ma timpo, iyantoro wes Jesus cha disipolos to maypangkep na mepesamak alid si-kathon kigwan to i “Si-kak a Anak na Too, mesepol a mandigathak a pasiya. Sema iren iyangkaama, aafo na papari, tan mamaistoro na dinteg, nat egwathen chaak et pebono raak, nem no maykatdon akow, manpawilak.”

³² Indiritson Jesus a engowan niwan, nem si Peter, ingwakdin to et inseg-ang tos Jesus.

³³ Nem singab Jesus ira ma disipolos to, et inseg-ang to ngos Peter a kigwan to i “Betihi moak, Satanas! Tep seta mowan nemnema, nat setan i piyan Afo Chiyos, no diket sema piyan na too.”

Sema Panbiyag Na Toon Naematid Jesus

³⁴ Et tiya-gway men Jesus i chakel a too tan disipolos to, et kigwan to i “No gwariy toon piyan ton mekika-chom cha si-kak, mesepol a ibiyang toy biyag to tan sakbathen toy koros to say may-odop cha si-kak.

³⁵ Tep sema toon menepi na biyag to, ma-tiw cha si-katho, nem sema toon metiy kagol na pamati thod si-kak tan pengowan to na mapteng a chamag, may-i-kanan na biyag a nagwariy pengingkaan to.

³⁶ Tep nengoy kongkonaen na too no kokowaen ton emiin i kongkoned ja dobong iy ma-tiw i biyag to tan mechosa na ingked ingka? Nagwara!

³⁷ Tep nagwariy mebedin a isa-dat na tood biyag to.

³⁸ Niman a timpo, mabesol i tothoo tan eg cha naimag i nakigwan Afo Chiyos. Isonga, sema toon mengibaing cha si-kak a Anak na Too tan toro-torok, ibaing ko ngo no onkowanak alin edikmothan na nihal na karebengan tan panakabalin Awak, tan may-odop i esantoan a anghilis cha si-kak.”