Mark 15 - Badon Tolagan Na Biblia

In-awat Ches Jesus Cha Pilate

¹ Apaman a eta-nang ma, sema iren aafo na papari, iyangkaama, mamaistoro na dinteg, tan emiin ira ma gwariy karebengan ton mengowis, iyan-aaspol ira et tiyabtabal chiy pesing ched Jesus. Et bidod cha wa et inkowan ched Pilate say iawat cha.

² Inbagaan men Pilate i “Si-kam i ari na Hodjos?” Insongbat Jesus i “Ahow, agpayso ta kigwan mo.”

³ Inbasolan iren ma aafo na paparis Jesus na chakel.

⁴ Et inbaga mowan Pilate i “Inki-ngelan moy chakel a engicharoman ched si-kam. Nagwara pay laeng i isongbat mo?”

⁵ Nem nat simongbat mowan si Jesus, et iyasdaaw si Pilate.

Kiyowis Ches Jesus A Kigwan Cha I Mesepol A Metiy

⁶ No timpo na Piyasta na Inda-bas na Anghil cha Hodjos, say ogadin Pilate, naengibolos na sa-kin balod a pispisen na too.

⁷ Nontan a timpo, gwariy chakel a balod a emono nonta ekika-chom ira na daban na sosolcharon Romano cha Jerusalem, et sema sa-kid si-kara, dahin iyanngaran na Barabbas.

⁸ Et esa-sa-nop i chakel a too et inbagaan ches Pilate i mengibolos na balod tep si-kathoy ogadi tho.

⁹ Inbagen Pilate i “Piyan jon ibolos koy ari na Hodjos?”

¹⁰ Kigwan to man tep iyamtaan to i apal i kagol a engiawathan iren ma aafo na paparin Jesus.

¹¹ Nem sema iren aafo na papari, igwis chiy tothoon ibagaan ches Pilate i ibolos tos Barabbas, nat si Jesus.

¹² Et kigwan mowan Pilate i “No setan i piyan jo, ngoy pesing kod ja toon nakigwan jo i Ari na Hodjos?”

¹³ Kimeljaw mowan iren kigwan cha i “Idansam cha koros!”

¹⁴ Et kigwan Pilate i “Niyana, ngoy imag ton ngaaw?” Nem ema-men kimeljaw ira i “Idansam cha koros!”

¹⁵ Isonga, inbolos men Pilate si Barabbas tep piyan ton pepneken i too. Si Jesus ngo, inpabaras Pilate et in-awat to say idansa red koros.

Iyang-angja Na Sosolcharos Jesus

¹⁶ Et insekep na sosolcharos Jesus cha baliy na gobirnador a nakigwan cha i praetorium, et tiya-gway chen emiin i echom cha.

¹⁷ Biyaroan ches Jesus na depang a inges toy nainbaro na ari. Engamag pay ira na bengel a aamag na gwahal a iyas-asbithan, et inbengel chen singen korona.

¹⁸ Et iyang-angja ra i “Si-kam a Ari na Hodjos, sapay koma onbaya-bayag i biyag mo!”

¹⁹ Piyegpeg-as chiy toktok to na bila-jo tan chiyop-chopdaan cha. Iyantalimohod ira et inbili-biling chen manchejaw cha si-katho.

²⁰ Idi kincheng chen iyang-angja, ingkal cha ma depang a baro, et biyaroan cha na sigod a baro tho. Et inbetik cha walen idansa red koros.

Indansa Res Jesus Cha Koros

²¹ Idi mankokowan ira, gwariy toon manda-da-bas a si Simon a i-Cyrene a awen Alexander tan si Rufus. Mankokowan cha siyodad a edafo did payo-payow, nem inpilit iren ma sosolcharon sakbathen toy koros Jesus.

²² Et inkowan ma na sosolcharos Jesus chiwa dogad a engaranan na Golgatha a say banag to, dogad na pohel na toktok na too.

²³ Idi mimothok ired man, in-i-kanan ches Jesus na inom a edaohan na myrrh, nem nat ininom Jesus.

²⁴ Et indansa ra wed koros. Idi iyakcheng ma, bininga-bingay chiy baron Jesus, et iyanbobonot ira say amtaen chiy a-daen cha.

²⁵ Alas nowibi na omsiyang iy indansa red koros.

²⁶ Tan sema iyaycharoman to, iyaypakpak chiwa koros a kigwan to i “Ari na Hodjos.”

²⁷ Gwara ngoy chegwen tolisan a iyaydansed koros cha. Sema sa-ki, gwared gwanan Jesus, tan sema sa-ki ngo, gwared gwili tho.

²⁹ Sema iren kedina-bas, ingwaleggweg chiy toktok cha, et kiyelsithan ches Jesus a kigwan cha i “Kigwan mo i omasen moy timplo, et a-magen mo mowan na tedon akow.

³⁰ No agpayso tan, tolongim i angel mo et epas ka did ta koros!”

³¹ Sema ngo iren aafo na papari tan mamaistoro na dinteg, iyang-angja ra ngon iyankinowan ira i “Tiyolongan toy echom, nem eg to mebedin a tolongan i angel to.

³² Si-katho konoy Criston Ari na Israel. No agpayso tan, on-epas koma did ma koros say metaen tayo et memati kiyed si-katho.” Et sema iren echom a iyaydansed koros, ekiang-angja ngo ira.

Etiy Si Jesus

³³ Idi alas dosi wa, bimolinget i intiron dogad ingkathod alas tris.

³⁴ Et idi alas tris ma, kimeljaw si Jesus a chili i “Eloi, Eloi, lama sabachthani?” a say banag to, “Chiyos ko, Chiyos ko, niyana in-olay moak?”

³⁵ Et sema iren echom a kainakgwat chiwan, idi inki-ngelan cha man, kigwan cha i “Iki-ngeli yo! Towan ta-gwayes Elijah.”

³⁶ Sema sa-kid si-kara, bintik ton engala na singen bolak. Insiwsiw tod enpait a inom et intebek tod bila-jo. Et inka-gwat to wed Jesus say sepsepen to. Idi niyan-amagen ma too man, kigwan to i “Kanin, memeta no onkowan alis Elijah a mengpas chiwa koros.”

³⁷ Et kimeljaw mes Jesus et etiy.

³⁸ Nontan ngon timpo, sema kortined timplo, iyanchegwen ebi-nik a iyanchogid kayang ingkathod sa-kod.

³⁹ Et sema kapitan na sosolcharon man-ak-akgwat chiwan a singo thos Jesus, idi mita tho wa i inpasing Jesus a etiy, kigwan to i “Seja too, agpayson Anak Afo Chiyos!”

⁴⁰ Gwara pay iriy bibiin kebinantay chiwa ki-ki-nan. Gwared si-kara ires Mary Magdalene, si Mary a inen Joses tan si James a iyanngaran na Orichiyan, tan si Salome.

⁴¹ Si-kariy bibiin ekiolo-olop cha Jesus tan chiya-cha-chaan cha na mesepol to nonta gwared Galilee. Gwara pay iriy chakel a echom a bibiin ekikowan cha Jesus cha Jerusalem.

Inbeka Res Jesus

⁴² Sema akow na ingkathiy Jesus, Biyarnis a akow na pengisagana para cha gwa-gwa thon Sabbath. Nonta ara-chem na Biyarnis,

⁴³ si Joseph a i-Arimathea a marejaw a afo na Hodjos a manseseked na imothok ali na pantorayan Afo Chiyos, timoled a kimowan cha kad-an Pilate a inbaga tho no mebedin a a-daen toy angel Jesus.

⁴⁴ Idi inki-ngelan Pilate i etiy mes Jesus, iyasdaaw, isonga inpata-gway toy kapitan na sosolcharo, et inbagaan to no etiy males Jesus.

⁴⁵ Idi kigwan na kapitan i podnon etiy, intolok Pilate a a-daen Joseph i angel Jesus.

⁴⁶ Et enongkal mes Joseph na dofot a in-epas to diy angel Jesus chiwa koros, et dinibothan ton ma dofot. Idi iyakcheng ma, in-ejan toy angel Jesus cha dohang a ekotkothan a batho, et engipolig ma na banay a bathon insa-din tod ma sakepan to.

⁴⁷ Gwara ngod man ires Mary Magdalene tan si Mary a inen Joses a manbanbantay ira, et mita riy kad-an na iyaybekaan Jesus.